Nonkelenimo Nga Nshi mu Kukumana kwa Mulimo wa Mwi Bala

1. Bushe ukukumana kwa mulimo wa mwi bala kutwafwa shani?

¹ Nga ca kuti ukukumana kwa mulimo wa mwi bala nakupekanishiwa bwino bwino kulatukosha nga nshi ku mulimo twalatampa ukubomba uwa kushimikila kabili kulatufunda ne fya kushimikila. Tulakwata ne shuko lya kubombela pamo na bakasabankanya bambi pa kuti tuletungililana no kusambilishanya. (Amapi. 27:17; Luk. Mil. 4:9, 10) Bushe kuti twacita shani pa kuti tulenonkelamo sana muli uku kukumana?

2. Bushe finshi fimo ifyo katungulula engapekanya ukulanshanyapo?

² Katungulula: Ifyebo fya kulanshanya ilingi tafitantikilwa kabela pali uku kukumana. Kanshi, katungulula alingile ukupekanya bwino. Mwilapekanya ukuti lyonse mukalabebeta fye ilembo lya bushiku, lelo kuti mwasala ukulilandapo ilyo mulelanshanya nga ca kuti lilelanda sana pa kushimikila. Tontonkanyeni pa fyebo fingafwa abalaya mu kushimikila ubo bushiku. Nalimo kuti mwalanshanya inshila imo iyo mwingabomfya pa kutendeka ukulanshanya mu mulimo wa mwi bala nelyo kuti mwacita ne cilangililo. Nga mulefwaya kuti mwapituluka mu fyebo fimo mu citabo ca kuti Ukupelulula, icitabo ca Nonkelenimo, nelyo ilyashi limo ilyali mu Kulongana kwa Mulimo ukwa nomba line. E lyo inshita shimo kuti mwalanshanya ifyo mwingalanda nga ca kuti bamwasuka fimbi nelyo mwasanga ubwafya mu ncende mushimikila, nangu kuti mwalanshanya ifyo mwingacita pa kuti umuntu afwaishe ukusambilila no kutendeka isambililo lya Baibolo, maka maka nga ca kuti bakasabankanya abengi iyo nshita balaya ku fipempu fya kubwelelamo. Te mulandu ne fyo mulelanshanya, cincimukeni kabili landeni ifya kukoselesha bakasabankanya.

3. Bushe ukukumana kwa mulimo wa mwi bala kulingile ukulepa shani, kabili finshi twingacita muli iyi nshita?

³ Inshita nga yakumana fye, tendekeni ukulanshanya, nangu ca kuti namwishiba ukuti bamo balacelwa. Akanyeni bwino bakasabankanya, kabili abalefwaya icifulo ukwa kushimikila balangilileni. Uku kukumana kulingile ukucitika mu maminiti 10 ukufika kuli 15 kabili nga ca kuti mwalakumana pa numa ya kulongana kwa cilonganino ninshi inshita ifwile ukucepa sana. Ilyo tamulapwisha ukukumana, bonse balingile ukwishiba abo balabomba nabo ne ko balabombela. Ukukumana kufwile ukupwa ne pepo.

4. Cinshi cikafwa bonse ukunonkelamo nga nshi mu kukumana kwa mulimo wa mwi bala?

⁴ Kuti Mwayafwa: Nge fyo ciba pa kulongana kwa cilonganino, tufwile ukufika bwangu. Nga tatulecelwa ninshi tulecindika Yehova kabili ninshi tulelangulukilako bambi. Ilyo kwaba ukulanshanya na imwe landenipo. Kuti mwaleka katungulula amupeela aba kubomba nabo, nelyo nalimo kuti mwasalila limo abo mwalabomba nabo. Nga ca kuti namutantikila limo abo mwalabomba nabo, muleibukisha ‘ukukusha imitima’ ukupitila mu kubombako na bakasabankanya abapusanapusana, ukucila lyonse fye ukulabomba ne fibusa fyenu. (2 Kor. 6:11-13) Ilyo ukukumana kwapwa tamulingile ukwalula ifyo bamwakenye, kabili kabiyeni bwangu uko mwalabombela no kutendeka ukushimikila.

5. Bushe ico kwabela ukukumana kwa mulimo wa mwi bala cinshi?

⁵ Imifwaile ya kukumana kwa mulimo wa mwi bala imo ine ne ya kulongana konse ukwa cilonganino. Kutwafwa ‘ukutontonkanye ifya kucincishanya ku kutemwa kabili ku kubombe milimo isuma.’ (Heb. 10:24, 25) Nga ca kuti twabombesha pa kuti tulenonkelamo muli uku kukumana, tukalabomba bwino umulimo wesu, uwaba e ‘mulimo usuma’!