Ukusanga Abalesekelela Ukupitila mu Bunte bwa mu Musebo Ubufumamo Cimo
1 Yesu akambishe abasambi bakwe ukufwayamo abawaminwa ukumfwa imbila nsuma ya Bufumu. (Mat. 10:11) Lelo, mu ncende ishingi ilelo, cileba icakoselako nga nshi ukusanga abantu pa mayanda yabo. E co, cinshi cingacitwa pa kufika pa bayana abo pambi bashingasangwa?
2 Ubunte bwa mu musebo kuti bwaba ni nshila yafumamo cimo iya kusanga abantu abashingasangwa mu mulimo wa ku ŋanda ne ŋanda. Kuti twacito bunte bwa mu musebo pa fitesheni fya basi, mupepi ne fikuulwa balonda mu kusakamanishisha nga nshi, mu maparka ya cintubwingi, na mu fifulo fimbi umo abantu basangwa mu mibombele yabo iya cila bushiku.
3 Lintu ubunte bwa mu musebo bwalumbulwa, bamo balayumfwa aba mwenso. Kuti pambi baba abashimunuka ukwakana muli uyo mulimo pa mulandu wa kuti balomfwe nsoni nelyo balenekela ukusasukilwa na bantu abapata ubukombe bwa Bufumu. Uyu mwenso ilingi line tawaba ne shinte. Abo ababelesha muli iyi mibombele bacita lipoti ukuti wayafya cimo cine ngo bunte bwa ku ŋanda ne ŋanda. Na kuba, basango kuti abantu abengi balibelela ukutununukwa pa musebo pa milandu yalekanalekana, kabili bamo kuti pambi baba abakongamina nga nshi ku kulanshanya nelyo ukukutika ukucila fintu bengaba nga ca kuti twakonkonseshe pa ciibi cabo. E co nga ca kuti ‘twapama,’ kuti pambi twasunguka ku fya kufumamo fishaiwamina.—1 Tes. 2:2.
4 Ni shani fintu umulimo wa pa musebo wingacitwa mu kufumamo cimo kwacilapo? Caliba icacindama ukupekanya bwino. Belenga bamagazini mu kubangilila, kabili soobolapo icishinka ca kulanshanyapo cimo nelyo fibili ifyo uleyumfwa ifyo fikasekesha abantu wakumanya. Imipeelele ya masekondi 30 ili iyalinga. Apantu ubuyo buli kulanda na bambi, sala icifulo uko impendwa ikalamba iya bantu bapita lyonse. Nangu cingati kuti cawamo kukwata kasabankanya umbi ukuba lwa mupepi, ilingi line calicilishapo kuwama ukubomba pale pale. Bakasabankanya abeminine capamo kuti pambi baba abakongamina ku kupoosa inshita ukulanshanya umo no munankwe kabili ukukanaba abasakamana pa lwa cintubwingi abengakongamina ku kukutika ubukombe bwa Bufumu.
5 Ukwiminina pa ncende imo no kulangisha fye bamagazini takwaba ukwa kufumamo cimo ngo kubuula ukuitendekelako ukutununuka abantu. Esha ukucebushako bamo. Ba uwa cikabilila, uwa bucibusa, kabili uwa kulungatika ilyo uletukuta ukutampa ukulanshanya. Mu milandu imo, kuti pambi wakabila ukwendako intampulo shinono capamo no muntu ilintu ulelanda na wene. Nga ca kuti aali uwa kwankulako, tambika bamagazini. Nga ca kuti bamagazini bakaanwa, kuti pambi wafwaya ukutambika trakiti.
6 Ilingi line calicilishapo kuwama ukupekanya imipeelele iipi iyo imya icipusho nelyo iiletako ubulondoloshi ubo bwimya ubuseko. Nga ca kuti kuliko ukwankulako kwawama, esha ukupoka ishina lya muntu, adresi, kabili nelyo fye ni nambala ya lamya pa kuti wingakonkelela ubuseko. Kuti pambi watila: “Nga mwingatemwa ukusambilila ifyafulilako, kuti naba uwa nsansa ukumutandalila ku ŋanda ku mwenu nelyo ukumutantikila Nte umbi ukucite co.”
7 Eluda uwaibimbile mu bunte bwa mu musebo atununwike umwanakashi kabili aishilesango ukuti tabalile akwatapo akashita ka kulanda ne Nte ku ŋanda ku mwakwe. Alipokelele icitabo no kusumina ukukwata nkashi ukumutandalila mu ŋanda mu mwakwe pa nshita yalinga. Abayana abengi mu kushininkisha kuti basangwa no kwafwilishiwa nga ca kuti tuli aba kufumamo cimo mu bunte bwa mu musebo.—Imil. 17:17.