Ilyashi lya Bakabilisha ba Bufumu
Ukushimikila mu ‘Nshita Iyene na mu Nshita Iishiyene’
LINTU inkondo yapuulike mu calo ca Bosnia na Herzegovina, amakana baliculile icabipisha. Pali iyo nshita yaafya, Inte sha kwa Yehova shalyeseshe apapela amaka ukukoselesha abantu no kubapeela isubilo. Pano pali fiputusha fya kalata yalembelwe ne Nte iyabombele pa nshita inono mu Sarajevo.
“Ifintu nafyafya kuno, lelo abantu baleankula bwino nga nshi ku cine ca Baibolo. Inte kuno shaba ca kumwenako cawamisha ica kushipikisha. Bapiina sana, lelo nabakwata imibele ishaiwamina. Mupepi na bacaice bonse mu cilonganino batumikishi ba nshita yonse. Bakasabankanya bapya balekoseleshiwa no ku kupimpa, kabili balapoosa amaawala 60 nelyo ukucilapo cila mweshi mu butumikishi ukutendeka fye mu mweshi wa kubalilapo mu mulimo.
“Pa mbali ya kushimikila ku ng’anda ne ng’anda, twalyeseshe inshila shalekanalekana isha kulanda na bantu. Ku ca kumwenako, lintu twaanenye impapulo sha Baibolo ku nshinshi ishingi isha mu musumba, abaleya ku nshinshi balyankwileko bwino.
“Ubunte bwalipeelwa na mu fipatala mwine. Mu Dipartimenti ya Malwele ya ku Mutima pa cipatala cimo ica mu Sarajevo, dokota mukalamba apokelele Loleni! ya December 8, 1996 iyakwete ifyebo pa lwa bulwele bwa ku mutima. Alefwaya amakope na yambi pa kuti akapeeleko badokota bambi. Lyene Inte shalisuminishiwe ukutandalila abalwele bonse mu dipartimenti yakwe. Muli fyo, ukucila fye pe awala limo, bamagazini ukucila pali 100 balyananishiwe ku masanshi yonse. Abalwele abengi batile e muku wa kubalilapo ukupempulwa mu cipatala ku kukoseleshiwa no kupeelwa isubilo.
“Inshita na imbi bamagazini balelanda pa bana bashalikwe ku Dipartimenti Undapa Abana. Umukalamba wa badokota alisumine ukupokelela na makope yanono aya Icitabo Candi ca Malyashi ya mu Baibolo aya kubika mu muputule wa kubelengelamo. Nomba banyina abaya mu kupempula abana balababelengela amalyashi ya mu Baibolo cila bushiku. Calitantikwa no kuti uyu dokota akatandalilwe ku ng’anda.
“Ku Sarajevo kwalibako amakana ya bashilika ba NATO [North Atlantic Treaty Organization] abafuma ku fyalo fyalekanalekana. Aba nabo balishimikilwa sana. Inshita shimo tulungama ku fimbayambaya fyonse ifya bashilika tulebomfya akatabo ka Good News for All Nations pamo na bamagazini ba Ulupungu lwa kwa Kalinda na Loleni! mu ndimi shalekanalekana. Twashalike bamagazini ukucila pali 200 mu nkambi ya bashilika abena Italy. Ica kusungusha, abashilika abena Italy abengi batile tabatala abalanshanyapo ne Nte sha kwa Yehova. Nangu cibe fyo, twalilanshenye na bo ku Sarajevo.
“Bushiku bumo icimbayambaya ca bashilika caliminine mu mbali ya musebo. Nakonkonseshe pali motoka no mwamfuli wandi, kabili umushilika alifumine. Namutambike Ulupungu lwa kwa Kalinda ulwaleti ‘Inkombe sha Mutende Ni Bani?’ Umushilika alindoleshe no kwipusha ati, ‘Bushe uli Nte ya kwa Yehova? Ilyo namwaswike, atile, ‘Yangu, na kuno kanshi e ko mwaba! Bushe pano isonde paliba icifulo ukushaba Inte?’”
Umutumwa Paulo afundile ati: “Bile cebo; cincila inshita iyene ne nshita iishiyene.” (2 Timote 4:2) Ukupala abasumina banabo isonde lyonse, Inte sha kwa Yehova mu Sarajevo balecite co, nangu fye ku busanshi no busanshi na ku fimbayambaya fya bashilika fyonse!