Bushe Kuti Mwayalula Inshita Mubomba mwi Bala?
1. Mulandu nshi twingalwila inshita ya kushimikila abantu?
1 Fwe Bena Kristu ba cine, twalisumina ukuba “abalondo ba bantu.” (Mat. 4:19) Nga filya fine abalondo ba cine cine baba, tukabomba bwino uyu mulimo nga ca kutila twaishiba inshita ya kushimikila abantu ilyo bengasangwa pa mayanda. Abantu abengi baba pa mayanda icungulo kasuba ne cungulo bushiku. Ilingi line tababa ne milimo ya kubomba kabili balatemwa ukupokelela abeni. Bushe kuti mwayalula inshita ya kubomba pa kuti mushimikile abantu pali iyo nshita?—1 Kor. 9:23.
2. Ni nshila nshi shimo shimo ishingabomba pa kuti tubile imbila nsuma ku bantu abengi?
2 Ubunte bwa mu Cungulo: Ukutantikila libela inshita ya kushimikila abantu mu cungulo kuti kwalenga twashimikila abantu bengi. (Amapi. 21:5) Imisepela kuti baya mu kushimikila nga bainuka ku sukulu. Bambi kuti bashimikila nga bainuka ku ncito. Ibumba lya basangwa pe sambililo lya citabo limo line kuti batantika ukuti baleshimikilako iwala limo ilyo tabalatendeka isambililo lya citabo ilya cila mulungu.
3. Bushe kuti mwashimikila shani abantu icungulo kasuba nelyo icungulo bushiku mu cifulo cenu?
3 Ukushimikila ku ng’anda ne ng’anda icungulo kasuba ne cungulo bushiku kuti kwalenga twalanda na bantu abo tushisanga pa mayanda. Mu fifulo ifingi, ubunte bwa mu musebo no bunte bwa ku cintubwingi bumbi kuti bwacitwa icungulo. Kabili abengi balitemwa ukucite fipempu fya kubwelelamo no kutendeka amasambililo ya Baibolo pali iyi nshita.
4. Cinshi cacindamina ukuba abacenjela no kulangulukila abantu ilyo mulebashimikila icungulo?
4 Mufwile Ukucenjela: Mufwile ukucenjela ilyo muleshimikila abantu icungulo. Ilingi line cisuma ukushimikila ilyo takulafiita sana ukucila ukuya pa mayanda ya bantu ilyo bali mupepi no kuya ku kusendama. (Fil. 4:5) Nga mwakonkonsha ku ciibi, iminineni apo bengamumona, kabili muishibishe mwe bene. Ukwabula no kuposa inshita landeni ico mwendeele. Nga ca kutila mwafika pa ng’anda pa nshita ishilingile, tutile limbi balelya, kuti mwabeba ukuti mukeesako limbi. Lyonse mufwile ukuba abalangulukila.—Mat. 7:12.
5. Bushe kuti twacita shani pa kuti twisanswa ilyo tuleshimikila?
5 Tufwile no kwishiba ukuti kuti twasanswa. Nga ca kutila muleshimikila ilyo palefiita nelyo cilya fye pafiita, cisuma ukwenda babili babili nelyo mu mabumba mabumba. Muleenda fye mu misebo umuli ulubuuto lusuma. Muleshimikila fye mu fifulo umo bashingamusansa. Mwilashimikila mu fifulo mwafiita umo bengamusansa.—Amapi. 22:3.
6. Busuma nshi bumbi ubwaba mu kushimikila abantu icungulo kasuba ne cungulo bushiku?
6 Ukushimikila abantu icungulo kasuba ne cungulo bushiku kuti kwalenga twabombako na bapainiya ba kwafwilisha na ba nshita yonse. (Rom. 1:12) Bushe kuti mwayalula inshita mubomba mwi bala pa kuti mubombeko uyu mulimo wa kushimikila abantu icungulo?