Ilyo Muleshimikila Mulebomfya Bwino Inshita
Mu mwaka wa mulimo uwa 2014, Inte sha kwa Yehova babombele ama-awala 1,945,487,604. Ici cilelanga fye ukuti tulebombesha mu mulimo wa kwa Yehova! (Amalu. 110:3; 1 Kor. 15:58) Ilyo tuli mu mulimo wa mwi bala, bushe kuti twabomfya shani inshita yesu ukushimikila abantu abengi apo “inshita iisheleko naicepa”?—1 Kor. 7:29.
Pa kuti tulebomfya bwino inshita ilyo tuli mu mulimo wa mwi bala tulingile ukulayaluka. Ku ca kumwenako, nga ca kuti inshila mubomfya ilyo muleshimikila ilalenga mulepoosa inshita iikalamba ukwabula ukulandapo no muntu nangu umo, bushe te kuti mwalule inshila mubomfya pa kuti mulelanda na bantu abengi? Kwena ififulo tushimikilamo fyalipusanapusana. Na lyo line, ifi twalalandapo kuti fyamwafwa ukubomfya bwino inshita pa kuti ‘tamuleuma umwela.’—1 Kor. 9:26.
Ukushimikila ku Ng’anda ne Ng’anda: Pa myaka iingi, bakasabankanya balitemwa ukubalilapo ukushimikila ku ng’anda ne ng’anda ilyo baya mu mulimo wa mwi bala. Na lyo line, apo abantu abengi babomba akasuba kanshi kuti cawama ukushimikila ku ng’anda ne ng’anda icungulo ilyo abantu abengi baba pa mayanda baletuusha. Kanshi mu nshita ya kasuba kuti twashimikila mu misebo nelyo mu fifulo fya makwebo pa kuti tulelanda na bantu abengi.
Ukushimikila ku Cintubwingi: Mulingile ukubika amatebulo no twakubikapo impapulo utwa mawilo mu fifulo umupita sana abantu mu cifulo icilonganino cenu capeelwa ukushimikilamo. (Moneni Ubutumikishi Bwesu Ubwa Bufumu, ubwa September 2013 amabu.4, 5.) Nga ca kuti abantu baleka ukupita sana apo mubika itebulo lyenu, Komiti ya Mulimo iya Cilonganino ifwile ukusanga icifulo cimbi ukupita sana abantu.
Ifipempu fya Kubwelelamo na Masambililo ya Baibolo: Kuti mwatantika ukulaya ku fipempu fya kubwelelamo na ku masambililo ya Baibolo pa nshita ilyo ukubomfya inshila shimbi isha kushimikililamo kushibomba bwino. Ku ca kumwenako, nga ca kutila abantu abengi balasangwa pa mayanda ilyo muleshimikila ku ng’anda ne ng’anda pa Cibelushi ulucelo, kuti mwatantika ukulatungulula amasambililo ya Baibolo mu nshita ya kasuba nelyo icungulo.
Nangu ca kuti tulapenda ama-awala ilyo tuli mu mulimo wa mwi bala, icilenga tuleba ne nsansa sana kushimikila ku bantu abengi. Nga mwamona ukuti inshila imo iya kushimikililamo taibomba bwino pa nshita shimo kuti mwaeshako inshila imbi. Pepeni kuli Yehova “Umwine wa mulimo wa kulobolola,” ukuti amwafwe ukubomfya bwino inshita ilyo muleshimikila!—Mat. 9:38.