Nani Afwile Ukupeelwo Mulandu?

ABENGI bapeela Lesa umulandu pa mafya bapitamo. Ipinda lya mu Baibolo litila: “Ubupumbu bwa muntu umwine bonaula ubumi bwakwe, kabili lyene afimbila Shikulu.” (Amapinda 19:3, The New English Bible) Nalyo line, ukupeela Lesa umulandu pa fya kalanda ificitikila umuntu cimo no kupeela kapanga wa motoka umulandu wa kulenga amasanso ya pa musebo ayalengwa na bucakolwa.

Lesa alipeela abantu ubutungulushi bushaiwamina mu Cebo cakwe, Baibolo. Ukupitila mu kubelenga ili buuku lya kwa Lesa no kumfwila amafunde ne fishinte lyakwata, kuti twasengauka amafya ayengi aya mu bumi. Mu kupusanako, ukukanakonka ubutungulushi bwa kwa Lesa kulaleta amacushi. Ku ca kumwenako, abaliisha, abapeepa fwaka, abanwesha, nelyo abacita bucisenene ilingi line cilabaletela amalwele yabipisha. (Luka 21:34; 1 Abena Korinti 6:18; 2 Abena Korinti 7:1) Umutumwa wa Bwina Kristu Paulo alembele ukuti: “Ico umuntu abyala, e co akalobolola. Uubyala ku mubili wakwe wine, ku mubili akalobololako ukubola; lelo uubyala ku Mupashi, ku Mupashi wine akalobololako umweo wa muyayaya.”—Abena Galatia 6:7, 8.

Ifyo cawamisha ukumfwila amafunde ya kwa Lesa ne fishinte fyakwe! Nga twayomfwila, ubulayo Lesa alandile ukupitila muli kasesema Esaya bukaba ubwa cine kuli ifwe ubutila: “Ine ndi Yehova Lesa obe, uukusambilisho kuti ucenjele, uukwensha mu nshila iyo ufwile ukuyamo. Iye, nga wapeepeka ku mafunde yandi! lyene umutende obe nga waba ngo mumana, no bulungami bobe nga mabimbi ya bemba.”—Esaya 48:17, 18.