Afweni Kangalila Wenu Uwe Sambililo lya Citabo pa Cilonganino

¹ Ifwe umo umo tulanonkelamo nga nshi mwi Sambililo lya Citabo pa Cilonganino. Uyu mweshi wapwile, twalanshenye pa fyo kangalila we Sambililo lya Citabo pa Cilonganino abomba umulimo wakwe. Lelo cinshi twingacita pa kumwafwa pa kuti tunonkelemo no kunonsha bambi?

² Sangweniko Cila Mulungu: Apo amabumba ye sambililo lya citabo yaba ayanono, calicindama ukuti mulesangwako. Imikeni ubuyo bwa kusangwako cila mulungu. Na kabili kuti mwayafwilishako nga mulefika mu nshita, pantu ici cilaafwa kangalila ukutampa ukulongana mu nshita yaimikwa.—1 Kor. 14:40.

³ Ifyasuko Fikuulilila: Inshila imbi mwingaafwilamo yaba kupekanya bwino no kwasukapo ifyasuko fya kukuulilila. Ifyasuko fisuma ni filya filanda pa cishinka fye cimo, ne ci cilakoselesha bambi ukwasukapo. Mwilaesha ukulanda pali fyonse fye muli paragrafu. Nga ca kuti icishinka cimo camufika pa mutima, sangwileniko ku kulanshanya ukupitila mu kulandapo pali ico.—1 Pet. 4:10.

⁴ Nga muli ne shuko lya kubelenga amaparagrafu pa kuti ibumba limwenemo, cincileni mu kubomba uyo mulimo. Ukubelenga kusuma na ko kulalenga isambililo ukuwama.—1 Tim. 4:13.

⁵ Ubunte bwe Bumba: Mu mabumba aya masambililo ya citabo ayengi kulaba ukukumana kwa kuya mu mulimo wa mwi bala, kabili nga muletungilila uku kupekanya cilafwilishako kangalila ilyo aletungulula mu mulimo wa kushimikila. Mulemona uku kutantika nge shuko lya kupalama kuli bamunyinenwe no kubakoselesha.

⁶ Amalipoti ya mu Mulimo wa mwi Bala: Ukuleta bwangu amalipoti yenu aya mu mulimo wa mwi bala pa mpela ya mweshi umo na umo ni nshila na imbi mwingafwilamo kangalila wenu. Kuti mwamupeela lipoti wenu mu kulungatika nelyo ukupoosa mu kabokoshi ka malipoti aka mu Ng’anda ya Bufumu. Kalemba kuti abomfya ako kabokoshi ku kulonganikilamo amalipoti ya mwi bala ayafuma kuli bakangalila ba masambililo ya citabo.

⁷ Ukubombela pamo na kangalila we Sambililo lya Citabo pa Cilonganino kukatashiwa nga nshi. Kabili, mwishibe ukuti Yehova ‘akaba no mutima wenu.’—Fil. 4:23.