Bushe Maria Aafwile Imfwa ya Cifyalilwa?

UKULINGANA ne nyunshipepala ya Vatican iya L’Osservatore Romano, icifundisho ca ciKatolika ica Inshiku Nkulu ya Kupakata Maria citila: “Nacisungu Uushaba ne Sambi, uwabakwa ku kukowela konse ukwa lubembu lwa kubalilapo, aninine ku bukata bwa ku muulu umubili no mweo, ilyo ubumi bwakwe pa calo bwapwile.” Iyi nyunshipepala yatile ici cisambilisho calilenga bamo abasoma ifya mipepele aba ciKatolika ukutunga ukuti Maria “taafwile kabili atwelwe mu bukata bwa ku muulu ilyo line fye ukufuma pa calo.”a

Nomba line fye, Papa John Paul 2 alandile ifyapusanako pali uyu mulandu. Pa kukumana kwaleitwa General Audience ukwabeleele ku Vatican pa June 25, 1997, atile: “Icipingo cipya tacalondololapo nangu cimo pa mfwa ya kwa Maria. Apo tapaba ifyalandwapo ici kuti calenga umo ukutunganya ukuti yali fye ya cifyalilwa, iyo tushingalandapo ne fyebo fine fine. . . . Abalando kuti taafwile imfwa ya cifyalilwa tabakwata ubushinino.”

Amashiwi ya kwa Papa John Paul yasokolola ukuluba kukalamba ukwaba mu cisambilisho ca Kwimitwa Uwabulo Lubembu. Nga ca kuti nyina wa kwa Yesu aali “uwabakwa ku kukowela konse ukwa lubembu,” ni shani fintu Maria engafwa “imfwa ya cifyalilwa,” iyaletelweko no lubembu ulwaishila muli Adamu? (Abena Roma 5:12) Ubu bwafya mu fya mipepele bwalengwa ne mimwene yanyonganikwa pa lwa kwa nyina wa kwa Yesu iye calici lya ciKatolika. Te ca kupapa ukuti amalekano ne cimfulumfulu fyaliima mu calici lya ciKatolika pali uyu mulandu.

Ilintu Baibolo ilondolola Maria pamo ngo waicefya, uwa busumino, kabili uwaipeelesha, taitila ico akwatila iyi mibele mulandu wa “kwimitwa uwabulo lubembu.” (Luka 1:38; Imilimo 1:13, 14) Baibolo itila fye: “Bonse nababembuka, kabili bapelebela ku bukata bwa kwa Lesa.” (Abena Roma 3:23) Ee, Maria apyene ulubembu no kukanapwililika nga fintu abantu bonse abashala bapyana, kabili takwaba ubushininkisho ubuli bonse ubulangililo kuti afwile imfwa ishili ya cifyalilwa.—Linganyeniko 1 Yohane 1:8-10.

[Futunoti]