Bushe Bashimapepo Bonse Balisumina mu fyo Basambilisha?

E LINTU fye umulume wa mwanakashi umo afwile. Umupatili alondolwele ukuti umulume wakwe taali umusuma ica kuti engasuminishiwa ukuya ku muulu kabili taali uwabipa ica kuti engaya ku mulilo wa helo. E co, ukulingana no mupatili, alelungulushiwa ukufika akasuminishiwe ukuya ku muulu. Alipila umupatili indalama pa kuti apepeleko umulume wakwe alubulwe bwangu ukufuma mu mutwala. Uyu mukamfwilwa aikushiwa kuli ci, ayumfwa ukuti ifyo asuminamo e fyo umupatili asuminamo.

Bushe uyu mukamfwilwa takakalifiwe lintu aishibo kuti umupatili wakwe cine cine tasumina ukuti abafwa balalungulushiwa? Abengi balapelenganishiwa pa kwishibo kuti bashimapepo abengi tabasumina mu fyo basambilisha. Inyunshipepala ya National Catholic Reporter, pa kulanda pa fyo yaitile “ubwafya ubwacila pali bucisenene bwa bapatili,” yalandile ukuti: “Abapatili abengi balileko kusumina ukuti Lesa e ko aba nelyo mu cifundisho ca kulambula no kulungulusha nelyo ica kubuushiwa . . . kabili ukukanasumina kwa bashimapepo kwalisanguka umwata.”

Na mu macalici yambi muli ubwafya bumo bwine. Inyunshipepala ya Canberra Times iya ku Australia ishimiko kuti lintu bashimapepo ba Church of England baipushiwe, casangilwe ukuti abengi “tabasumina mu fisumino fya kutendekelako ifya buKristu pamo ngo kufyalwa kwa kwa Yesu kuli nacisungu, ifipesha amano fya kwa Yesu no kwisa kwa bubili ukwa kwa mesia.”

Kalemba wa fya mipepele, George R. Plagenz aipwishe fintu shimapepo engaba na kampingu musuma pa kulumbula ifyebo fya cisumino ico tasuminamo. Shimapepo umo alandile ukuti ayalwile fye ifyebo fya cisumino, ifitila, “Nasumino kuti.” Alandile ukuti: “Ntendeka ukulumbula icisumino ne fyebo fya kuti, ‘BASUMINA muli Lesa Tata Uwa maka yonse . . . ’” Plagenz alandile ukuti bumumbimunda bwa musango yo “bufumfuntungu bwabipisha mu calo ca United States of America.”

Ku ca bulanda, uku kukanasumina kwa bashimapepo no bufumfuntungu bwabo fyalilenga abengi ukusuula imipepele yonse. Lelo kuliko na cimbi icipelenganya abantu pa lwa mipepele ilelo. Abengi abaya ku calici basambilishiwo kuti Baibolo Cebo ca kwa Lesa. Bushe bakapapa nga baishibo kuti ififundisho fimo ifyo icalici lyasuminamo pa nshita ntali te fya mu Baibolo? Icipande cakonkapo calabebeta ica kumwenako cimo.