Ifyo Twingacita pa Kuti Ukukumana kwa Kuya mu Mulimo wa mwi Bala Kuletwafwa Ukubomba Bwino

1. Mulandu nshi kwabela ukukumana kwa kuya mu mulimo wa mwi bala?

¹ Inshita imo, Yesu alikumene pamo na basambi bakwe 70 ilyo bashilaya mu kushimikila. (Luka 10:1-11) Abakoseleshe ukuti tabali na kuba beka, lelo Yehova “Umwine wa kulobolola” ali no kulabatungulula. Lyene alibebele ifya kucita pa kuti abapangashe ukubomba bwino umulimo wa kushimikila no kubatuma “babili babili.” Na muno nshiku mwine, ukukumana kwa kuya mu mulimo wa mwi bala kulingile ukutukoselesha, ukutupangasha e lyo no kutwafwa ukukwata abakubomba na bo.

2. Bushe ukukumana kwa kuya mulimo wa mwi bala kufwile ukuba amamineti yanga?

² Pali ino nshita, ukukumana kwa kuya mu mulimo wa mwi bala kuba amamineti 10 ukufika ku 15, muli aya mamineti tulakana, ukupoka icifulo ca kubombelamo, e lyo no kupepa. Nomba kuliko ukwaluka kumo. Ukutendekela mu April, ukukumana kwa kuya mu mulimo wa mwi bala kukalaba fye amamineti 5 ukufika ku mamineti 7. Lelo nga ca kuti uku kukumana kulebako pa numa ya kulongana, takufwile ukufika na ku mamineti 5 pantu abalesangwa kuli uku kukumana ninshi nabasambilila kale ifya mu Malembo. Ici cikalenga tukalekwata inshita iikulu iya kushimikila. Na kabili, bapainiya nelyo bakasabankanya abatendeka bwangu ukushimikila ilyo inshita ya kukumana tailafika, tabakulapumfyanishiwa sana.

3. Bushe ukukumana kwa kuya mu mulimo wa mwi bala kufwile ukuteyanishiwa shani pa kuti bakasabankanya balenonkelamo?

³ Ukukumana kwa kuya mu mulimo wa mwi bala kufwile ukuteyanishiwa bwino pa kuti bakasabankanya balenonkelamo. Mu filonganino ifingi cilawama ukukumana mu mabumba ukucila ukukumana nge cilonganino. Ici kuti calenga bakasabankanya ukulafika bwangu kukumana na ku cifulo ca kushimikilamo. Bakangalila wa mabumba kuti baleyakanya bwangu kabili kuti cabangukila ukusakamana bwino abo baba nabo mwi bumba. Ibumba lya baeluda kuti lyamona icingabomba bwino mu cilonganino cabo. Bonse balingile ukwishiba uko balabombela nabo balabomba nabo, ilyo mushilapepa ipepo lya kwisalila ukukumana.

4. Mulandu nshi tushilingile ukumwena ukuti ukukumana kwa kuya mu mulimo wa mwi bala takwacindama?

⁴ Ukukumana Kwalicindama nga Filya Fine Ukulongana Kumbi Kwacindama: Apo ukukumana kwa kuya mu mulimo kwabelako ukwafwa abalefwaya ukuya mukushimikila, nalimo te bonse mu cilonganino abengasangwako. Na lyo line, uku kukumana kwalicindama filya fine fye fyaba ukulongana kumbi. Yehova e wabikako uku kukumana pa kuti tulecincishanya ku kutemwa kabili ku kubomba imilimo iisuma. (Heb. 10:24, 25) E ico uuletungulula alingile ukupekanya bwino pa kuti ilyo balelanshanya ne bumba, ibumba lyanonkelamo no kucindika Yehova. Kanshi tulingile ukulaesha na maka yesu yonse ukusangwa ku kukumana kwa kuya mulimo wa mwi bala kano fye nga cayafya sana.

Tatulingile ukulamona kwati ukulongana kumbi kwalicindama ukucila ukukumana kwa kuya mu kushimikila

5. (a) Mulimo nshi kangalila wa mulimo akwata ku kupekanishisha ukukumana kwa kuya mu mulimo wa mwi bala? (b) Bushe nkashi kuti atungulula shani ukukumana kwa kuya mu mulimo wa mwi bala?

⁵ Uuletungulula Ukukumana Afwile Ukupekanya: Pa kuti umuntu alande bwino ilyashi mu kulongana, kano napokelela ilyashi ninshi kucili inshita. Ifi fine efyo cilingile ukuba na kubaletungulula ukukumana kwa kuya mu mulimo wa mwi bala. Kwena, nga kuli ukukumana mu mabumba, kangalila we bumba nelyo kafwa e utungulula. Na lyo line, nga ca kuti mwakumana nga icilonganino, kangalila wa mulimo akapeelela limo uwa kutungulula. Bakangalila ba mulimo bamo balalembela libela abakalatungulula no kubika amashina yabo pa cipampa ca fyebo. Kangalila wa mulimo afwile ukusala abengabomba bwino uyu mulimo ilyo alepekanya aba kutungulula, pa kutantika abakulatungulula afwile ukumona abaishiba ukusambilisha bwino e lyo na baishiba ukwakanya abantu pa kuti ukukumana kulekoselesha. Nga ca kuti takuli eluda, umubomfi utumikila, nelyo munyinefwe uwabatishiwa uwingatulungula ukukumana mu nshiku shimo, kangalila wa mulimo afwile ukutantika nkashi uwabatishiwa uwafikapo ukuti eo akatungulule.—Moneni akabokoshi akaleti, “Ilyo Nkashi Engatungulula Ukukumana.”

6. Mulandu nshi cacindamina uuletungulula ukukumana ukupekanishisha kabela?

⁶ Nga ca kuti batupeela ilyashi mwi Isukulu lya Butumikishi Ilya Bulesa nelyo mu Ukulongana kwa Mulimo, tulabikako sana amano no kulipekanya bwino. Fwe bengi tulapekanishisha limo ilyo tushilaya ku kulongana, tatupekanishisha mu nshila. E fyo tufwile no kulacita nga batupeela ukutungulula ukukumana kwa kuya mu mulimo wa mwi bala. Apo amamineti ya kukumana kwa kuya mu mulimo nayepifiwako, tufwile ukulapekanya bwino sana pa kuti uku kukumana kulenonsha abantu na pa kuti twilapula mu nshita. Ukupekanya bwino kusanshamo no kwishibila libela icifulo uko abakasangwako bakaya mu kushimikila.

7. Fintu nshi fimo ifyo uuletungulula ukukumana engalanshanyapo ne bumba?

⁷ Ifyo Mwingalanshanyapo: Pa mulandu wa kuti incende tushimikilamo shalipusanapusana, umusha wa cishinka tatupeela autulaini apo twingafumya ifyebo fya kulanda pa kukumana kwa kuya mu mulimo wa mwi bala. Akabokoshi akaleti “Pa Kukumana kwa Kuya mu Mulimo wa mwi Bala, Kuti Mwalanshanya,” nakakwata ifyebo fimo ifyo twingalanshanyapo. Ilingi line, ukukumana kwa kuya mu mulimo wa mwi bala kufwile ukuba kulanshanya. Limo limo kuti mwacitako icilangililo nelyo kuti mwatambisha vidio imo pa mavidio ayaba pa jw. org ayatwafwa mu mulimo wa mwi bala. Ilyo katungulula alepekanya ukukumana kwa kuya mu mulimo afwile ukutontonkanya pa fingakoselesha no kupangasha abaleya mu kushimikila pali ubo bushiku.

Ilyo katungulula alepekanya ukukumana kwa kuya mu mulimo afwile ukutontonkanya pa fingakoselesha no kupangasha abaleya mu kushimikila pali ubo bushiku

8. Finshi nalimo ifingawama ukulashanyapo pa kukumana kwa kuya mu mulimo mwi bala pa Cibelushi na pa Mulungu?

⁸ Ku ca kumwenako, pa Cibelushi bakasabankanya abengi batemwa ukushalika Ulupungu lwa kwa Kalinda na Loleni! Abengi abaya mu kushimikila pa Cibelushi tabaya mu kati ka mulungu, kanshi abengi balalaba ifya kushalika impapulo ifyo basambilile pa Mapepo ya Lupwa. Kanshi, kuti cawama nga ca kuti uuletungulula apituluka mu fya kulanda pa kushalika magazini ifiba pe bula lya kulekeleshako mu Ubutumikishi Bwesu Ubwa Bufumu. Nalimo kuti mwalanshanyako na pa fyo mwingalandako pa lyashi ilyali pa mulabasa, ificitike ku ncende mwikalila, nelyo holide iiliko, ilyo muleshalika magazini. E lyo nalimo kuti mwalanshanya pa fyo mwingalanda pa numa umuntu mulelanshanya nankwe apoka magazini ifyo mwingayatendekelapo ukulanshanya nankwe nga mwabwelelako. Nga ca kuti bamo abasangilweko ku kukumana balishalikapo kale iyo magazini, uuletungulula ukukumana kuti abeba ukushimikako ifyo bacitile nelyo ifisuma ifyacitike ilyo baleshalika iyo magazini. Pa Mulungu, uuletungulula kuti acita cimo cine pa kulanshanya ifya kushalika ulupapulo luleshalikwa muli uyo mweshi. Kuti mwashalika impapulo tusambililamo na bantu pamo nga broshuwa ya, Imbila Nsuma na Mulekutika Kuli Lesa, ne citabo citila Ico Baibolo Isambilisha ubushiku ubuli bonse, kanshi katungulula kuti alanshanya ne bumba pa fya kushalika ishi mpapulo.

9. Finshi mwingalanshanya pa Cibelushi na pa Mulungu nga kuli kampeni?

⁹ Nga kuli kampeni yaibela, uuletungulula ukukumana pa Cibelushi na pa Mulungu kuti alanda pa fya kushalika magazini pamo na kapepala kakwitilapo abantu nelyo trakiti, nangu kuti alanshanya ne bumba ifya kucita nga ca kuti uo tulelanshanya nankwe alefwaya ukwishibilapo na fimbi. Cimbi ico mwingacita, kulanshanya pa fisuma ifyacitike ifilangilila ukuti aya makampeni yalicindama.

10, 11. Mulandu nshi cacindamina kuli bakasabankanya ukupekanishisha kabela ilyo bashilaya mu kukumana?

¹⁰ Bakasabankanya Bafwile Ukupekanya: Bakasabankanya nabo kuti bacitako fimo ifingalenga uku kukumana ukuwama. Nga ca kuti balepekanishisha libela, nalimo ilyo bali pa mapepo ya ndupwa, bakulayafwako abo balebomba nabo mu mulimo ukulashimikila bwino. Ukupekanya bwino kusanshamo no kusendela libela magazini ne mpapulo sha kubomfya ilyo mushilatendeka ukukumana pa kuti bonse tuleya bwangu mu kushimikila ukwabula ukushingashinga.

¹¹ Na kabili, calicindama sana ukufika ilyo nshita ya kukumaka kwa kuya mu mulimo ishilafika. Kwena tulesha na maka ukufika bwangu ku kulongana. Na lyo line, kuti tulepumfyanya bambi nga ca kuti tuleceelwa ku kukumana kwa kuya mu mulimo. Kuti twabapumfyanya shani? Munyinefwe uuletungulula alatontonkanya pa fintu fimo ilyo ashilayakanya ibumba. Nga ca kuti kwishile fye bakasabankanya abanono ku kukumana, uuletungulula kuti asalapo ukuti bayebombela mu cifulo ico bashapwile ukubombelamo. Nga ca kuti bamo bacenda fye na makasa pa kuya ku kukumana kwa mu mulimo e lyo uko balaya mukushimikila kutali, ninshi uuletungulula afwile ukwakanya aba bakasabankanya pamo na bakwete imyotoka. Nga ca kuti mu cifulo mushimikila mwaliba sana ulukaakala, ninshi bamunyina kuti babakanya na bankashi nelyo kuti balabombela lwa mupepi na bankashi. Bakasabankanya abalwalilila nalimo kuti babakanya ukubombela mu cifulo icakwata imisebo iisuma nelyo umwaba amayanda yakwata fye amatabo ayanono. Bakasabankanya abapya kuti babakanya na bakasabankanya abaishiba ukushimikila bwino. Nomba nga ca kuti bakasabankanya abalecelwa ukufika, ninshi uuletungulula akatendeka na kabili ukwakanya pa kuti apeele abacelwa abakubomba nabo. Kwena, limo kuti kwaba ifingalenga ukuti tucelwe. Nomba nga ca kuti lyonse tulacelwa, tulingile ukuipusha ukuti, bushe icilenga ndecelwa mulandu wa kuti nshacindika ukukumana kwa kuya mu mulimo nelyo bushe ndafilwa ukuteyanya bwino imilimo yandi?

12. Nga ca kuti mwalitemwa ukupanganina kabela nabo mwalabomba nabo, finshi mulingile ukulatontonkanyapo?

¹² Bakasabankanya abesa mu kukumana kwa kuya mulimo wa mwi bala kuti bapanganina libela nabo balefwaya ukubomba nabo nelyo kuti balolela ukubapeela uwa kubomba nankwe. Nga ca kuti lyonse mwalitemwa ukupanganina libela, bushe te kuti ‘mukushe ukutemwa’ kwenu pa kubombako na bakasabankanya bambi ukucila lyonse ukulabomba fye ne fibusa fyenu? (2 Kor. 6:11-13) Bushe limo te kuti mulepekanya ukubombako na bakasabankanya abapya pa kuti mulebafwa ukulasambilisha bwino? (1 Kor. 10:24; 1 Tim. 4:13, 15) Mulebikako sana amano ku fyo uuletungulula alelanda, ukubikako fye na lintu alemweba apo mwalayatendekela ukushimikila. Nga ukukumana kwa kuya mu mulimo kwapwa, mwilayalula abo bamupeele ukubomba nabo kabili muleya bwangu mu kushimikila.

13. Nga ca kuti bonse balebikako amano kabili balebomba ulubali lwabo, tukalanonkelamo shani mu kukumana kwa kuya mu mulimo?

¹³ Ilyo abasambi 70 abo Yesu atumine ukuya mu kushimikila ‘babwelele, baali ne nsansa.’ (Luka 10:17) Ukwabula no kutwishika, ifyo Yesu abebele ilyo bashilaya mu kushimikila, fyalibafwile ukubomba bwino sana. E fyo caba na muno nshiku. Nga ca kuti bonse balebikako amano kabili balebomba ulubali lwabo, uku ukukumana kwa kuya mu mulimo kukalatukoselesha, kukalatupangasha e lyo no kututeyanya bwino pa kuti tulebomba bwino umulimo wa kucitila “ubunte ku nko shonse.”—Mat. 24:14.

Ilyo Nkashi Engatungulula Ukukumana

Nkashi nga euletungulula ukukumana kwa kuya mu mulimo wa mwi bala afwile ukufwala icifimbo ku mutwe kabili alingile ukwikala. Ifyebo munyinefwe engalandapo pa kukumana, e fyo na nkashi engalandapo. Tafwile ukulanda kwati alefunda ibumba lelo alingile ukulanshanya na bali mwi bumba. Nga ca kuti apeela nkashi umbi uwabatishiwa ukupepa, nao alingile ukufwala icifimbo ku mutwe. Nga ca kuti munyinefwe uwabatishiwa afika ninshi ukukumana na kutendeka kale, nkashi alingile ukweba munyinefwe ukupwisha ukukumana. Kangalila wa mulimo afwile ukutontonkanishisha libela pali fimo ifingacitika kabili afwile ukweba nkashi ifya kucita pa kuti ifyo nga fyacitika naishibila libela ifya kucita. Ku ca kumwenako, nalimo munyinefwe wacaice uwabatishiwa uushilafisha imyaka 13, uo baeluda balemona ukuti talafikapo ukulatungulula ukukumana kwa kuya mu mulimo kuti asangwako ilyo nkashi aletungulula. Nga caba ifi, kangalila wa mulimo kuti aebela limo nkashi uupeelwe ukutungulula e lyo na munyinefwe wacaice ukuti nkanshi e ukatungulula ukukumana. Na lyo line baeluda nga bamona ukuti munyinefwe wacaice nafikapo ukupepa ninshi bonse babili balingile ukubeba ukuti uyu munyinefwe e kukapepa nkashi nga apwa ukutungulula. E lyo limbi ku mitubululo kuti kwasangwa munyinefwe uo bakaanya ukutungulula ukukumana nelyo ukupepa pa kulongana pa milandu imo iyo baeluda abene baishiba. Baeluda kuti baeba bankashi abo baeba ukulatungulula ukukumana kwa kuya mu mulimo ukuti uyo munyinefwe nangu epo ali kuti batungulula no kupepa, lelo tabalingile ukubeba umulandu bacitila ifi. Baeluda balingile ukwebela libela munyinefwe inshiku isho bankashi bakalatungulula ukukumana.

Pa Kukumana kwa Kuya mu Mulimo wa mwi Bala Kuti Mwalanshanya:

Ifyebo fya kutwafwa ukushalika impapulo ifiba mu Ubutumikishi Bwesu Ubwa Bufumu.
Pali vidio iyaba pa jw.org iingatwafwa mu mulimo wa mwi bala.
Pa fyo mwingatendeka ukulanshanya na bantu, ifya kulanda pa kuti mukakwate apa kwambila nga mwabwelelako, nelyo ifyo mwingacita pa kulanda pa misangulo umuntu nga asumina ukusenda ulupapulo.
Pe lembo ilya kukoselesha nelyo ukufunda ililelanda pa mulimo wa kushimikila.
Pa cacitike mu mulimo wa mwi bala ku ncende yenu nelyo icalembwa mu mpapulo.
Ifyebo fyali mu cipande cimo ica mu Ubutumikishi Bwesu Ubwa Bufumu.
Ifyebo mwasambilile mu Kulongana kwa Mulimo.
Ifyebo ifilanda pa kushimikila ifyaba mu Ulupungu lwa kwa Kalinda.
Ifyebo ifilanda pa kushimikila ifyaba mu citabo ca Nonkelenimo ne citabo ca Iseni Mulenkonka.
Icipande ca pa jw.org ico twingabomfya pa kushimikila.
Kuti mwalanshanya ifya kubomfya akatabo ka Ifyaba mu Cebo ca kwa Lesa.
Ifyo mwingatendeka ukulanshanya no utila takwaba Lesa, uwasumina ukuti ifintu fyasangwike fye, umuHindu, nelyo umuBuddha.
Ifyo mwingacita nga ca kuti umuntu alanda fimo ifingalenga mwafilwa ukumushimikila.
Ifyo mwingafwa uo mulebomba nankwe mu mulimo pa kuti aleshimikila bwino ku ng’anda ne ng’anda.
Ifyo mwingacita nga ca kuti mwasanga uulanda ululimi lumbi.
Ifyo mwingabomba bwino inshila imo pa nshila shalekanalekana isha kushimikililamo pamo nga ukufwaya abantu, ukushimikila pa foni, ukushimikila ku cintubwingi, ukubwelela ku cipempu, nelyo ukutungulula amasambililo.
Ukucinkulako bakasabankanya ifya kuicingilila ilyo baleshimikila, ifya kwalula ifya kulanda, ifya kuba no mucinshi ku bantu, ifya kucita pa kutwalilila ukumonamo ubusuma mu mulimo tubomba, nelyo ifyapala ifi.