Bomfyeni Bwino Inshita Yenu
1 Cila mulungu bonse tukwata fye inshita imo ine. Inshita tubomfya mu kushimikila imbila nsuma e yacindamisha sana pantu e nshita tubomfya mu mulimo wa kupususha abantu. (Rom. 1:16) Tulangisha ukuti tulatesekeshe ci ukupitila mu kupekanishisha bwino ifya mu mulimo, ukubangila ukufika ku kukumana kwa mulimo wa mwi bala, no kwangufyanya ukuya ukwa kubombela. Tufwile ukulashimikila ukucila ukulashingashinga pa kukumana kwa mulimo wa mwi bala. Apantu Yehova alitusambilisha ati “ku cintu conse kwabe nshita iyalingwa,” tufwile ukubomfya bwino nga nshi inshita tupaatulako ukubomba ubutumikishi.—Luk. Mil. 3:1.
2 Akanyeni Inshita Yenu Mano Mano: Kuti twakwata amapaalo ayengi lintu twakakatila sana ku kutantika uko kwingatulenga ukulabombako lyonse mu butumikishi bwa mwi bala. Ukwabulo kutwishika, ifisuma tubomba mu butumikishi filingile ukulingana ne nshita tubomfya mu mulimo. Bushe kuti twalundako inshita ya kubomba mu mulimo wa mwi bala nga ca kuti twateululako fye imitantikile yesu panono? Ku ca kumwenako, pa numa ya mulimo wa magazini pa Cibelushi, bushe kuti twabomfyako inshita na imbi ukuya ku fipempu fya kubwelelamo? Nga ca kuti twakokolako mu butumikishi bwa mwi bala pa Mulungu, bushe kuti twabomfyako inshita ukuya na ku fipempu fya kubwelelamo nelyo ukutungulula amasambililo ya Baibolo? Bushe lintu tuleshimikila ku ng’anda ne ng’anda, kuti twaongeshapo no bunte bwa mu musebo? Ishi nshila nelyo inshila shimbi kuti shalenga twawamyako umulimo wesu.
3 Nga tuli mu butumikishi, kuti twaonaula inshita yesu iyacindama nga tatucenjele. Kwena, lintu imicele ibipile, ukutuushako kuti kwatupembesula no kutwafwa ukutwalilila ukubomba. Lelo mufwile ukulinga, apantu ukutuusha kwa musango yo te lyonse kwingakabilwa.
4 Muli ino myaka, nacikoselako ukusanga abantu pa mayanda. Pa kucimfya ubu bwafya, bakasabankanya abengi bashimikila ku ng’anda ne ng’anda pa nshita shapusanapusana. Ni shani nga mwaesesheko ukushimikila mu kasuba nelyo mu cungulo bushiku?
5 Cisuma ukukanaambaula nga bakasabankanya bambi baleambaula lintu bali mu mulimo wa mu musebo. Lelo, muletalukana no kulatununuka abantu pa kuti mulanshanye na bo. Muli yo nshila, mukabomfya bwino inshita kabili mukasanga ubuseko sana mu mulimo.
6 Shukileni Inshita ku Kushimikilako: Lintu mwine ng’anda umo atile talefwaya ukumushimikila, Nte aipwishe nga kwali uuli onse mu ng’anda untu engalanda na o. Ici calengele alanshanye na wishi wa muli yo ng’anda, uwalwalilile pa myaka iingi kabili ilingi line alesendama fye. Isubilo amwene mu Cebo ca kwa Lesa lyabukulwile ukufwaisha kwakwe ukwa kuba umumi. Ilyo papitile nshita iinono alipolele, atendeka ukusangwa ku kulongana ku Ng’anda ya Bufumu, no kwebako bambi isubilo lipya asangile!
7 Nkashi umupungwe abomfeshe imitubululo yaleti kuti mwabombako umulimo wa mwi bala ilyo kucili iawala limo pa ntanshi ye Sambililo lya Citabo pa Cilonganino. Pa ng’anda abalile ukuya, alandile no mukashana uwa myaka 13 uwakutikishe no kupokako impapulo. Ubushiku bwakonkelepo, uyu nkashi wacaice amwene ulya wine mukashana ku sukulu. Ilyo papitile inshiku shinono, amwipwishe nga kuti afwaya ukusambilila Baibolo nankwe, kabili ulya mukashana alisumine.
8 Bomfyeni Bwino iyo Nshita: Ukubombako umulimo wa mwi bala lyonse kulatwafwa ukuwamyako inshila shesu isha kushimikililamo imbila nsuma. Bushe kuti mwawamyako ifyo mutendeka ukulanshanya pa miinshi ukupitila mu kubomfya imitendekele ibomba bwino sana? Bushe kuti mwawamyako ukulamuka kwenu mu kutungulula amasambililo ya Baibolo aya mu ng’anda? Pa kucite fyo, cine cine kuti mwalenga inshita yenu mu butumikishi ukubomba bwino no kulenga ubutumikishi bwenu ukuba ubusandulula nga nshi.—1 Tim. 4:16.
9 Apantu “naipipe nshita iyashalako,” tufwile ukobelwa ne milimo ya Bwina Kristu. (1 Kor. 7:29) Ukulubulako inshita ya kushimikilako e kufwile ukutangilako pa fyo tutantika. Natubombeko mu butumikishi mu nshila isandulula, mu kupimpa. Inshita cintu icisuma sana ico Yehova atupa. Lyonse muleibomfya mano mano kabili bwino bwino.
[Akabokoshi pe bula 4]
Tontonkanyeni Pali Iyi Mitubululo:
◼ Bangileni ukufika pa kukumana kwa kuya mu mulimo.
◼ Nga cingacitika mwilafusha amabumba.
◼ Mwilashingashinga ukuya mu cifulo ca kushimikilamo
◼ Bombeleni mu cifulo ca kushimikilamo ilyo abengi bali pa mayanda.
◼ Inshita shimo kuti mwabomba mweka nga takwingaba ubusanso.
◼ Mulecita ifipempu fya kubwelelamo mupepi na kuntu mulebombela ku ng’anda ne ng’anda.
◼ Nga ca kuti bambi bakokola pa ng’anda imo, imwe twalilileni fye ukushimikila.
◼ Nga cingacitika, ne mibele nga ili fye bwino, kuti mwakokolako ukucila pe awala limo.