Bakansheni Ukufuma ku Bunya

UKUSAPIKA kwa muno nshiku kulangililo kuti “utwana tulekula mwi fumo tulankulako ku mashiwi yantu tumfwa.” Bakasapika ba pa University of North Carolina “basangile ukuti ilyo banyina balebelengela abana babo abaali mwi fumo, utunya twaishileyankulako lintu ifyo fiputulwa fyaishilebelengwa na kabili,” e fisosa Winnipeg Free Press. Lintu abanakashi babelenga mu kupongomoka ilyo baali pa bukulu, ici nakalimo kuti casangwila ku kupampamika ifipimo fya mibele isuma mu mwana. Baibolo itila Timote ‘aishibe amalembo ya mushilo ukufuma ku bunya.’ (2 Timote 3:14, 15, NW) Mu kumonekesha, nyina na nakulu balitesekeeshe ubucindami bwa kumukansha ukufuma ku bunya, uko mu kupalishako kwasanshishemo ukubelenga mu kupongomoka.

Ukubelenga kwaba “e kulamuka kwakwatisha amaka mu bumi uko twakwata mu bwikashi bwesu,” e fyasosa kalemba Jim Trelease. Ukulamuka kwa kulando lulimi no kufusha amashiwi filengilishiwako ukupitila mu kubelenga kwapongomoka.

Calibe cisuma ukutendeka ukubelenga mu kupongomoka nangu fye ilyo line fye mwatendeka ukulanda ku mwana wenu. Nangu cingati umwana wenu uushilafyalwa nelyo akacece mu kutendekelako takomfwe cintu mulesosa, ifyo mwingesamwenamo pa nshita ntali fifwayo kuti mulemusosha. Amapinda 22:6 yatila: “Kanshisho mwaice umo afwile ukubela, ilyo akakota takafumemo.”

Cinshi cintu mwingabelenga icingabomba kabili icingabamo bunonshi? Belengeleni umwana wenu Baibolo mu kupongomoka cila bushiku. Na kabili belengeni impapulo shishaiwamina, pamo nga Ukukutika kuli Kasambilisha Mukalamba, Icitabo Candi ca Malyashi ya mu Baibolo, Umuntu Wakulisha Uwabalile Abako Uwa Mweo, ne fipande fya muli bamagazini ba Ulupungu lwa kwa Kalinda na Loleni!

Kwena, ukuipeela mwe bene muli iyi nshila kusanshamo inshita, lelo ni nshita iipooswa bwino. Ni nshila iimoneka iya kulango kuti mulasakamana kabili mwalitemwo mwana wenu.