Bombeni Bwino mu Butumikishi Bwenu

¹ Umuulu wafiita, kabili iciunda ca kutiinya catwalilila ukukula casuka caba icibulumo ca kukomya amatwi. Ikumbi lyapala intumba ya cushi lyaika. Likumbi nshi ili? Mulalo wa mamilioni ya bamakanta uuleisa ku kusansa icalo umupwilapo! Ici cimonwa icalondolwelwe na kasesema Yoele cilefikilishiwa muno nshiku ukupitila mu kushimikila kwa babomfi ba kwa Lesa abasubwa pamo na banabo, ibumba likalamba.

² Ulupungu lwa kwa Kalinda ulwa May 1, 1998, ibula 12, paragrafu 19, lwalandilepo kuti: “Umulalo wa makanta uwa kwa Lesa uwa muno nshiku walipeela ubunte bwa kushimikisha mu “musumba” wa Kristendomu. (Yoele 2:9) . . . Bacili balenina pa fipindami fyonse, ukwingila mu mamilioni ya mayanda, ukutununuka abantu mu misebo, ukulanda kuli bene pali lamya, no kubakumanya mu nshila yonse iingabako ilyo balebilisha ubukombe bwa kwa Yehova.” Bushe tacili lishuko ilikalamba ukubombako uyu mulimo wapeelwa na Lesa?

³ Ukupusanako na makanta wa cine cine, uwaikalila fye ukuiliisha, fwe babomfi ba kwa Yehova twalyangwako nga nshi ku bumi bwa bantu tushimikilako. Tufwayo kwaafwa bambi ukusambilila icine ca lulumbi icaba mu Cebo ca kwa Lesa no kubalenga ukucitapo fimo ifingabatungulula kwi pusukilo lya muyayaya. (Yoh. 17:3; 1 Tim. 4:16) E co, tulefwaya ukubomba bwino mu butumikishi bwesu. Te mulandu ne nshila tubomfya mu kushimikila, tufwile ukumona nampo nga tulashimikila pa nshita isuma kabili mu musango uwingaletako ifyawamisha. Apantu “imibele ya pano isonde [ilealuka],” cisuma ukupimununa inshila shesu ne mitununukile pa kuti tushininkishe ukuti tulebomba bwino.—1 Kor. 7:31.

⁴ Ilintu kwena tulafwaisha ukulanda na bantu mu nshila ishingi, umulimo wa kushimikila ku ng’anda ne ng’anda ucili e nshila ikalamba iya butumikishi bwesu. Bushe ilingi line mulasanga ukuti abantu tababa pa ng’anda nelyo nabalaala lintu mwabatandalila? Fintu cikalifya umutima, apantu ninshi tabaumfweko imbila nsuma mwacibaletela! Bushe kuti mwacimfya shani ubu bwafya?

⁵ Mube Abateuluka Kabili Aba Congwe: Muli Israele wa mu mwanda wa myaka uwa kubalilapo, abalondo balebomba ubushiku. Mulandu nshi? Nangu line iyi nshita tayabawamiine, e yali inshita isuma iya kwipaya isabi. E nshita baleipaya isabi ilingi. Ilyo lwalelanda pali uyu mulimo wa kwipaye sabi, Ulupungu lwa kwa Kalinda ulwa June 15, 1992, lwatile: ‘Na ifwe bene tulingile ukubebeta icifulo cesu ica kubombelamo pa kuti twingabomba umulimo wa bulondo, nga fintu cili, lintu abengi bali pa mayanda kabili ilyo bengakutika.’ Ukubebeta bwino bwino imibele ya mu bwikashi kulangilile fyo mu matauni na mu makomboni, nalimo inshita abantu basangwa pa mayanda ni lintu twabatandalila ulucelocelo pa Cibelushi na pa Mulungu, lelo te lingi bakutika kuli ifwe pali iyi nshita. Nga e fyo caba uko mwikala, bushe kuti mwateulula inshita mubatandalilapo no kulabatandalila ilyo akasuba kasansamako nangu fye mu cungulo? Iyi ni nshila iishaiwamina umo ukubomba kwesu mu butumikishi kwingacishishapo ukuba bwino kabili iya kulangulukilamo abanensu, umo ukutemwa kwa cine ukwa Bwina Kristu kumonekela.—Mat. 7:12.

⁶ Pa Abena Filipi 4:5, umutumwa Paulo atucinkulako ukuti tufwile ‘ukuleka icongwe cesu cishibikwe ku bantu bonse.’ Ukulingana no bu butungulushi bwapuutwamo, tulefwaya ukukanacishamo no kulateuluka mu nshila tubomfya ilyo tulebombo mulimo wesu uwa kushimikila mu kupimpa no kucincimuka. Tatulefwaya ‘ukukwinda ukusambilisha pa bantu na mu ng’anda ne ng’anda,’ lelo tulefwaya ukushininkisha ukuti twabomba ubutumikishi bwesu ubwa ku ng’anda ne ng’anda pa nshita iisuma kabili lintu abantu bengakutika. (Imil. 20:20) Ukupala balya balondo ba muli Israele wa mu mwanda wa myaka uwa kubalilapo, ico twangilweko sana kucito ‘bulondo’ pa nshita lintu bengakutika, te pa nshita ingacilapo ukutuwamina.

⁷ Kuteuluka nshi twingacita? Ilingi line, ukukumana kwa mulimo wa mwi bala kucitwa pa 9:00 hrs nelyo 9:30 hrs pa Cibelushi na pa Mulungu, lyene apo pene ibumba lilasalanganina mu mulimo wa ku ng’anda ne ng’anda mu cifulo ca kubombelamo. Nangu cibe fyo, amabumba ya baeluda bamo balitantika ukuti ibumba lilebombako mu butumikishi bwalekanalekana, pamo ngo bunte bwa mu musebo, mu cifulo ca kubombelamo ica makwebo, nelyo mu fipempu fya kubwelelamo, ilyo bashilaya ku ng’anda ne ng’anda mu makomboni. Ifilonganino fimo fyalisalapo inshita bengalakumana ukuya mwi bala cilya akasuba kasansama, uko e kuti pa 10:00 hrs, 11:00 hrs, nelyo 12:00 hrs. Pa numa, ibumba lilatwalilila ukubomba mu mulimo wa ku ng’anda ne ng’anda ukufikila icungulo kasuba. Mu fifulo fya kubombelamo fimo, inshita ingawamisha ukubomba umulimo wa mwi bala, cungulo kasuba ukucila ulucelo. Ukuteuluka kwa musango yo na ko kuti kwalenga umulimo wa ku ng’anda ne ng’anda ukutunguluka.

⁸ Mube Abalingulula kabili Abacenjela: Lintu tulelanda na bantu ku ng’anda ne ng’anda, bankula ku bukombe bwesu mu nshila shalekanalekana. Abene mayanda bamo balakutika, bambi tabangwako, na bambi abanono kuti baba aba fikansa nelyo aba miponto. Nga bamupontela, icitabo ca Ukupelulula Ukufuma mu Malembo, pe bula 7 citucinkulako ukuti ico tulefwaisha te “‘kucimfya ukupaashanya’ na bantu abashilanga mucinshi ku cine.” Nga mwine ng’anda talefwaya, cisuma ukufumapo. Tatufwile ukukalifya abantu ukupitila mu kubapatikisha ukulanda ne fwe nelyo ukuti basumine ifyo tuletontonkanya. Tatupatikisha abantu ukusumina ubukombe bwesu. Ico te kuti cibe kupelulula kusuma kabili kuti caleta amafya pali baNte bambi na pa mulimo wesu mu cinkumbawile.

⁹ Caliwama ukubebeta kardi wa cifulo ca kubombelamo ilyo mushilatendeka kubombelamo, pa kuti mumone ifishibisho filelangilila akeyala ka ng’anda apo abekalamo batubinda ukuyapo. Amayanda ya musango yo nga e ko yali, bakasabankanya bonse abalebombela muli uyo musebo balingile ukwebwa apo bashifwile ukuya. Takuli nangu umo uufwile ukuituntumba ukuya pali aya mayanda ukwabula ukwebwa na kangalila wa mulimo.—Moneni Umukululo wa Cipusho uwa mu Ubutumikishi Bwesu ubwa January 1994.

¹⁰ Kuti twacishapo ukubomba bwino nga tulelingulula lintu tulebomba ku ng’anda ne ng’anda. Mulelolekesha ifili pa ng’anda ilyo mulepalamina. Bushe amakatani yonse nelyo ifya kucinga amawindo nafiisalwa? Bushe pa ng’anda pali tondolo? Ici kuti calangilile fyo abene ng’anda nabasendama. Cilemoneke fyo, kuti twalanshanya bwino na mwine ng’anda nga twabwelelako inshita imbi. Nakalimo kuti cawamisha ukwisashokela pali iyi ng’anda inshita imbi, ukulemba fye inambala ya ng’anda. Kuti mwaisapitapo na kabili ilyo mushilafuma muli co cifulo ca kubombelamo nelyo lembeni ukuti mwalaisako inshita imbi.

¹¹ Nalyo line kuti kwabako inshita lintu twingashibusha nelyo ukupumfyanya uusendeme mu kukanaenekela. Limbi no kufulwa kuti afulwa nelyo ukukalipa. Cinshi twingacita? Amapinda 17:27 yatufunda ukuti: “Uwatekanyo mutima muntu wa mucetekanya.” Ilintu kwena tatulombo bwelelo pa mulandu wa butumikishi bwesu, cine cine tufwile ukuyebelela pa kutandala pa nshita ishilingile. Mu bufuuke kuti twaipusha nga cingalinga ukwisako inshita imbi lyene kuti twamulomba ukubwelelako. Ilingi line ukulanda mwi shiwi lyafuuka pa fyo twangilweko mu kufumaluka kuli uyo muntu kuti kwamulenga ukubweshe cipyu. (Amapi. 15:1) Nga mwine ng’anda atweba ukuti abomba icipani ca bushiku lyonse, kuti twalemba ifi fyebo pali kardi wa cifulo ca kubombelamo pa kuti ku ntanshi tukaletandala pa nshita isuma.

¹² Ukulingulula na ko kwalilinga lintu tuleeshaesha ukubomba bwino mu cifulo cesu conse ica kubombelamo. Apantu abantu abengi tabasangwa pa ng’anda lintu twatandala umuku wa kubalilapo, tulekabila ukulundako ukubombesha pa kuti twingabashimikilako ubukombe bwe pusukilo. (Rom. 10:13) Amalipoti yalangilila ukuti limo limo bakasabankanya balatandalila ing’anda imo ine imiku iingi mu bushiku bumo pa kuti fye basangepo abantu. Ici cilamonwa ku bena mupalamano. Kuti calenga balatontonkanya bubi bubi pa Nte sha kwa Yehova ukuti ‘lyonse balapitana’ mu musebo wabo. Ni shani ici cingasengaukwa?

¹³ Bomfyeni ukulingulula. Ilyo mulebwelela pa ng’anda iishacibapo abantu, bushe kuli ifilelangilila ukuti uno muku pali abantu? Nga ca kuti kalata nelyo icishibisho filepeepeela mu mbokoshi ya makalata, kuti cabe fyo uyo muntu acili talaisa kabili nangu mwingabwelelako umuku na umbi te kuti mumusange. Nga mwafilwa ukumusanga ilyo namwesha imiku yafulilako pa nshita yalekanalekana ubo bushiku, pamo nga mu cungulo bushiku, limbi kuti mwalanda na mwine ng’anda ukubomfya telefoni. Nga cayafya, mu kushilimuka kuti mwasha ka trakiti nelyo ka handibilu mu cibi, maka maka nga icifulo ca kubombelamo calibombelwamo libili libili. Nalimo inshita ingawama ukutandalila uyo muntu ni lintu mukalabombela muli ico cifulo umuku ukakonkapo.

¹⁴Tufwile ukusengauka ukukokosha mwine ng’anda pa mwinshi lintu tulelanshanya nankwe pa nshita kuli imicele yabipa. Cenjeleni ukukanasha iloba mu ng’anda lintu bamusuminisha ukwingila. Bomfyeni ukulingulula kusuma lintu imbwa yamubosa. Lintu mulebombela mu fiyanda fya munkulinkuli, cefyeniko ishiwi kabili sengaukeni ukupange congo icingapumfyanya abekalamo no kubalenga ukuti nomba mwafika.

¹⁵ Beni aba Muyano no Mucinshi: Nga natuiteyanya bwino kuti twasengauka ukubungana mwi bumba ilikalamba ilingalamoneka mu cifulo ca kubombelamo. Kuti caletela abene mayanda bamo umwenso. Tatulefwaya cilemoneka kwati “natutebelela” amakomboni. Pa kukumana kwa mulimo wa mwi bala e patantikwa amapekanyo yasuma aya kubomba mu cifulo ca kubombelamo. Utumabumba tunono utwa bakasabankanya, pamo ngo lupwa lumo, twena te kuti tutiinye abene mayanda kabili twalyanguka ukukolopanya lintu icifulo ca kubombelamo cilebombelwamo.

¹⁶ Pa kuti babe aba muyano abafyashi bakabila ukulama abana babo bwino lintu balebombela mu cifulo ca kubombelamo. Ilyo balefika pa ng’anda imo pamo na bakalamba abana balingile ukucindika sana. Abaice tabalingile kuleka baleyangala nelyo ukulaendauka umungulu, ica kuti bapumfyanya na bene mayanda nelyo abapita nshila.

¹⁷ Ukukanacishamo ukutuusha na ko kulakabilwa. Ubutumikishi Bwesu Ubwa Bufumu, ubwa June 1995, ibula 3, bwatile: ‘Lintu tuli mu mulimo wa mwi bala, kuti twaonaule nshita ya mutengo mu kutuusha. Nangu cibe fyo, lintu imiceele ishili bwino, ukutuushako kuti kwatupembesula no kutulenga ukutwalilila ukubomba. Nangu ni fyo, abengi, basalapo ukutwalilila ukushimikila ku bantu no kusengauka ukukokoloka na bamunyina pa nshita yaimikwa ukubombamo ubutumikishi.’ Limo limo pa kulanshanya ifya kukumanya fyacibako mu mulimo wa mwi bala ulucelo, kulaba ukukafya icongo, kabili ici cilacefyako ukucindama kwa butumikishi bwesu no kufubalisha ico wabelako. Nga babomfya ukulingulula, bakasabankanya kuti basengauka ukuyabungana pa cikuulwa cimo ukalapoosa fye nshita ya butumikishi ku fya fye.

¹⁸ Mu kutandalila abantu konse uko bengasangwa, e kutila mu misebo, umwa kwimika bamotoka, na mu ncende shimbi isha cintubwingi, abengi balisangamo amapaalo yashaiwamina. Pali uyu mulandu na o, tulefwaya ukulanga ubunte bushaiwamina ukupitila mu fyebo na mu kuteuluka kwesu. Bakasabankanya mu cilonganino cimo cimo tabafwile kuyabombela mu cifulo icishili cabo pa kuti tabatendwishe abapitanshila mu ncende sha makwebo na babomfi mu ncende sha bukwebo, pamo nga umwa kunwensesha bamotoka amafuta umo babomba akasuba no bushiku bonse. Pa kuti tushininkishe ukuti twabomba ubutumikishi bwesu mu muyano na mu mucinshi, tukabombela fye mu cifulo batupeela kano fye nga kuli amapekanyo ukupitila muli Komiti wa Mulimo uwa Cilonganino uwa cilonganino cimbi, aya kulombo bwafwilisho.—Linganyeniko 2 Abena Korinti 10:13-15.

¹⁹ Ifilonganino fimo ifyakwata incende ishingi umo icintubwingi cingashimikilwa fyalisangula ishi ncende ukuba ififulo fya kubombelamo. Lyene kardi wa cifulo ca kubombelamo alapeelwa kuli kasabankanya umo umo nelyo kwi bumba. Ici cilenga ukuti icifulo ca kubombelamo cibombelwemo bwino kabili cilenga bakasabankanya abengi ukukanabombela mu ncende imo ine pa nshita imo ine, ukulingana ne cishinte caba pali 1 Abena Korinti 14:40 icitila: “Fyonse ficitwe busaka busaka kabili mu kukonkana.”

²⁰ Imimonekele yesu lyonse ifwile ukuba iya mucinshi kabili ilingile ukutwishibisha nga batumikishi abasende shina lya kwa Yehova. E fyo cifwile ukuba na ku fibombelo tubomfya. Ifyola fyalepauka na ba Baibolo basasapuka abalamba filalenga abantu ukukanakutika ku bukombe bwa Bufumu. Calisoswa ukuti imifwalile no kupempenkana “filalandapo ifyebo fimo ku bantu bamushinguluka pa lwa fyo mwaba ne fyo bamumona mu bwikashi.” E co, imimonekele yesu taifwile ukuba iya kuilekelesha nelyo iya busanku, kabili taifwile ukuba iya kucebusha nelyo iyacishamo, lelo lyonse ifwile ukuba “iyawamine mbila nsuma.”—Fil. 1:27; linganyeniko 1 Timote 2:9, 10.

²¹Pali 1 Abena Korinti 9:26, umutumwa Paulo atile: “Ine e fyo mbutuka, te pamo ngo ubutuke cibutukebutuke; ndelwe fyo, te pamo ngo uleumo mwela.” Ukupala Paulo, twalipampamina pa kubomba bwino mu butumikishi ukuti abantu bengakutika. Ilyo tulebombako mu kupimpa mu mulimo wa kushimikila ilelo fwe baba mu ‘mulalo wa makanta’ uwa kwa Yehova, shi natubomfye ukuteuluka no kulingulula kwa Bwina Kristu pa kutwala ubukombe bwe pusukilo kuli bonse ababa mu cifulo cesu ica kubombelamo.