Inte sha kwa Yehova Ukushinguluke Calo—New Zealand

BUSHE ifishi kuti fyalumbanya Yehova? Ee, ukulingana na Esaya 42:10: “Imbeni kuli Yehova ulwimbo lupya, ulwa kumutasha ukutula pa mpela sha pano isonde, mwe . . . fishi na ’baikalamo.” Ifishi ifyapanga New Zealand mu cine cine filalumbanya Yehova. Ukulumbuka mu calo conse pa mulandu wa babemba, imipatapata ya muli babemba, impili shalulubala, amenshi makasa ayenguluka, inaamba, imitengo ilokeshamo imfula iyafimbwa na mabula ya luputu, ne mpanga sha mulemfwe ishafunda, New Zealand ekalilo bunte mu kulongoloka ulwa bukatebebe no kupuulama kwa kwa Kalenga wa muulu ne sonde.

Ukutula pa kutendeka fye ukwa uno mwanda wa myaka, abena New Zealand abafulilako baliilunda ku kulumbanya Yehova pa kwalukila kuli wene mu kupepa kwasanguluka no kwakana imbila nsuma iya Bufumu bwa kwa Lesa na bambi. Pali nomba line, Nte umo uwaumfwile ica kukumanya icisuma pa lwa kucitilo bunte kuli balupwa apingwilepo ukweshako ku lupwa lwakwe. Apeele ubupe bwa fitabo fya Kuti Waikala Kuli Pe na pe muli Paradise Pe Sonde ku filundwa fyafulilako ifya mu lupwa. Finshi fyafumamo ukufika pali ino nshita? Ashimiko kuti inkashi yakwe imo na munyina umo nomba balesambilila Baibolo, umwipwa alibatishiwa nga umo uwa Nte sha kwa Yehova, kabili bambi nomba baleankulako ku cine ca mu Cebo ca kwa Lesa. Acili nakwata ibala ilikalamba nga nshi ilya kubombamo; pa mbali ya bafyashi bakwe, alikwata bamunyina 6 ne nkashi shakwe 9!

Ilumbo kuli Yehova na kabili lilesako lintu baNte baikatana mu kukuula Amayanda ya Bufumu. Ku ca kumwenako, uulemba imikululo mu nyunshipepala Roy Perkins alembele muli Opotiki News iya pa May 17, 1994 ati: “Pa kuba uushasumina, nalitemenwe ukumona imilimo no kubombesha kwa bakabomba baipeela abalepoosa inshita yabo ikalamba no kubombesha pali ulya mulimo pa mulandu wa kutemwa Lesa wabo.

“Muli aya maawala yonse aya kubomba ayo bapoosa pa mpela ya mulungu nshatalile mona nelyo ukumfwapo straka . . . Abanakashi balenina pa fintamba ukulabombela pamo na baume, ukukuusa ifibumba, ukutunta ifipe, fyonse mu nshila yanakilila kabili iya nsansa.

“Kabili takwali inshita yaleonaulwa ku uuli onse ukupemwinako ku kupeepako fwaka. Aciba fye nga te fya kufuminisha fyalefuma kuli penti no lukungu lwa ku njelwa, kuli bonse abalebombela mu cifulo icili conse umwela wali fye uusuma nga nshi.”

Ibumba lya baeluda ilya ku cilonganino ca Opotiki lyalembele ukuti: “Ubukuule bonse nabupapusha abantu ba mwi tauni. Cilemoneka kwati uuli onse alelanda pali bwene. Amasambililo ya Baibolo ayafulilako nayatendekwa. Limo ilyatendekwe ilyo tusangile ukube lya kucincimusha apakalamba cili bantu baupana babili abashikama nga nshi mu fya mipepele abo pa myake ingi balitulesha ukulabatandalila. Baleisa ku cifulo ca bukuule cila bushiku kabili na ku kulongana. Umulume pa numa atile, ‘Nimona ukuti muli bantu ba kwa Lesa. Lwa nkati, nalifuluka inshita yonse iya bumi bwandi ukubishanya na bantu ba musango yu.’”

Umwaka wabangilileko, kalemba wa mikululo uwa nyunshipepala ya Otago Daily Times alandile ifili pano pa lwa Ŋanda ya Bufumu iyakuulilwe mu kwangufyanya mu Dunedin ati: “Yali mibombele ya kupapa, ica kumwenapo ca kupapa ica kukuntwa no kuibombela.” Inyunshipepala imo ine yalandilepo kuti: “Abantu ba mu musumba baletamba mu kuba no kukumbwa ilyo icikuulwa cishaikulila calekuulwa mu menso yabo, kabili abengi bafwile baletontonkanya ukwaluka kumbi ne mibombele imbi ifingapwishishiwa nga ca kuti ukupuminkana pamo ukwa bakabomba ba kuitemenwa ukwapala uku no mupashi wa kubombela pamo afilabako. Iŋanda ya Bufumu cishibilo cileta icilumba ica kuti kwaliko ukubombesha kwa kukuulilila ukwa kufika pa buyo.”

Pa kati ka myanda ne myanda ya bantu abatandalile apaali ubukuule, kanabesa umo asosele ukuti Inte shilekuula “amacalici” ilintu icakaniko cakwe ica mipepele cileshitisha yene pa mulandu wa kucepa kwa filundwa fye calici. “Amulolelako mupepi ne myeshi 12, nga mwalishitileko icalici limo kuli ifwe,” e fintu aisansalike umwine. “Tulingile ukushitishapo pantu tatulekumanisha ifipooswa. Lelo, kwena, imwe tamwakwata bashimapepo abo mulipila. . . . E lyo kabili imwe ifikuulwa fyenu papooswa fye ishinono pa kufiwamya, te fikuulwa fyasumbuka ifyaba ne nsonshi shasolomoka ifyakosa ukuwamya.”

Mu kumonekesha, ifishi kuti mu cituntulu fyalumbanya Lesa. Shi amalumbo ya kuli Yehova nayatwalilile ukulaumfwika muli ici calo ca mu Pacific icayemba—kabili no kushinguluke calo!

[Akabokoshi pe bula 9]

UKULONDOLOLA IMIBOMBELE YA CALO:

Umwaka wa mulimo uwa 1994

IMPENDWA YA PA MUULU ABALECITILO BUNTE: 12,867

ICIPIMO: Nte umo kuli 271

ABASANGILWE KU CIBUKISHO: 24,436

AVAREJI WA BAKASABANKANYA BAPAINIYA: 1,386

AVAREJI WA MASAMBILILO YA BAIBOLO: 7,519

IMPENDWA YA BABATISHIWE: 568

IMPENDWA YA FILONGANINO: 158

IOFESI LYA MUSAMBO:

MANUREWA

[Icikope pe bula 9]

Bapainiya baleya mwi bala mupepi na 1930

[Icikope pe bula 9]

Ifikuulwa fya musambo mu Manurewa

[Icikope pe bula 9]

Ukushimikila ubukombe bwa Bufumu mu Devonport, Auckland