Ifyo Mwinganonkelamo mu Kusangwa kwi Bumba lya Mulimo
1. Finshi ifyo twalenonkelamo mwi Isambililo lya Citabo Ilya pa Cilonganino ifyo twinganonkelamo na mwi bumba lyesu ilya mulimo?
1 Bushe mulafulukako fimo pe Isambililo lya Citabo Ilya pa Cilonganino? Calewama sana pantu twaleba mu mabumba ayanono, kabili caleyanguka ukupanga ifibusa ifyalekosha icitetekelo cesu. (Amapi. 18:24) Katungulula we sambililo lya citabo aletwishiba bwino sana ica kuti calemwangukila ukwafwa umo na umo uwa mwi bumba lyakwe. (Amapi. 27:23; 1 Pet. 5:2, 3) Ifi fine e fyo twinganonkelamo na mwi bumba lyesu ilya mulimo.
2. Kuti twaitendekelako shani ukupanga ifibusa na bo twaba nabo mwi bumba lya mulimo abengatukoselesha mu fya kwa Lesa?
2 Muleitendekelako: Mu mabumba ya mulimo mwaba fye abantu abanono nga filya fine amabumba ya isambililo lya citabo yaleba. Ukubombela “pamo” na bambi mu mulimo wa kushimikila kulenga twakwata ifibusa ifisuma. (Fil. 1:27) Ni banga mwi bumba lyenu ilya mulimo abo mwabombapo nabo? Bushe mulekabila ukuwamyako mumo pa kuti ‘mukushe ukutemwa kwenu?’ (2 Kor. 6:13) Na kabili, inshita shimo kuti twaitako bamo aba mwi bumba lyesu ku Mapepo ya Lupwa nelyo ku ca kulya ca cungulo. Mu filonganino fimo, amabumba ya mulimo balalekanina ukupekanishisha kalanda umweni ica kulya. Mu mulungu wabo uwa kupokelela kalanda umweni, aba mwi bumba balaliila pamo ica kulya no kukoseleshanya nangu ca kuti kalanda afilwa ukusangwako.
3. Ni lilali twingakwata ishuko lya kupokelela ifipempu fya bucemi mu mabumba yesu aya mulimo?
3 Ifi tukumana fye ku kulongana imiku ibili mu mulungu pamo nge cilonganino, tacipilibula ukuti bakasabankanya nomba tabakulapokelela sana ifipempu fya bucemi. Umulimo wa kwa kangalila we bumba wa kukoselesha umo na umo uwa mwi bumba lyakwe no kubafwa pa kuti baleshimikila bwino. Nga ca kuti kangalila we bumba lyenu talamwebapo ukuti mukabombe nankwe mu mulimo, kuti mwaitendekelako ukumweba ukuti mulefwaya ukubombako nankwe. Na kabili, cila mweshi kulaba umulungu umo ilyo kangalila wa mulimo abomba ne bumba limo na limo pa mpela ya mulungu. Mu filonganino umwaba fye amabumba ya mulimo ayanono, kangalila wa mulimo kuti atantika ukutandalila ibumba limo na limo imiku ibili mu mwaka. Bushe mulaipekanya ukubombela pamo nankwe ilyo atandalila ibumba lyenu?
4. (a) Bushe ukukumana kwa mulimo wa mwi bala mu cilonganino kufwile ukuba shani? (b) Mulandu nshi tufwile ukuitemenwa ukupeela amayanda yesu ukuti yabe ififulo fya ku kumaninapo?
4 Ilingi line mwaliba ubusuma nga ca kuti aba mwi bumba limo na limo balekumana pamo pa mpela ya mulungu ku kuya mu kushimikila. Kuti cawama sana nga ca kuti ififulo fya ku kumaninapo fingi e lyo bonse bakumana pa nshita imo ine pantu bakasabankanya kuti balefika bwangu pa cifulo ca ku kumaninapo limbi na ku cifulo ca kubombelamo. Ici kuti ca-afwa kangalila we bumba ukwakanya bwangu bakasankanya kabili kuti baletendeka bwangu ukushimikila. Na kabili kuti cilemwangukila ukutungulula bwino aba mwi bumba lyakwe. Lelo kuti kwaba ifingalenga ukuti amabumba ya mulimo yabili nelyo ayengi ukukumanina pamo. Nga ca kuti icilonganino cilakumana pamo ilyo bashilaya mu kushimikila pa Cibelushi ca kubalilapo mu mweshi nelyo pa numa ye Sambililo lya Ulupungu lwa kwa Kalinda, ilyo bashilapepa ipepo lya kusondwelela ukukumana kwa mulimo wa mwi bala, kuti cawama sana nga kangalila we bumba limo na limo e wa-akanya aba mwi bumba lyakwe pantu ninshi e ubeshibe bwino.—Moneni akabokoshi kaleti, “Bushe Kuti Mwapeela Ing’anda Yenu Ukuti ibe Icifulo ca ku Kumaninapo?”
5. Nangu ca kutila tatukumana nga filya twalekumana pe Sambililo lya Citabo ilya pa Cilonganino, cinshi tufwile ukwishiba?
5 Nangu ca kutila tatukumana nga filya twalekumana pe Sambililo lya Citabo ilya pa Cilonganino, Yehova alitwalilila ukutupekanishisha fyonse ifyo tukabila pa kuti tulecita ukufwaya kwakwe. (Heb. 13:20, 21) Tatubulisha nangu cimo. (Amalu. 23:1) Tulanonkelamo sana mu mabumba yesu aya mulimo. Nga tuleitendekelako kabili ‘tulefusha na pa kutanda, tukaseepa ifingi.’—2 Kor. 9:6.
[Akabokoshi pe bula 6]
Bushe Kuti Mwapeela Ing’anda Yenu Ukuti ibe Icifulo ca ku Kumaninapo?
Mu filonganino fimo, amabumba ya mulimo yalakumana pamo pa kuya mu kushimikila pa Cibelushi na pa Mulungu pantu amayanda ya ku kumaninamo tayafula sana. Lipaalo ukupeela ing’anda yesu ku cilonganino ukuti ibe icifulo ca ku kumaninapo. Bushe kuti mwaitemenwa ukupeela ing’anda yenu? Mwishimunuka ukupeela ing’anda yenu. Ilyo bashilasuminasha ukuti ing’anda yenu ilebomfiwa, baeluda bakamona icifulo mwabelako ne fintu fimbi ifyo balelolekeshapo ilyo balesuminisha ififulo fya kulonganinapo isambililo lya citabo. Nga kuti mwatemwa ukuti ing’anda yenu ilebomfiwa, kuti mwaeba kangalila we bumba lyenu.