Kuti Mwaba no ‘Mutima wa Nkalamo’

BAIBOLO limo limo ibomfya inkalamo nge cishibilo ca bukose no kushipa. Abaume ba bulamba nelyo aba bukose balondololwa nga ababa no “mutima wa bunkalamo,” kabili abalungami basoselwako ukuba “bashipa nge nkalamo.” (2 Samwele 17:10; Amapinda 28:1) Inkalamo, ukucilisha lintu baibalamuna ilalango kuti yalilinga ukulumbuka kwa iko pamo nga “impalume ya mu finama.”—Amapinda 30:30.

Ni ku kupama kwa nkalamo e ko Yehova Lesa apashanya umupampamina wakwe uwa kucingilila abantu bakwe. Esaya 31:4, 5 atila: “Ifyo inkalamo, napamo umusepela wa nkalamo, ibuluma pa ca kutaakanya ca iko, ilyo ibumba lyonse lya bacemi lyaitilwa pali yene; pa mashiwi yabo taitentulwa, pa mpooma yabo taisokopala, e fyo Yehova wa milalo akekila ku lupili lwa Sione . . . ukucingilila no kupokolola, ukucilila no kulengo kupusuka.” E fyo Yehova ebekesha ababomfi bakwe ukusakamana kwabilingana, ukucilisha lintu balolenkana no bulwani.

Baibolo ilinganya icibambe cikalamba ica mutundu wa muntu, Satana Kaseebanya, ku nkalamo iilelila, iitaakanya. Pa kusengauka ukusanguke cinakabupalu ca iko, twalyebwa mu Malembo ukuti: “Tekanyeni, loleni.” (1 Petro 5:8) Inshila imo intu twingacitilamo ico yaba kusengauka ukushipula kwa ku mupashi ukulenge mfwa. Mu kulosha kuli ici Yesu atile: “Muyangwe, epali imitima yenu yalemenenwa ku buliili no kukolwakolwa na masakamika ya bwikashi buno.” (Luka 21:34-36) Ee, ukuba abalola lwa ku mupashi muli shino “nshiku sha kulekelesha” kuti kwatupeela ‘umutima wa nkalamo,’ ‘uwashikimana, uwatetekela muli Yehova.’—2 Timote 3:1; Ilumbo 112:7, 8.