Bushe Nalifikapo Bwino Bwino Ukushimikila?
1. Mulandu nshi tushilingile ukumfwila kwati tatwafikapo sana ukulashimikila Icebo?
1 Bushe mwalitala amuipushapo ilipusho lya musango yu? Nga mwali-ipushapo, ninshi mwisakamana nakalya! Ukuya ku sukulu nelyo ukucenjela te filenga ukuti tufikepo bwino bwino ukulashimikila Icebo. Bamo pa basambi ba kubalilapo aba kwa Yesu babalondolola ukuti bali “abashasambilila kabili abantu yaweyawe.” Te mulandu no kukanasambilila, balishibe bwino sana ukushimikila imbila nsuma pantu bapampamine fye pa kupashanya Yesu.—Imil. 4:13; 1 Pet. 2:21.
2. Bushe imisambilishishe ya kwa Yesu yali shani?
2 Imisambilishishe ya kwa Yesu: Ifyo Yesu alesambilisha tafyakosele, kabili na bantu yaweyawe balefyumfwa ukwabula ubwafya. Amepusho aleipusha, ifilangililo, e lyo ne mitendekele ya malyashi yakwe yaleba iyayanguka kabili yalelenga abantu ukubika amano ku fyo alesosa. (Mat. 6:26) Alebika sana amano ku bantu. (Mat. 14:14) E lyo kabili Yesu alelanda mu kushipa kabili na maka, pantu alishibe ukuti ni Yehova uwa mutumine no kumupeela amaka ya kubomba umulimo wakwe.—Luka 4:18.
3. Bushe Yehova atwafwa shani ukubomba bwino umulimo wa kushimikila imbila nsuma?
3 Yehova Alatwafwa: Ukupitila mu Cebo no kuteyanya kwakwe, Kasambilisha wesu Umukalamba alatukansha pa kuti tuleshimikila bwino imbila nsuma. (Esa. 54:13) Pa mulandu wa kuti Yehova alisungilile bwino inshila shisuma Yesu alebomfya pa kushimikila, na ifwe nomba tulabelenga no kulapashanya Yesu. Yehova alatupeela umupashi wakwe uwa mushilo kabili alatukansha ukupitila mu kulongana kwa pa cilonganino. (Yoh.14:26) Te apo peka iyo, alitupeela bakasabankanya abaishiba ukushimikila abengatwafwa ukulashimikila bwino sana.
4. Cinshi tulingile ukulayumfwila ukuti twalifikapo icine cine ukushimikila imbila nsuma kuli bambi?
4 Tulingile ukumfwa ukuti twalifikapo ukushimikila, pantu ‘uwalenga ukuti tufikepo bwino bwino ni Lesa.’ (2 Kor. 3:5) Nga tulecetekela muli Yehova kabili tulebomfya bwino ifyo atupeela, ninshi tukaba ‘abafikapo bwino bwino, abaipangasha icine cine ukubomba umulimo onse uusuma.’—2 Tim. 3:17.