Umulandu Tukabila Isambililo lya Citabo pa Cilonganino
1. Bushe Isambililo lya Citabo pa Cilonganino lyatendeke shani?
1 Mu 1895, amabumba ya Basambi ba Baibolo (e fyo Inte sha kwa Yehova baleitwa kale) abalesambilila pamo yaleitwa ati Dawn Circles for Bible Study (e kutila ibumba linono ilya bantu abalelongana ku kusambilila Baibolo). Balesambilila ifitabo fyaleti Millennial Dawn. Pa numa uku kulongana kwaleitwa ati Berean Circles for Bible Study (e kutila Ukulongana kwe Bumba lya Bwina Berea Ukwa Kusambilila Baibolo). (Imilimo 17:11) Ilingi line ibumba lya bantu abanono lyalekumana mu ng’anda icungulo bushiku. Ifi e fyo Isambililo lya Citabo pa Cilonganino lyatendeke.
2. Bushe kuti twayafwilishako shani ukuti kube “ukukoseleshanya” pe sambililo lya citabo?
2 Ukukoselesha no Kwafwilisha: Apo abalelongana pe sambililo lya citabo bafwile ukuba abanono, abasangwapo balakwata sana ishuko lya kulanda ifyo batetekela. Icitumbukamo ca kutila kulaba “ukukoseleshanya . . . , umo umo ku citetekelo ca mubiye.”—Roma 1:12.
3, 4. Bushe isambililo lya citabo litwafwa shani ukubomba umulimo wesu uwa kushimikila?
3 Ukumona imisambilishishe ya kwa kangalila we sambililo lya citabo kuti kwatwafwa ‘ukulungika bwino icebo ca cine.’ (2 Tim. 2:15) Moneni ifyo akomaila pa Malembo umufumine ifilesambililwa. Nga calinga, ukulingana no lupapulo mulesambilila, kuti akomaila pa fishinka fikalamba pa kupitulukamo lilya mulepwa isambililo ukubomfya fye Baibolo. Imisambilishishe yakwe iisuma kuti yatwafwilisha ukuwamyako imisambilishishe yesu mu mulimo wa Bwina Kristu uwa kushimikila—1 Kor. 11:1.
4 Cimbi ico kangalila we sambililo lya citabo acita pamo no kutungulula isambililo lya cila mulungu, kutungulula mu mulimo wa kushimikila. Alabombela pamo na kangalila wa mulimo ku kuteyanya bwino umulimo wa kushimikila. Alafwaya ukwafwilisha bonse mwi bumba angalila ukubomba umulimo wabo uwa Bwina Kristu uwa kubila imbila nsuma no kupanga abasambi.—Mat. 28:19, 20; 1 Kor. 9:16.
5. Kwafwa nshi ku muntu umo umo ukwabako pe sambililo lya citabo?
5 Kangalila we sambililo lya citabo alabika amano kuli bumupashi bwa bonse ababa mwi bumba angalila. Alanga ukuti alibabikako amano pa kulongana kwa cilonganino na lintu alebomba na bambi mu mulimo wa kushimikila. Kabili ilyo atandalila bamunyina ku mwabo alabakoselesha lwa ku mupashi. Bonse bafwile ukwangukililwa ukuya kuli kangalila we sambililo lya citabo ku kwafwiwa lwa ku mupashi lyonse ilyo bamona ukuti balekabila ukwafwiwa.—Esa. 32:1, 2.
6. (a) Bushe bamunyinefwe mu fyalo fimo bakoshiwa shani pa kulongana mu mabumba yanono? (b) Bushe imwe mwamwenamo shani mwi sambililo lya citabo?
6 Koshanyeni: Mu fyalo umo umulimo wa bantu ba kwa Lesa wabindwa, bamunyinefwe ilingi line bakumanina mu mabumba ayanono. Munyinefwe umo aibukishe ukutila: “Nangu ca kuti imilimo yesu iya Bwina Kristu yalibindilwe, ifintu nga fili bwino twalelongana cila mulungu kabili kwalesangwa abantu 10 ukufika ku 15. Pa kulongana twalekoshiwa lwa ku mupashi. Icaletukosha kusambilila Baibolo no kubishanya pa numa ya kusambilila. Twaleshimikilana no kulinganya ifyatucitikile, kabili ici catwafwile ukumona ukuti kanshi bonse twalelwa ubulwi bumo bwine.” (1 Pet 5:9) Na ifwe natukoshanye pa kutungilila Isambililo lya Citabo pa Cilonganino.—Efe. 4:16.