Ifingafwa Uuletungulula Ukukumana kwa Kuya mu Kubila Imbila Nsuma Ukulanda Ifingalenga Aba Bwananyina Ukubomba Bwino

Filya fine ukulongana kwa pa cilonganino konse kwaba, e fyo no kukumana kwa kuya mu kubila imbila nsuma nako kwaba. Ico Yehova akubikilako ni pa kuti tulecincishanya ku kutemwa kabili ku kubomba imilimo iisuma. (Heb. 10:24, 25) Uku kukumana kufwile ukuba amamineti 5 ukufika ku 7. Muli aya yene amamineti e mo bafwile ukwakanya abacikumana, ukubapeela ukwakubombela no kupepa. (Nga ca kuti uku ukukumana kwabako pa numa ya kulongana, kufwile ukwipipa sana ukucila ne fi tulandilepo.) Uuletungulula ukukumana alingile ukupekanya ifyebo ifingabomba bwino pali ubo bushiku. Ku ca kumwenako, nga ca kuti abengi tababombele umulimo wa kubila imbila nsuma umulungu wafumineko, uuletungulula ukukumana pa Cibelushi kuti cawama alanda pa fyo bengalanda ilyo balebila imbila nsuma. Finshi fimo ifyo uuletungulula engalandapo? Moneni fimo ifyo engalandapo pe samba.

• Ifyo mwingalanda ifyaba mu Akatabo ka Kubomfya pa Kulongana kwa Imikalile ya Bwina Kristu no Mulimo Tubomba

• Ifyo mwingabomfya ilyashi ilyacitike nomba line pa kutendeka ukulanshanya no muntu

• Ifyo mwingalanshanya no muntu uushilefwaya ukukutika

• Ifyo mwingalanshanya no ushasumina ukuti Lesa e ko aba, uwasumina mu kuti ifintu fyasangwike fye, uulanda ululimi mushaishiba, nelyo uupepa kwi calici ilishaseka ku ncende mwikala

• Ifya kubomfya webusaiti yesu iya jw.org, JW Library^® nelyo Baibolo

• Ifya kubomfya ulupapulo lumo pa Impapulo Tubomfya Sana pa Kusambilisha Abantu

• Ifyo twingabomfya inshila imo iya kubililamo imbila nsuma, pamo nga ukubomfya foni, ukulemba amakalata, ukubila ku cintubwingi, ifyo twingacita ifipempu, nelyo ifyo twingatungulula amasambililo ya Baibolo

• Ukucinkulako bakasabankanya ifya kuicingilila ilyo balebila imbila nsuma, ifya kwalula ifya kulanda, ifya kuba no mucinshi ku bantu, ifya kucita pa kutwalilila ukumonamo ubusuma mu mulimo tubomba, ne fyapala ifi

• Amasambililo nelyo amavidio yaba muli broshuwa itila Mulebika Amano ku Kubelenga na ku Kusambilisha

• Ifyo mwingakoselesha no kwafwa abo mulebomba nabo

• Kuti mwabelenga ilembo ililanda pa kubila imbila nsuma nelyo kuti mwashimika ifisuma ifyacitike mu mulimo wa kubila imbila nsuma ifingakoselesha aba bwananyina