Bushe Alitwalilile Ukuba Nacisungu Nangu Line Alyupilwe?

PA KUTI fye bunacisungu bwa kwa Maria ubwatunganishiwa ukuba ubwa mutatakuya ne cupo cakwe kuli Yosefe filondololwe bwino, abapenta ifya kupentapenta na babaasa ifya kubaasabaasa balilangisha Yosefe ngo mwaume umukote. Bapelulula ukuti Yosefe aali fye ngo muleshi wa kwa Maria ukucila ukuba umulume. Lelo Papa John Paul 2 nomba line atungilile imimwene yapusanako pa lwa uyu mulandu. Alandapo kuti Yosefe “aali talakota pali ilya nshita.” Ukucila, “ukupwililika kwakwe lwa nkati, uko apokeleele kuli Lesa, kwalengele Maria ukutwalilila ukuba nacisungu nangu line alyupilwe.”

Nga ca kuti Maria taalefwaya kupoosa bunacisungu bwakwe, mulandu nshi asuminine ukukobekelwa? Papa ayasuka ukuti, “Kuti catunganishiwa ukuti pa nshita ya kukobekelana kwabo, Yosefe na Maria balyumfwene pa lwe pange lya kwikala muli bunacisungu.”

Nangu ni fyo, Baibolo ishimika uyu mulandu mu nshila yapusanako. Ubulondoloshi bwa kwa Mateo busoso kuti Yosefe “tayampene na Maria mu cupo ukufikila afyalo mwana umwaume.” (Mateo 1:25, New American Bible, iya ciKatolika, utulembo tupindeme twesu.) Pa numa ya kufyalwa kwa kwa Yesu, icupo ca kwa kwa Yosefe na Maria tacali ca bunacisungu iyo. Umulandu umo uushinina ici wa kuti, inshita imbi mu bulondoloshi bwa Malandwe, Yesu ashimikwa ukukwata bamunyina ne nkashi shakwe.—Mateo 13:55, 56.

Muli fyo, ilintu Baibolo isoso kuti Maria aali ni nacisungu ilyo afyele Yesu, tapaba ubushininkisho bwa kulandila ukuti atwalilile ukuba nga nacisungu inshita yonse iyo aikele na Yosefe.