Ukukumana kwa Mulimo wa Mwi Bala

1. Mulandu nshi tufwaila sana ukulashimikila mu nshila iyateyanishiwa bwino?

¹ Yesu alilangilile bwino ifyo tufwile ukubomba bwino umulimo wa kushimikila. Na lelo line abashingamwa no mulimo ulebombwa mwi sonde lyonse uwa kushimikila pa Bufumu, balafwaisha ukumona ukuti uyu mulimo ulebombwa nga fintu Yesu alebomba. Pa kuti uyu mulimo ubombwe bwino, mu filonganino mwi sonde lyonse kulaba ukukumana kwa mulimo wa mwi bala pa kuti bateyanye amabumba ya bakabila ba mbila nsuma ilyo baleya mu kushimikila.—Mat. 24:45-47; 25:21; Luka 10:1-7.

2. Finshi abalesangwa ku kukumana kwa mulimo wa mwi bala bafwile ukwenekela?

² Ifyo Ukukumana kwa Mulimo wa mwi Bala Ukusuma Kufwile Ukuba: Ukukumana kwa mulimo wa mwi bala kwabelako ku kukoselesha bamunyinefwe, ukubeba ifyebo ifingabafwa e lyo ne fyo bengacita ilyo baleya mu kushimikila. Kuti mwabebeta ilembo lya bushiku nga ca kutila ifyo lilelandapo nafikuma umulimo wa kushimikila. Inshita shimo kuti mwabomfya Ubutumikishi bwesu ubwa Bufumu, icitabo ca Kupelulula nelyo icitabo ca Nonkelenimo ukulanshanya na bamunyinefwe abaleya mu butumikishi pali ubo bushiku. Kuti mwacita icilangililo iciipi ukulangilila ifyo mwingashiila abantu ulupapulo muleshalika. Ilyo mushilapepa ipepo lya kulekelesha, bonse bafwile ukwishiba abo balabomba nabo e lyo ne cifulo uko balaya mu kushimikila. Uku kukumana takufwile ukucila pali maminiti 15. Ukukumana nga kwapwa fye bonse bafwile ukutendekako ukuya ku cifulo baleya mu kushimikilako.

3. Ni bani bafwile ukupekanya ukukumana kwa mulimo wa mwi bala?

³ Bushe Ukukumana kwa Mulimo wa mwi Bala Kuteyanishiwa Shani? Kangalila wa mulimo e washingamwa ukutungulula ukukumana kwa mulimo wa mwi bala. Bakangalila ba mabumba nelyo bakafwa babo e bashingamwa ukuya ne bumba lyabo mu mulimo wa mwi bala pa mpela ya mulungu. Bakangalila bamo nelyo ababomfi batumikila kuti baya ne bumba mu kati ka mulungu. Bakangalila ba mabumba bafwile ukubomba sana na kangalila wa mulimo pa kutila bakwate icifulo icalinga amabumba yabo ukubombelamo ku ng’anda ne ng’anda pa mpela ya mulungu. Mu kati ka mulungu kangalila wa mulimo akalanshanya na bakatungulula amabumba mu mulimo wa mwi bala ukumona ifyo bapekenye.

4-6. (a) Busuma nshi bwaba mukukwatila ukukumana kwa mulimo wa mwi bala mu cifulo mwapeelwa ukushimikilamo? (b) Finshi fingafwa kangalila wa mulimo ukwishiba icifulo icisuma ica kukumaninako e lyo ne nshita ya kukumana?

⁴ Ni Lilali Kabili ni kwi Ukukumana Kufwile Ukubela? Ukucila icilonganino conse ukukumanina pa cifulo cimo, kuti cawama ukukumanina mu fifulo fyabela mupepi no kwikala ababa mu mabumba. Ilingi line kuti kwabela mu mayanda ayaba mu cifulo mushimikilamo pa kuti mulebombelamo bwino bwino. Kuti mwakumanina na mu Ng’anda ya Bufumu. Ifilonganino ifingi balakumanina mu Ng’anda ya Bufumu pa numa fye ya kulongana kwa Ilyashi lya Cintubwingi e lyo no Ulupungu lwa kwa Kalinda pa bushiku bwa pa Mulungu. Mufwile ukucitapo cimo pa kutila tamuleenda intamfu iitali ukuya ku cifulo ca kushimikilamo. Kanshi nga papita inshita kangalila wa mulimo afwile ukushininkisha ukuti ififulo balekumaninapo ficili mupepi ne cifulo ca kubombelamo pa kutila icifulo cilebombelwamo bwino no kucipwisha conse.

⁵ Inshita isuma iya kukumana kwa mulimo wa mwi bala e lyo ne miku ya kukumana mu mulungu ikaba ukulingana ne fyo icifulo ca kushimikilamo caba. Amepusho yalakonkapo kuti yayafwa ukwishiba ukwa kukumanina ukusuma e lyo ne nshita iisuma iya kukumaninapo.

⁶ Cifulo nshi icifwile ukubombelwamo sana? Ni nshita nshi iisuma iya kubomba ku ng’anda ne ng’anda? Bushe bakasabankanya bafwile ukulabomba ku ng’anda ne ng’anda nelyo ukubwelelamo mu nshita ya cungulo? Amapekanyo yonse aya mu mulimo wa mwi bala yafwile ukuba pa cipapa ca fyebo. Kasabankanya onse alafwaya sana ukupwisha icifulo cakwe ica kubombelamo bwino bwino ica kutila na ifwe twalanda nga filya umutumwa Paulo alandile ukutila: ‘Nabulwa apa kubombela.’—Rom. 15:23.

7. Mulimo nshi uletungulula ibumba mu mulimo wa mwi bala akwata?

⁷ Ifya Kutungulula Ukukumana kwa Mulimo wa mwi Bala: Uletungulula uku kukumana kwa mulimo wa mwi bala akalanga ukuti nacindika uku kukumana uko Lesa abikako nga ca kuti apekanya bwino. Uku kukumana kufwile ukutendeka mu nshita kabili ukufwile ukuba ukwipi nalimo amaminiti 10 nelyo 15 kabili bamunyinefwe bafwile ukusambililako fimo. Uletungulula ukukumana afwile ukwishibila limo icifulo bali no kushimikilako. Nangu ca kutila tamulekabila ukulolela abacelelwe nga mwapwisha ukukumana kwa mulimo wa mwi bala, lelo kuti cawama ukusha ifyebo fya kwishibisha abacelelwe uko ibumba lilebombela. Nga mwapwisha fye ukukumana, ilyo line bonse bafwile ukutendekako ukuya ku cifulo muleya mu kushimikila. Abacilatungulula ukukumana nga bacipekanya bwino no kulanda ifyebo ifisuma ifikumine umulimo wa mwi bala, ukwabula no kutwishika bamunyinefwe bakabomba bwino mu butumikishi pali ubu bushiku.—Amapi. 11:14.

8. Bushe abalesangwa ku kukumana kwa mulimo wa mwi bala kuti babombela shani pamo na baletungulula?

⁸ Ukusangwa ku Kukumana kwa Mulimo wa mwi Bala: Ukubombela pamo kulafwaikwa. (Heb. 13:17) Nga ca kuti kwaba abashikwete aba kubomba nabo, uuletungulula ibumba afwile ukubafwaila aba kubomba nabo. Kuti cawama bakasabankanya abaishiba sana ukushimikila ukusangwako ku kukumana pa kuti babomba na bakasabankanya abapya e lyo na bashaishiba sana ukushimikila. Bonse abaitemenwa ukubomba na bamunyinefwe bambi cila nshita balasambililako ifingi. (Amapi. 27:17; Rom. 15:1, 2) Bonse bafwile ukubikako sana amano pa kuti belacelwa. Ukucindika ukukumana uko Lesa abikako kabili no kulangulukilako bakabomba banensu kukalenga twikalacelwa ku kukumana.—2 Kor. 6:3, 4; Fil. 2:4.

9. Finshi ifyacindama ifyo bapainiya bengacita pa kutungilila ukukumana kwa mulimo wa mwi bala?

⁹ Bapainiya Balatungilila Ukukumana: Bapainiya nga balesangwako ku kukumana kwa mulimo wa mwi bala cilawama sana kabili balakoselesha bonse abasangilweko. Ca cine balikwata ifya kucita ifingi pamo nga ukutungulula amasambililo ya Baibolo, ukubwelelako kubo bashimikile kabili balasakamana ne ndupwa shabo e lyo kabili balabomba ne ncito. E co kanshi bapainiya tabafwile ukulatontonkanya ukuti bafwile ukulasangwako ku kukumana kwa mulimo wa mwi bala konse uko icilonganino capekanya sana sana nga ca kutila uku kukumana kulabako cila bushiku. Lelo nangu cibe fyo, bafwile basangwako ku kukumana kumo kumo ukubako cila mulungu. Ukukumana kwa mulimo wa mwi bala kulatwafwa ukusambilila ifya kubomba umulimo kabili ukuba pamo na bapainiya kulatwafwa sana pantu balishiba ifingi pali Baibolo kabili balibelesha ukushimikila. Balashimikila bwino sana pantu balabomba mu mulimo libili libili. Na ifwe kuti twasambililako ku fyo baishiba. Ala tufwile ukupashanya aba bamunyinefwe pantu baliba abacincila ukushimikila kabili balasangwako sana ku kukumana kwa mulimo wa mwi bala. Na kabili tulatasha nga nshi ukufwa ifyo basukapo pali uku kukumana.

10. Mulandu nshi cacindamina ukuti bakasabankanya bonse aba mbila nsuma balesangwako ku kukumana kwa mulimo wa mwi bala no mutima wabo onse?

¹⁰ Nga fintu Yesu na basambi bakwe bacitile, na ifwe tulashimikila abantu abengi pa Bufumu lintu tushimikila ku ng’anda ne ng’anda. Ukukumana kwa mulimo wa mwi bala kwabelako ukutukoselesha e lyo no kutulanga ifya kubomba bwino uyu mulimo wa kushimikila. Bakasabankanya bonse aba mbila nsuma bafwile ukwesha na maka ukulasangwa kuli uku kukumana uko Lesa abikako. (Imil. 5:42; 20:20) Shi ifwe bonse lekeni tulesangwako kuli uku kukumana no mweo wesu onse. Nga ca kuti tulesangwako ku kukumana kwa mulimo wa mwi bala ukwabula no kutwishika Yehova akatupaala kabili tukalenga umutima wa Ntungulushi yesu, Yesu Kristu ukusekelela ilyo tuleshimikila imbila nsuma pa Bufumu bwa kwa Lesa.—Mat. 25:34-40; 28:19, 20.