Ifyo Twingacita pa Kuti Tubombe Bwino Ubunte bwa mu Musebo
1. Ni nshila nshi imo twingapashanishishamo Yesu?
1 Ilyo Yesu aleshimikila pano isonde, taleshingashinga ukulanda na bantu alekumanya mu musebo na mu fifulo fimbi umwalesangwa abantu. (Luka 9:57-61; Yoh. 4:7) Alefwaya ukweba abantu abengi ubukombe bwacindamisha ubo akwete. Na lelo line ubunte bwa mu musebo bwalicindama sana pantu bulafwa abantu ukwishiba amano ya kwa Lesa. (Amapi. 1:20) Nga tulebalilapo ukusosha abantu e lyo no kulailuka pa kubashimikila ninshi kuti twabomba bwino ubunte bwa mu musebo.
2. Bushe ukubalilapo ukusosha abantu kuti kwatwafwa shani ukubomba bwino ubunte bwa mu musebo?
2 Mulebalilapo: Ilingi line cilaba bwino ukukonkela abantu no kubalilapo ukulanshanya nabo ukucila ukwiminina nelyo ukwikala fye pa ncende imo ukulalolela ati abapita nshila bamisoshe. Mulemwentula, mulebalolesha, kabili muleba abatekanya, kwati mulelanda fye na cibusa. Nga ca kuti mulebomba na bakasabankanya bambi, te kuti ciwame bonse ukulashimikila fye umuntu umo, lelo cila kasabankanya afwile ukulalanda no muntu umo. E lyo mulingile no kubwelela ku bantu mwashimikiile abalefwaya ukusambilila. Nga cili fye bwino, pa numa ya kulanshanya, mucinshi mucinshi kuti mwabepusha uko mwingabasanga pa kuti mukalanshanye nabo na kabili. Bakasabankanya bamo balabomba ubunte bwa mu musebo pa cifulo cimo cine, kabili ici cilenga baleshimikila ku bantu bamo bene imiku ne miku pa kuti batwalilile ukubafwa ukulatemwa icine.
3. Kuti twabomfya shani ukwiluka ilyo tulecita ubunte bwa mu musebo?
3 Muleiluka: Ilyo muleshimikila mu musebo, ishibeni bwino bwino apa kwiminina e lyo na bakulanda nabo. Te kutila mulingile ukulanda fye na onse uulepita mu nshila. Mulepoosa amano ku bantu. Ku ca kumwenako, umuntu nga napamfiwa, kuti cawama ukumuleka fye apita. Nga muleshimikila pa cifulo ca makwebo, mulingile ukucenjela pa kuti abene ba makwebo besakamana. Ilingi line cilawama ukushimikila abantu ilyo balefuma pa cifulo ca makwebo, ukucila lilya baleisa. Pa kulanshanya nabo, te kwesha ukulanda kwati mulebatiinya. Kabili, muleiluka pa kuti mwishibe abo mulingile ukushiila impapulo. Nga balemoneka kwati tabalefwaya ukumfwa icebo, kuti cawama ukubashiila trakiti ukucila magazini.
4. Bushe ubunte bwa mu musebo butwafwa shani kabili cinshi bwawamina?
4 Ubunte bwa mu musebo bulalenga tulesalanganya imbuto sha cine ca mu Baibolo mu nshita fye iinono. (Luk. Mil. 11:6) Abantu bamo abo tukumanya ni balya aba kuti tabasangwa na pa mayanda nga tuleshimikila ku ng’anda ne ng’anda. Bushe na imwe te kuti mupekanye ukubombako ubunte bwa mu musebo? Ala mwandini iyi nshila ya kushimikililamo na yo ine isuma nga nshi!