Ukukusha Abana aba Mibele Isuma Bushe Kuti Cacitika Ilelo?
ROBERT GLOSSOP, uwa mu kabungwe ka Vanier Institute for the Family mu Ottawa, ku Canada, asosa ukuti, “Nomba twikala mu bwikalo bwapikana nga nshi, ubwa ntambi shalekanalekana, ubushakwata mafunde yapalana aya mibele isuma.” Cinshi cafumamo? Ukushimika kwa nyunshipepala ya The Toronto Star kwatila: “Abapungwe ukupula amafumo, abaice aba lubuli no kuipaya kwa bapungwe fyonse fileya pa ntanshi.”
Ubu bwafya tabuli fye ku North Amerika kweka iyo. Umukalamba wa kabungwe ka Center for Human Development uwa pa Brown University ku Rhode Island, U.S.A, aalifwailisha iyi milandu mu Britain ne fyalo fimbi ifya ku Bulaya, pamo na mu Australia, Israel, na Japan. Alanda pa lwa kubwelela pa nshi ukwa macalici, amasukulu, ne fifulo fimbi mu kupayanishisha abacaice ubutungulushi. Ukulingana ne fyo aishiba, ulutambi lwesu “talwaishiba ifyo abana bakabila pa kuti bengakula ku kuba abantu bene bene no kuiteka.” Ukulosha ku mpandamano pa mikushishe ya bana ishifunda ukuti “ukusalapula abana kuti kwaonaula ubumi no butuntulu bwabo,” Damon aebekesha icishinka ca kuti uku “e kulangilila abana ifya kuba bacintomfwa ba ku mufulo.”
Cinshi ico abana ba shino nshiku bakabila? Lyonse bakabila ukukansha kwabamo kutemwa uko kulungika umuntontonkanya no mutima. Abaice abalekanalekana bakabila ukusalapula ukwalekanalekana. Nga twabomfya ukutemwa, ilingi line ukusalapula kuti kwacitwa mu nshila ya kupelulushanya. E mulandu wine twaebelwa pa Amapinda 8:33 ‘ukumfwa ukusalapula.’ Lelo, bamo, ‘tabasalapulwa ku fyebo’ fyeka fyeka. Icingabasalapula fye, pa kukanaumfwa kwabo, kulimunwa kulepeelwa mu kulinga. (Amapinda 17:10; 23:13, 14; 29:19) Lintu Baibolo yasuminisha ici, tailekoselesha ukulimwina mu cipyu nelyo ukupumina imfwila, uko pambi kwingakwebulula umwana no kumucena. (Amapinda 16:32) Ukucila, umwana afwile ukutesekesha umulandu alelungikilwa no kwiluka ukuti ni co abafyashi balyangwako kuli ena.—Linganyeniko AbaHebere 12:6, 11.
Uko kufunda kwa Baibolo ukubomba kabili ukwa mano kwalilondololwa bwino mu citabo citila Icaba Inkaama ku Nsansa sha Lupwa.