Ifyo Isambililo lya Citabo pa Cilonganino Litwafwa
1. Bushe ukulongana kusano uko tukwata mu mulungu kutwafwa shani?
1 Ukulongana konse kusano uko tukwata mu mulungu kwalipusanapusana. Lelo konse kwalicindama pantu ‘kulatucincisha ku kutemwa kabili ku kubombe imilimo iisuma.’ (Heb. 10:24, 25) Isambililo lya Citabo pa Cilonganino lyaibela shani kabili busuma nshi bwabamo?
2. Busuma nshi bwaba mu kusangwa pe sambililo lya citabo?
2 Lilatwafwa Ukulunduluka mu Kupepa Lesa: Abantu abasangwa pe sambililo lya citabo balacepa ukucila abasangwa ku kulongana kumbi. Ici cilalenga twaishiba bwino sana abo tulongana nabo abengatukosha ilyo tulepepa Lesa. (Amapi. 18:24) Bushe mwalibikako amano ukwishiba bonse abo mulongana nabo pe sambililo lya citabo, nelyo ukubalomba ukutila mukabombe nabo mu mulimo wa mwi bala? Isambililo lya citabo na kabili lilalenga kangalila we sambililo lya citabo ukwishiba bwino umuntu umo na umo ne mibele yakwe no kumona ifyo engamwafwa.—Amapi. 27:23.
3. Bushe isambililo lya citabo lilenga shani abasambi ba Baibolo ukulalandapo e lyo no kulasangwako?
3 Bushe mwalitako umusambi wenu uwa Baibolo kwi sambililo lya citabo? Abafwaya ukusambilila Baibolo abatiina ukusangwa ku kulongana ukukalamba, nalimo kuti cabangukila ukusangwa ku kulongana ukuli fye abantu abanono, maka maka ukwa mu ng’anda. Pe sambililo lya citabo palaba ukulanshanya ukusuma ica kuti na baice kumo na bapya tabatiina ukulandapo. Na kabili pa mulandu wa kuti bantu fye abanono abasangwa pali uku kulongana, tulakwata ishuko lya kulandapo imiku iingi no kutasha Yehova.—Amalu. 111:1.
4. Bushe finshi fimbi ificitikila pa cifulo apabela isambililo lya citabo?
4 Amasambililo ya citabo lingi line yabela mupepi no kwikalila bakasabankanya. Nangu ca kutila te bantu bonse abo bengeba ukulasangwa kwi sambililo lya citabo ilyabela mupepi na kuntu bekala, ukusangwa kwi sambililo lya citabo ilyo batweba ukulayako nalimo te kuti tuleenda sana ukucila ifyo twenda pa kuya ku kulongana kumbi ukwashala. Ukukumana kwa kuya mu mulimo wa mwi bala kuti kwabela na pa cifulo ce sambililo lya citabo.
5. Bushe kangalila we sambililo lya citabo kuti atwafwa shani mu mulimo wa mwi bala?
5 Ukwafwa Bakasabankanya mu Mulimo wa mwi Bala: Kangalila we sambililo lya citabo alafwaya ukwafwa kasabankanya umo umo ukulabomba lyonse mu mulimo wa mwi bala, ukulashimikila bwino, no kutemwa umulimo. E ico, alabombesha ukulaya na kasabankanya onse uwaba mwi bumba lyakwe, ukumwafwa ukulabila imbila nsuma mu nshila shalekanalekana. Nga ca kutila mulesanga ubwafya mu kushimikila, tutile mu kucita ifipempu fya kubwelelamo, ebeni kangalila wenu uwe sambililo lya citabo. Napamo kuti aeba kasabankanya uwaishiba ukushimikila bwino uusangwa pe sambililo lyenu ilya citabo ukumwafwa mu mulimo. Mukalasambilisha bwino abasambi benu aba Baibolo nga mulemona ifyo kangalila we sambililo lya citabo asambilisha bwino ilyo aletungulula isambililo lya citabo.—1 Kor. 4:17.
6. Mulandu nshi twingafwaila ukunonkelamo nga nshi mwi sambililo lya citabo?
6 Ala mwandini tulanonkelamo nga nshi mwi Sambililo lya Citabo pa Cilonganino! Uku kulongana Yehova atantika kulatwafwa ukuba bakosa mu kumupepa muli shino nshita shayafya isho tuleikalamo.—Amalu. 26:12.