Ifyo Bakangalila ba Masambililo ya Citabo Balanga Ukuti Balitemwa Bambi
1 Isambililo lya Citabo pa Cilonganino lyateyanishiwa ukuti kuleba “ukusakamana kwafulilako ukupeelwa ku kukula kwa ku mupashi ku muntu umo na umo. . . . Pano e pabo kubelebesha kwa cikuku ca kutemwa ica kwa Yehova no kusakamana kwakwe kwabondoka ukwa bantu bakwe.” (om-CW ibu. 75; Esa. 40:11) Kangalila we sambililo lya citabo abomba umulimo uukalamba ku kusakamana bambi muli uyo musango.
2 Pe Sambililo lya Citabo: Apo ukuteyanya kwaba kwa kuti abasangwa pa masambililo ya citabo baleba abanono, kangalila we sambililo lya citabo aleshiba bwino ababa mwi bumba lyakwe. (Amapi. 27:23) Ilingi line kulaba inshila ishingi isha kubishanishishamo cila mulungu ilyo isambililo lishilatendeka na lintu lyapwa. Pa kuti umweshi upwe, nalimo kuti alanda na onse uwaba mwi bumba. Ici cilafwa ababa pe sambililo lya citabo ukuyumfwa abayangukililwa ukuya kuli wene ilyo bali na mesho nelyo ilyo balekabila ukukoseleshiwa.—Esa. 32:2.
3 Kangalila we sambililo lya citabo alesha ukukoselesha bonse mwi bumba lyakwe ukwasukapo pe sambililo. Inshila imo iyo abakoseleseshamo ukwasukapo kuba ne cikuku, no kunakilila pa kutungulula. (1 Tes. 2:7, 8) Alafwaya inshila sha kuti bonse bayasukapo ilyo balelanshanya, kumo na bacaice. Nga ca kuti bamo balomfwa umwenso wa kwasukapo, kuti abafwa beka ukupitila mu kubebela libela ukwisabelengako ilembo nelyo ukwasuka muli paragrafu imo. Nelyo kuti abalanga ifya kwasuka mu mashiwi yabo.
4 Nga ca kuti kaafwa wa kwa kangalila we sambililo lya citabo mubomfi utumikila, kangalila alateyanya ukuti aletungululako isambililo umuku umo pa numa ya myeshi ibili. Ukucite fi kulenga kangalila ukuceeceeta kaafwa wakwe no kumweba imitubululo ingamwafwa. Mwandi kuteyanya kusuma ukwa kwafwa bamunyinefwe ukuwamya amaka yabo aya kusambilisha!—Tito 1:9.
5 Mu Butumikishi bwa mwi Bala: Umulimo umo uukalamba uwa kwa kangalila we sambililo lya citabo kutungulula umulimo wa kushimikila. (Impe. 27:16, 17) Alateyanya bwino ukuti kuleba ukushimikila abengi kabili alabombesha ukwafwa bonse aba mwi bumba lyakwe ukuba ne nsansa mu butumikishi bwabo. (Efes. 4:11, 12) Pa kufishapo ici, alemika ubuyo bwa kuti alebombako umulimo na cila muntu uwaba mwi bumba lyakwe. Kabili abombela pamo na kangalila wa mulimo pa kuteyanya ukuti abalefwaya ukuwamya imbali shimo isha butumikishi baafwiwa kuli kasabankanya uwabelesha sana.
6 Nga Kacema wa Kutemwa: Kangalila we sambililo lya citabo alasakamana na balya ababombako umulimo wa kushimikila inshita inono ukulingana ne fyo ifintu fili kuli bena. Alamona ukuti balya abapelebela pa mulandu wa mushinku nelyo abashifumina pa nse na balya abapelebelako panono ku mulandu wa kulwala kwabipisha nelyo ukucenwa, baishiba ukuti kwaliba ukuteyanya kwa kuti baletuma lipoti wa mulimo wa mwi bala mu maminiti 15 nga ca kuti te kuti bafishe iawala mu mweshi. (Komiti wa Mulimo pa Cilonganino eusuminisha uulingile ukumwenamo muli uku kuteyanya.) Na kabili alafwaya ukwafwa abanaka ababa mwi bumba lyakwe, alabombesha ukubafwa pa kuti bengatendeka na kabili umulimo wabo ne cilonganino.—Luka 15:4-7.
7 Mwandi tulatasha pa kutemwa kwa cine uko bakangalila we sambililo lya citabo balanga! Ukwangwako kwabo kulafwa “bonse [ukufika] kuli buumo bwa kutetekela . . . , ku mulingo wa mushinku wa mwisulo wa kwa Kristu.”—Efes. 4:13.