Ukushimikila nge Bumba Kulaleta Insansa
1 Ilyo Yesu atumine abasambi 70 ukuya mu kushimikila, abafundile ifya kuyalanda, abaakenye babili babili, no kubapeela ukwa kuyabombela. Ici e calengele ukuti basekelele. (Luka 10:1-17) Na pali lelo, ukushimikila nge bumba kulapangasha, kulateyanya, kabili kulakoselesha abantu ba kwa Lesa mu mulimo wa kushimikila.
2 Baeluda E Batungulula: Baeluda balabomba umulimo wacindama mu kwafwilisha bonse ukuba aba lyonse mu kushimikila. Kangalila wa mulimo e utungulula mu kupekanya umulimo wa mu kati ka mulungu. Kangalila we sambililo lya citabo umo umo e washingamwa mu kuteyanya imibombele ye bumba lyakwe, ukucilisha pa mpela ya mulungu. Inshita shimo shimo nga ca kuti icilonganino cakumana pamo ku kuya mu mulimo wa mwi bala, tutile pa numa ye Sambililo lya Ulupungu lwa kwa Kalinda, kangalila we sambililo lya citabo umo umo afwile ukusakamana ibumba lyakwe.
3 “Busaka Busaka Kabili mu Kukonkana”: Uupeelwe ukutungulula ukukumana kwa mulimo wa mwi bala afwile ukutendeka ilyo fye inshita yakumana no kukanacila mu maminiti 10 nelyo 15. Icawamisha ukucita kupekanishisha limo amabumba ya baleya mu kushimikila no kubakanishisha kabela ukwa kuyabombela ilyo mushilapepa ipepo lya kusondwelela (kano nga ca kuti bakangalila ba masambililo ya fitabo bapangile limo ukusakamana fi, nge fyo cilandilwepo kale). Ukucite ci kuti kwacefyako kubungana mu cifulo ca kubombelamo, ne ci kuti calenga umulimo wesu ukumoneka uushacindama. Kabili cileumfwana no kufunda kwa kwa Paulo ukutila: “Fyonse ficitwe busaka busaka kabili mu kukonkana.” (1Kor. 14:40) Bonse abasangwako kuli uku kukumana bafwile ukusangwilako ku kutunguluka kwa kukumana pa kufika ilyo inshita tailakumana, ukukonka ubutungulushi bwa uuletungulula, no kuya mu cifulo ca kubombelamo ilyo line fye ukukumana kwapwa.
4 Ukwikatana Pamo: Ukushimikila nge bumba kutupeela amashuko ya kwishiba bambi mu cilonganino. Nangu ca kuti caba fye bwino ukupanganina limo no wa kubomba nankwe, kuti caba bwino no kusangwa fye ku kukumana kwa mulimo wa mwi bala ukwabula ukupanganina limo no uli onse. Limbi kuti batupeela uwa kubomba nankwe uo tushaishiba bwino, ne ci kuti catulenga ‘ukukushe mitima’ mu kutemwa.—2 Kor. 6:11-13.
5 Ukushimikila nge bumba kulatukoselesha kabili kulatwikatanya pamo nga ‘babomfi babombela pamo mu cine.’ (3 Yoh. 8) Shi tulebombako mu kushimikila kwe bumba!