Ica Kucitika Icishingalabwa mu France

MWI tauni lyonse mwali ifipampa fyalembelwepo ati: “TATULEFWAYA UMUSUMBA WA BAYEHOVA!” Ibumba limo ilya bakakaanya lyakonkomeshe aliti: “Bonse Natwikatane mu Kulwisha Ubukuule bwa baYehova.” Amanyunshipepala yasabankenye imyanda ya malyashi ku cintubwingi pa lwa uyu mulandu. Bakalata ba kulomba balisainwe, ne miina ya matrakiti ukucila pali 500,000 ayalelanda pa bukuule yaiswishe imbokoshi sha ku posti ofeshi. Bushe bwali bukuule bwa musango nshi ubwaletele icimfulumfulu mwi tauni lya cibote ilya Louviers, ilyabela pa kati ka kapinda ka ku kuso na masamba aka France? Bwali bukuule bwa maofesi no mwa kwikale Nte sha kwa Yehova mu France.

Yehova Alemesha

Umulimo wa Nte sha kwa Yehova mu France watendeke ku kupwa kwa myaka ya ba 1800. Icifulo ica kubalilapo apalefikila impapulo sha Baibolo caiswilwe mu 1905 mu Beauvène, ku kapinda ka ku kulyo aka France, kabili ukutula mu 1919, iofesi ilinono lyatendeke ukubomba mu Paris. Mu 1930, amaofesi ya France yaliswilwe mu musumba wa Paris, kabili mu mwaka wakonkelepo ababomfi ba pe ofesi bakuukile mu Ng’anda ya Bethel iyabelele mu Enghien-les-Bains, ku kapinda ka ku kuso aka Paris. Pa numa ya Nkondo ya Calo iya Cibili, ulupwa lwa Bethel lwalibwelelemo ku Paris, kabili mu 1959 amaofesi yakuushiwe ku cikuulwa ca ntunti shisano mu Boulogne-Billancourt, lwa ku masamba ku nse ya musumba wa bwangalishi uwa Paris.

Apantu umulimo wa kushimikila Ubufumu walisandulwike, mu 1973 ifikuulwa umwa kupulintila no kutumina impapulo fyalikuushiwe ku Louviers, apalepa amakilomita 100 ku masamba ya Paris, lelo amaofesi yashele mu Boulogne-Billancourt. Nangu cibe fyo, ukwingilishiwako ukwa bakasabankanya mu France kwalengele ifikuulwa mu Louviers ukucepa, te mulandu no kulundako ukwacitilwe mu 1978 na 1985. E co bapingwilepo ukukushako ifikuulwa no kuleto lupwa lonse ulwa Bethel capamo pa cifulo cimo. Nga fintu cilumbwilwe pa kutendeka, abengi mu Louviers tabatemenwe ubu bukuule. Te mulandu no kukaanya kwa musango yo, incende yalimoneke apalepa kilomita umo na hafu ukufuma pa cikuulwa umwa kupulintila. Pa myaka 6 kwali ukubombesha, kabili mu kupelako, pa numa ya myaka 23 iya kupaatukana, ulupwa lonse ulwa Bethel lwatendeke ukwikala capamo mu Louviers mu August 1996.

Mu kusekelela ibumba lya nsansa ilya bantu 1,187, ukubikako 300 aba mu lupwa lwa Bethel mu France, na 329 abafumine ku maofesi 42 aya mu fyalo fimbi, balongene pa November 15, 1997, pa Cibelushi, ku kukutika kwi lyashi lya kupeelwa kwa fikuulwa ilyalandilwe na Munyina Lloyd Barry, uwa mwi Bumba Litungulula. Nangu cibe fyo, apantu ilyo ifikuulwa fyalepeelwa kwali ubulwani e lyo na kampeni wa pa mulabasa uwatantalila uwa kuseebanya Inte sha kwa Yehova mu France onse, bapingwilepo ukuti baNte bonse aba mu France balingile ukusangwako ku kusefya uku kucimfya. Icafuminemo ca kuti pa November 16, pa Mulungu, ukulongana kwaibela ukwa mutwe wa kuti “Ikaleni mu Kutemwa kwa kwa Kristu” kwaliteyanishiwe pa Villepinte Exhibition Center, ku kapinda ka ku kuso aka Paris. Inte sha kwa Yehova mu France onse pamo na baNte abalanda iciFrench mu Belgium na Switzerland balilaalikwe, ukubikako fye ne filonganino mu Britain, Germany, Luxembourg, na mu Netherlands.

Ukulongana Ukwa Lulumbi

Amapekanyo ya uku kubungana yatendeke ninshi kucili imyeshi 6. Lyene, imilungu ibili pa ntanshi ya kupeelwa, bakensha ba fimbayambaya fya mu France balifwitile imilimo, no kucilika imisebo iikalamba no kucilikila amafuta ya bamotoka. Bushe imipando ne fibombelo fimbi fyali no kufika bwangu? Bushe ukucilika imisebo kwali no kulesha bamunyina ukwisa? Caletele ukwilulukwa kuli bonse, lintu mu mulungu umo wine bakensha ba fimbayambaya batendeke ukubomba, na bamotoka balitendeke ukwenda mu misebo na kabili. Mu cungulo bushiku pali Cisano ilyo ifikuulwa fishilapeelwa pa Cibelushi, ifimbayambaya 38 fyatwele imipando 84,000 ku fiyanda fibili ifya kusonkela ifyali no kubomfiwa. Bamunyina na bankashi ukucila pali 800 balibombeshe ubushiku bonse ukufika 09:30 hrs pa Cibelushi mu kubika imipando, icisebele, ifisoselo, ne fya kutambilapo amavideo ifikalamba 9.

Pa Mulungu ulucelo ne nshita ya 06:00 hrs, ifibi fyaliswilwe, kabili bacinkupiti batendeke ukwingila. Amashitima 17 ayalipililwe kabela yaletele baNte ukucila pali 13,000 ku musumba wa bwangalishi uwa Paris. Bamunyina na bankashi baali ku fitesheni fya mashitima ku kusengela abalendo no kubashindika mu mabumba ku cifulo ce bungano. Nkashi umo asosele ukuti uku kutantika kwa kutemwa kwaletele “ukuyumfwa ukucingililwa no mutende.”

Bamo baishile ku Paris mu ndeke nelyo muli bamotoka. Nangu cibe fyo, icinabwingi cabomfeshe amabasi 953, lelo baNte abekala mu ncende ya Paris babomfeshe ifya kwendelamo ifya cintubwingi pa kuya ku Exhibition Center. Abengi baendele bushiku bonse nelyo baimine pa myabo ku matundaca, lelo mu kumonekesha balicincimwike pa kusangwa ku kulongana. Ukuposhanya mu kucincimuka no kukumbatana mu cikabilila kwalangishe ukuti ifibusa ifishalemonana pa myaka iingi fyalikumene na kabili. Imifwalile ya bana calo yalangishe ukuti ibumba lya nsansa lyafumine mu fyalo fyalekanalekana. Ukwabulo kutwishika, ifipapwa fyaleenekelwa.

Ukufika ku nshita ya 10:00 hrs lintu programu atendeke, takwali imipando iyasheleko, nalyo line, cila miniti imyanda ya bantu baleishilako fye. Umuntu nga alolesha apali ponse, alemona abantu abamwentamwenta. Amakana baliminine nelyo ukwikala pa nshi pa konkili. Pa kulangisha umupashi wa mutwe wa kulongana, abacaice abengi mu kutemwa baimine pa mipando pa kuti abakoloci bengekala. Abaupana bamo balembele ukuti: “Fintu twali aba nsansa ukupeela imipando kuli bamunyina na bankashi abo tushaishibe, lelo abacindamisha kuli ifwe!” Abengi balangishe imibele iisuma iya kuipusula: “Muli programu onse twaiminine fye mupepi ne mipando twayafwilishe ukubika mu bushiku bonse ubwa pali Cisano. Lelo ukusangwako fye, kwalengele ukuti twisulemo ukutasha Yehova.”

Te mulandu no kunaka nelyo ukubipilwa, abasangilweko balikutikishe ku malipoti ukufuma ku fyalo fimbi na ku malyashi ya kwa Munyina Lloyd Barry na Daniel Sydlik, na o uwa mwi Bumba Litungulula. Munyina Barry alondolwele pa lyashi lya kuti “Yehova Alapeela Amaka Ayengi,” kabili mu kusupawila akomaile pa fyo Yehova apaala abantu bakwe no kwingilishiwako te mulandu ne fya kwesha ifyalekanalekana. Ilyashi lya kwa Munyina Sydlik lyakwete umutwe wa kuti “Ba nsansa Abantu Abo Yehova E Lesa Wabo!” Yonse aya malyashi, yalandilwe pa nshita yalinga apantu pali iyo nshita Inte sha kwa Yehova mu France shalekumanya ukukaanya. Munyina Sydlik alangishe ukuti insansa sha cine cine tashashintilila pa mibele ya ku nse lelo shashintilila pa kwampana kwesu na Yehova ne mibele yesu iya mutima iya bumi. Lintu aipwishe ibumba ati, “Bushe muli ne nsansa?” bayaswike mu kutoota kwa kuwelesha.

Nkashi umo “uwalufishe insansa” aishilelemba ukuti: “Apo pene nalikutulwike ukuti insansa shali fye mupepi na ine. Kanshi nalepilikita fye mu nshila yalubana, kabili ukupitila muli ili lyashi, Yehova anangile ifyo nalekabila ukwaluka.” Munyina umbi alandile ati: “Nomba ndefwaya ukulwisha pa kuti ningalenga umutima wa kwa Yehova ukusamwa. Nshilefwaya icili conse ukufumyapo ukusekelela uko ntendeke ukumfwa lwa nkati.”

Ilintu ukulongana kwafikile ku nsondwelelo, ceyamani mu kucincimuka abilishe impendwa ya basangilweko: 95,888—ukulongana kwakulishapo ukwa Nte sha kwa Yehova mu France!

Pa numa ya lwimbo lwa kwisalila, ulo abengi baimbile ninshi baleponye filamba fya kusekelela, na pa numa ye pepo lya kulekelesha, bamunyina baimine ulwendo lwa kuya ku mwabo mu bulanda. Abengi balimwene ukuti pali uku kulongana pali imibele ya cikabilila kabili iya bucibusa. Bakensha ba mabasi balishimike ifisuma pa lwa mibele ya basangilweko. Na kabili icabacebwishe cimbi ni fintu amabasi 953 yafumine pa Exhibition Center mu maawala fye yabili ukwabulo kucilika imisebo! Imisango ya basangilweko yalitashiwe sana ku babomfi ba mashitima na ku babomfi ba fya kwendelamo ifya cintubwingi. Calengele kube ukulanshanya kusuma, no bunte busuma bwalicitilwe.

“Amenshi mu Ciswebebe”

Umutumwa Paulo akonkomeshe Abena Kristu banankwe ati: “Twetetule umwa kucincimushanisha ku kutemwa kabili ku kubombe milimo isuma; . . . tukonkomeshanye, pali bufi apo mulemono Bushiku bulya bulepalama.” (AbaHebere 10:24, 25) Te ca kutwishika, uku kulongana kwaibela kwaletele ukukoselesha kukalamba kuli bonse, kwali nga “menshi mu ciswebebe” nga fintu nkashi umo akulondolwele. Bamunyina abafumine ku maofesi ya Togo balembele ukuti: “Twafuminepo abakoshiwa, abakoseleshiwa, abakuulililwa, kabili abapampamina mu kucilapo ukusekelela mu mulimo wa kwa Yehova.” Kangalila umo uwa muputule atile: “Abakungumana baile ku mwabo ne nsansa.” Umbi na o atile: “Bamunyina balicincimushiwe no kukoshiwa.” Calengele ukuti abaupana bamo balembe ukuti: “Tatwatalile atuyumfwapo abapalamina ku kuteyanya kwa kwa Yehova nge fi.”

Kemba wa malumbo abilishe ukuti: “Amakasa yandi yaiminino mwatambalala; mu nkuta e mo nakulacindikila Yehova.” (Ilumbo 26:12) Ukulongana kwa musango yo kwaafwa bonse ukunonka ukwiminina kwa ku mupashi lintu kwaima ifipindami. Nkashi umo asumine ati: “Te mulandu no bucushi, inshita sha musango yu ishaibela shilafwatikwa mu mitima yesu kabili lyonse shikalatusansamusha.” Mu kupalako, umo kangalila wenda alembele ukuti: “Lintu kwaimako inshita shayafya, ukwibukishe citontonshi ca musango yu ica Paradise kukatwaafwa ukubomba na sho.”

Ilumbo 96:7 likonkomesha ukuti: “Tuutubuleni Yehova, mwe ndupwa sha bantu na bantu bonse, tuutubwileni Yehova ubukata no bukose!” Ukwabulo kutwishika, ukupeelwa kwa fikuulwa fipya ifya maofesi mu France, kucimfya kukalamba ukwa kwa Yehova. E walengele ukuti ubukuule butunguluke pe samba lya kukaanya ukwa musango ulya ukwa mupampamina kabili ukwasaalala. Inte sha kwa Yehova mu France bali abapampamina mu kucilapo ‘ukwikala mu kutemwa kwa kwa Kristu’ no ‘kulenga ulubuuto lwabo ukubalika.’ (Yohane 15:9; Mateo 5:16) Bonse abasangilweko kuli programu wa kupeelwa kwa fikuulwa mu kushininkisha bakwata ukuyumfwa kwa kwa kemba wa malumbo ukwa kuti: “Ici cafuma kuli Yehova, cene ca kupapa mu menso yesu.”—Ilumbo 118:23.

[Icikope pe bula 26]

Lloyd Barry

[Icikope pe bula 26]

Daniel Sydlik

[Icikope pe bula 26]

Abasangilwe kuli programu waibela ku Villepinte Exhibition Center baali 95,888

[Ifikope pe bula 28]

Amakana ya basangilweko baliminine nelyo ukwikala pa nshi pa kuti bengakutika