Muleafwana Ukubomba Lyonse

¹ Bushe namwishiba ukuti nga ca kuti bakasabankanya bonse mu Zambia batumine lipoti mu mweshi umo umo, kuti kwaba bakasabankanya ba mbila nsuma ukucila pali 137,000? E ico, cinshi cilefwaikwa kuli ifwe? Ukucita lipoti cila mweshi calicindama kabili, e cingaafwa. Pangeni ukupwisha uno mwaka wa mulimo ninshi muli abapimpa nga nshi mu mulimo wa kwa Yehova ukupitila mu kuba bakasabankanya ba lyonse. Cine cine, umulimo wa mwi sonde lyonse uwa bantu ba kwa Lesa ulelunduluka mu mbali shonse, kabili uku kulunduluka kutucinkulako pa mashiwi ya kusesema pa Mfumu ya kwa Yehova ayatila: “Ku kukula kwa bukateka bwakwe, na ku mutende, takwakabe mpela.”—Esa. 9:7.

² Ubushinino ubulangilila kuti kuti kwaba ukufulilako ukwa bakasabankanya mu Zambia, bumonwa ku bantu basangwa ku Mulalilo wa kwa Shikulu na ku mabungano. E ico, ino ni nshita ya kutontomesha pa kukalakasha umulimo wa Bufumu. Nga twapoosa mano ku kubombako lyonse, no kuba “abacincila pe mu mulimo wa kwa Shikulu,” tukaba “abashangila” kabili “abashitelententa” mu citetekelo cesu. Lyena, tukaafwa bambi aba manshintula nelyo abaleka ukushimikila. Tufwile ukuba abashininwa ukuti ‘ukucucutika kwesu te kwa fye muli Shikulu.’—2 Tes. 3:1; 1 Kor. 15:58.

³ Apo kalemba afwile ukutuma lipoti wa cilonganino cila mweshi ilyo ubushiku bwa 6 bushilafika, nacicindama nga nshi ukuti ifwe bonse tulecita lipoti umulimo wa mwi bala bwangu bwangu pa mpela ya mweshi onse. Ici e cilenga lipoti pa fyacitilwe mwi bala ukuba uwalungika. E ico bushe mukabomba ulubali lwenu pa kucita lipoti bwangu cila mweshi?