Ukuletela aba mu Cifungo Ubuntungwa bwa ku Mupashi

“TWALEMUPEMBELELA.” “Ishi nshiku shapitapo ishinono, naleloota pa lwa kwisa kwenu.” “Twatasha pa kutupeela uwa kututandalila lyonse.” “Tulefwaya ukulumbulula ukutasha kuli Yehova pa mapaalo yonse ayo tupokelela apa fye ukufuma kuli wene e lyo no kuteyanya kwakwe na pa fya kulya fya ku mupashi ifipeelwa mu nshita iyene.”

Cinshi calengele uku kulumbulula ukutasha? Uku kulumbulula kumo kumo ukwa bafungwa abakakwa mu fifungo fyapusanapusana mu Mexico. Baletasha ifyo balesakamanwa ku Nte sha kwa Yehova, icabaletela ubuntungwa bwa ku mupashi nangu line baba mu cifungo. Mu Mexico mwaba ififungo 42 umo Inte sha kwa Yehova libili libili shipyungila abafungwa ifyo bakabila lwa ku mupashi. Ifi fifulo fiitwa Centro Readaptación Social (Icifulo ca Kupindulwilapo Abekashi). Muli fimo ifya ifi fifungo, ukulongana kwa Bwina Kristu kulabako no kubako libili libili kabili mulefuma ifintu fisuma nga nshi. Ku ca kumwenako, mu kupenda kumo ukwa nomba line, abantu mupepi na 380 balasangwa ku kulongana muli fi fifulo. Pali kalya kashita amasambililo ya Baibolo ayaletungululwa yafikile pali avareji wa 350. Abafikilepo ukutendeka ukushimikila bali 37, na 32 balipeele ubumi bwabo kuli Yehova, ukwishibisha ici ukupitila mu lubatisho lwa mu menshi.

Ifyo Umulimo Ubombwa

Ni shani fintu Inte sha kwa Yehova babomba umulimo wabo uwa kushimikila muli fi fifulo? Intanshi baya ku balashi bashingamwa ne fi fifulo ku kulomba ukuti babapeeleko ulusa lwa kwingila mu cifungo, ukubalondolwela imifwaile ya kutandala kwabo—ku kusambilisha abafungwa ifyo bengawamyako ubumi bwabo no kubombela Lesa mu nshila imutemuna.

Ilyo lyonse bayako abalashi balabapeela ulusa. Aba balashi balatasha ukufunda kwa mu Baibolo ukulepeelwa kuli aba bafungwa. Abalashi ba fifungo balimona ukuti Inte sha kwa Yehova balomfwila amafunde pa lwa kucingilila ayapangilwa ifi fifulo. Balisuminisha aba batumikishi batandala ukulonganina mu maofesi, mu miputule ya kuliilamo, ne ya kubombelamo. Mu cifulo cimo Inte balisuminishiwe no kukuula Iŋanda ya Bufumu inono, nga fintu cilelangililwa mu ca kukumanya cakonkapo icashimikwe na kangalila wenda uwa ku cifulo cabela pa kati ka kabanga ka kapinda ka kulyo aka Mexico.

“Ku kutendeka kwa 1991 twatampile ukutandalila icifungo ca mu Tehuantepec, Oaxaca, uko twasangile balifwe nsala ya ku mupashi. Mu kwangufyanya twatampile amasambililo ya Baibolo 27. Pa mulandu wa buseko bwa bafungwa, ukulongana kwa cilonganino kusano kwalitantikwe. Umo uwa bafungwa, uwalangishe ukutemwa kwakulisha kuli Yehova, apingwile ukukuula Iŋanda ya Bufumu inono mu kati na nkati ka lubansa lwa cifungo pa kuti tukwate ukwa kulonganina. Aile ku mukalamba wa cifungo no kulombo lusa, kabili abalashi baliitemenwe nga nshi. Ku kutendeka kwa December 1992, abafungwa 6 balifikilepo ukuba bakasabankanya ba mbila nsuma. Pa mulandu wa kulunduluka balangishe, kwali ukutantika kwa kukwata Icibukisho mu cifungo. Twalombele ulusa ku mukalamba wa cifungo ukuti tulete ifimpashanya—umukate na waini—kabili pa numa ya kulanshanya kwa maawala yane, ulusa lwalipeelwe.

“Caishileba fye nkuma ukuti pa April 3, 1993 (inshiku shitatu pa ntanshi ya kusefya kwa Cibukisho), abafungwa bamo balikakwilwe. Lintu umo uwa bene uwali kasabankanya apokelele ifipepala fya kukakwilwapo, alombele ukulanda no mukalamba wa cifungo pa kuti engalombako ulusa lwa kwikalako ukufikila pa numa ya kusefya kwa Cibukisho. Ici calipapwishe umukalamba wa cifungo icine cine, apantu ukulomba kwa musango yu takwaseeka, lelo pa mulandu wa kufwaisha kwa mufungwa ukwa kusangwa ku Cibukisho mu cifungo, alimusuminishe. Abasangilwe ku Cibukisho bali 53, abalukwishe ifilamba fya buseko pa mpela ya programu. Twalisuminishanya ukwita ili bumba ati ‘Freedom Cereso,’ pantu bantungwa lwa ku mupashi.”

Umulimo wa Nte sha kwa Yehova ulatashiwa apakalamba muli fi fifulo. Muli fimo ifya ifi fifungo, uwangalila icifungo alatasha apabuuta ukuti ukusangwa ku kulongana kwa Nte sha kwa Yehova e “muti” wa kupinduluka bwangu ukwa bafungwa.

Programu wa Kupinduluka Uubomba Bwino

Umulimo wa Nte sha kwa Yehova wafumamo ukupindulukilila kwa bafungwa abengi. Ilintu ilingi line ca cine ukuti abakakwapo mu cifungo babwelela ku bumi bwa buntalamisoka ilyo bakakulwa, abo abapokelela ubukombe bwa Cebo ca kwa Lesa mu cine cine balyalukila umuku wa limo. Ukwaluka kwabo kutucinkulako ulwa mashiwi ya mutumwa Paulo aya kuti: “Nangu ba bulalelale, . . . nangu bapupu, nangu ba lwinso, nangu abakolwo bwalwa, nangu ba nsele, nangu fipondo, tabakapyane ubufumu bwa kwa Lesa. Kabili imwe bamo e fyo mwali; lelo mwalisambilwe, lelo mwalishishiwe, lelo mwalungamikilwe kwi shina lya kwa Shikulu Yesu Kristu na mu Mupashi wa kwa Lesa wesu.”—1 Abena Korinti 6:9-11.

Ukwaluka kukalamba mu buntu bwabo kulamoneka lintu balumbulula ifyo bayumfwa. Miguel, uwaba mu cifungo ca Campeche mu musumba wa Campeche City, acilumbulwile muli yi nshila: “Ilelo kuti nasosa mu kuba no buseko nati ndaipendela pa kati ka mpaanga shimbi ishakwate subilo lyalembwa pali 2 Petro 3:13 na Mateo 5:5.” José, uwaba mu cifungo ca mu Campeche ica Koben, alandile ati: “Nangu ca kuti ndi mufungwa kabili umusoka nacitile kuti waba uwakakala, nalyumfwikisha ukuti Yehova wa nkumbu nga nshi kabili alakutika ku mapepo yandi no kupaapaata. Kuti andekelela impulumushi shandi no kumpeela ishuko lya kupoosa inshita yashalako ku bumi bwandi ukwebako bambi imbila nsuma ya Bufumu bwa kwa Lesa. Tuletasha baeluda pa nshita bapoosa ukututandalila mu cifungo pa kuti twinganonkelamo mu malayo ya Bufumu bwa kwa Lesa. Mwandi mapaalo yawamisha! Bushe kuti natila ndi mufungwa? Iyo, Yehova alimpeela ubuntungwa bwa ku mupashi ubo nalekabila.”

Cinshi cilenga inkomi, bamwikata kama, abooca ifikuulwa, abapupu, na bambi ukwaluka ukusanguka Abena Kristu abekala ubumi bwalungama? Ukulingana na ba bantu bamo bene, caba maka yaalula aya Cebo ca kwa Lesa no kubishanya kusuma na bantu baipeelesha mu cine cine. Ilyashi lya kwa Tiburcio, uwakakwa mu cifungo ca Mazatlán, mu Sinaloa, lilelangilila ukubomba bwino ukwa programu wa kupindulula. Aali mu cifungo mu Concordia, Sinaloa, umo akwete amafya pa mulandu wa cinse cakwe. Umukashi wakwe aali ni umo uwa Nte sha kwa Yehova, kabili aalemusunga buluku buluku, nelyo fye lintu aisa mu kumupempula mu cifungo. Ali uwatekanya kabili atwalilile ukumupempula, e co alombele umukashi ukuti amutwalileko icitabo ca Kuti Waikala Kuli Pe na pe muli Paradise Pe Sonde, ico atendeke ukusambilila pa lwakwe fye.a Lyene alombele ukuti umo aleya ku cifungo mu kusambilila nankwe. Atampile ukulalunduluka lwa ku mupashi, kabili ukwampana kwakwe na bambi kwatendeke ukulawaminako. Alikuushiwe ukuya ku cifungo ca mu Mazatlán ukwaba ibumba ilisambilila Baibolo, kabili pali ino nshita ni kasabankanya. Atila: “Nomba, capamo no mukashi wandi na bana na bafungwa banandi, ndetasha nga nshi pa kumfwa ku cine ca mu Baibolo muli cino cifulo, mu kuba ne subilo lya kuti mu kwipipa ku ntanshi, ndi no kukakulwa kabili nkalasangwa ku kulongana kukalamba konse no kulongana kwa cilonganino.”

Na kabili, kwaliba Conrado, uutasha nga nshi pa kwaluka ayaluka mu bumi bwakwe. Alikwete amafya ya mu cupo ayakakala ica kuti umukashi alimubutwike. E co ayalukile ku miti ikola ku kusange cisansamushi. Mu kupita kwa nshita asangwike kashitisha wa miti ikola. Aliketwe no kupingulwa ukuya ku cifungo pa mulandu wa kusenda ibange na cocaine. Mu cifungo mwali ibumba lyalesambilila Baibolo ne Nte sha kwa Yehova, kabili alilaalikwe ukusambilila na bo. Alumbulula ifyo ayumfwa muli yi nshila: “Nalitemenwe nga nshi ukumona ifyo ukulongana kwaletungululwa busaka busaka, programu ya kubebeta Baibolo ukupitila mu mpapulo, ne cishinka ca kuti fyonse fyashimpilwe pali Baibolo. Ilyo line fye nalombele ukuti ndetungululwa isambililo lya Baibolo kabili natendeke ukusangwa ku kulongana.” Ico cali mu January 1993. Nomba Conrado alifuma mu cifungo kabili atwalilila ukulunduluka mu cilonganino ca Bwina Kristu.

Islas Marías

Mu Mexico mwaliba icifungo icitiinwa nga nshi icapangwa ne fishi fine ifiitwa Islas Marías. Abafungwa kuti baleendauka pali fi fishi fya kukandilwapo apo bakakilwa. Bamo bekala apa pene na bakashi na bana babo.

Icilonganino cinono calipangwa. Bamunyina batatu ukufuma ku Mazatlán balayako cila mweshi, ku kwaafwa ukutungulula ukulongana, ukupayanya impapulo, no kukoselesha. Inshita shimo kangalila wa muputule alayako mu kubatandalila. Avareji wa basangwako aba pa kati ka 20 na 25. Kwaba bakasabankanya babatishiwa bane na babili abashabatishiwa. Kangalila wenda ashimiko kuti “bamo benda amakilomita 17 ukuyasangwa ku kulongana pa Mulungu kabili bafwile ukukwankwanya pa kufuma ku kulongana pa kuti bayesangwako ku kwitwa amashina. Cisenda ukucila pa maawala yabili ukuyafika, nga mulekumpauka.” Umo uwa bamunyina uwasambilile cine muli cilya cifungo, asosele nomba line ati: “Nalefwaisha ukufuma bwangu, lelo nomba nkafuma ilyo line Yehova alefwaya, apantu na kuba ninkwata umulimo uwingi uwa kubomba muno mwine.”

Tuli aba nsansa ukumona ukuti icine cilebomfya amaka ya ciko ku kulubula abafumaluka abalefwaya inshila ya kutemwinamo Yehova. Pa basambilile cine mu cifungo, ukucila pali 12 balikakulwa, balibatishiwa, kabili nomba bekala ubumi bwa mucinshi nga babomfi ba kwa Lesa, bamo balisontwa fye no kuba baeluda ba mu filonganino. Amaka ayo Baibolo yakwata ku kundapa imitima no kupindulula abantu yalilangililwa mu kumonekesha. Ilyo fye aba bantu abakakilwe pa mulandu wa kucita impulumushi shimo baingila mu nshila ya lubuuto lwa Cebo ca kwa Lesa, balanonka ubuntungwa bwa cine ubo Yesu alaile lintu atile: “Mukeshibe cine, ne cine cikamulenga abantungwa.”—Yohane 8:32; Ilumbo 119:105.

[Futunoti]

[Icikope pe bula 23]

Abengi balinonkelemo mu cine ca Bwina Kristu basambilile mu cifungo