Ukushimikila Bwino Abantu Abasangwa mu Fifulo fya Cintubwingi
1. Ni shani Abena Kristu muno nshiku baleshimikila abantu abasangwa mu fifulo fya cintubwingi nga filya Abena Kristu ba ntanshi balecita, kabili finshi filetumbukamo?
1 Abena Kristu ba muno nshiku bafwaya ukubila imbila nsuma ku bantu konse fye uko bengasangwa, nga filya abasambi ba kwa Yesu aba ntanshi balecita. (Imil. 16:13; 17:17; 20:20, 21) Pa mulandu wa kufwaisha ukushimikila abantu basangwa mu fifulo fya cintubwingi, Abena Kristu balesanga abantu abalesekelela abashingasangwa pa mayanda ilyo baleshimikila ku ng’anda ne ng’anda.
2. Cinshi tufwile ukubela abacenjela ilyo tuleshimikila abantu basangwa mu fifulo fya cintubwingi, kabili kuti twacita shani pa kuti kube umuyano?
2 Ilyo tuleshimikila mu fifulo fya cintubwingi tufwile ukucenjela. Ilingi line cilawama ukukanamoneka sana ku cintubwingi ukuti tuleshimikila. Ku ca kumwenako, nga ca kutila bakasabankanya abengi baleshimikila abantu mu ncende imo ine nelyo baletandalila icifulo ca makwebo pa nshita imo ine, abantu bamo bamo kuti cabapesha amano pa kutumona. Kuti calenga umulimo wesu ukukanacindikwa kabili te kuti tushimikile bwino. Bushe cinshi cingacitwa pa kuti ica musango yu ciicitika? Icaafwa ifilonganino fimo fimo ifyakwata ififulo ifingi ukusangwa abantu sana kwakanya bwino bwino ifyo fifulo. (1 Kor.14:40) Kabili, na ifwe bene kuti twalenga kwaba umuyano nga tulebombela fye mu cifulo capeelwa ku cilonganino cesu, kano fye nga ca kutila Komiti wa Mulimo uwa Cilonganino ateyanya ukuti twafweko icilonganino cimbi, e lyo twingabombela mu cifulo ca cilonganino cimbi.—Moneni Ubutumikishi Bwesu Ubwa Bufumu ubwa November 1998, ibula 6, para. 18 na 19.
3. Bushe bamo bacita shani pa kuti bashimikile bwino abantu bali mu cintubwingi?
3 Ukulanda na Bantu: Ilyo Yesu alandile no mwanakashi pa cishima, atendeke fye na mashiwi yanono e lyo aya alelundulule lyashi ilyo amwene ukutila umwanakashi alesekelela. (Yoh. 4:7-26) Na muno nshiku, ukucite fi kulabomba mu kulanshanya kumo kumo. Bakasabankanya bamo bamo basanga ukutila nga balefwaya ukushimikila bwino abantu mu cintubwingi, cisuma ukutala baposhanya na bantu no kubalanga ukuti nababapoosako amano ilyo bashilabeba ubukombe bwa Bufumu. Balanda pa cintu ico abengi batemwa ukulandapo kuli iyo ncende, na po pene e pafuma ilyashi. Ilyo bambi baleilishanya, balakutikisha. Ukwabula no kupoose nshita, basanga fye balesansamusha abantu ku Cebo ca kwa Lesa.—Rom. 15:4.
4. Kuti twacita shani pa kuti umuntu atwalilile ukukutika ku bukombe bwa Bufumu?
4 Ukulundulula Ukufwaisha kwa Balesekelela: Lyonse nga twalanshanya bwino no muntu, tufwile ukulenga atwalilila ukukutika ubukombe bwa Bufumu. Kuti twacita shani ico? Ilyo mulefika ku mpela ya kulanshanya, kuti mwabula akabuuku mulembamo no kutila: “Natemwa sana ifyo twalanshanya. Bushe kuti twacita shani pa kuti tukalanshanye na kabili?” Nelyo kuti mwatila: “Ndefwaya mukabelengeko fimo ifisuma nga nshi. Bushe nkamuletele ku ng’anda ku mwenu nelyo ku ofesi?” Bakasabankanya bamo bamo bepusha fye abati: “Bushe nga ndefwaya ukumutumina foni ni namba nshi ningabomfya?” Nga mwacite fi, ilingi line abantu balasumina ukuti mukabweleleko.
5. Buyo nshi tufwile ukukwata ilyo tuleshimikila abantu mu fifulo fya cinabwingi?
5 Abantu abengi abashimikilwe pa kubala ilyo bali pa cifulo ca cintubwingi, balisumina ukusambilila Baibolo. Uko mwingasambilila na bantu ba musango yu ni pa ng’anda pa mwabo, pa ncito, apengalinga mu cifulo ca cintubwingi, nelyo pa foni. Lekeni tube no buyo bwa kutendeka amasambililo ya Baibolo ilyo tuleshimikila abantu basangwa mu fifulo fya cintubwingi.