Ukutandala Kwacindama Kwalenga Abena Cishi Ukusamwa

Nomba icishi ca Cuba tacashalila mu fya mipepele. Mu kupwa kwa 1998 Inte sha kwa Yehova ishikala muli ici calo ca mu West Indies shasukile shapokelela ipaalo shalelolela pa nshita ntali. Pa muku wa kubalilapo mu myaka ukucila pali 30, aba mwi Bumba Litungulula ilya Nte sha kwa Yehova balitandele, kabili bali pamo na batandashi bambi 15 abafumine ku Australia, Austria, Belgium, Great Britain, Italy, New Zealand, na Puerto Rico.

MWANDI iyi yali ni nshita yacindama kuli bakasabankanya ba Bufumu 82,258 mu Cuba na ku bantu 87,890 abalongene pamo na bo ku kusefya Umulalilo wa kwa Shikulu muli shinde wa 1998!

Ukufuma pa December 1 ukufika ku 7, 1998, Lloyd Barry, John Barr, na Gerrit Lösch batandalile Bethel ya mu Havana kabili balisangilweko ku Mabungano ya Citungu yamo mu Cuba aya “Imikalile ya Bukapepa.” Balisansamwike pa kukumanya baeluda benda na pa kwishibana na balashi ba buteko bwa Cuba.

John Barr asosele ukuti: “Mu fya teokrasi iyi yali ni nshita yacindama kuli ine no mukashi wandi. Mu Cuba bamunyinefwe batemwikwa na bankashi balipimpila icine nga nshi! Naliimwenene ukuti bumunyina bwa mwi sonde lyonse bwaliwamisha icine cine!” Lloyd Barry alundapo ati: “Uyu mulungu wacindama wanengele ukumfwikisha bwino ifyaleponena bamunyinefwe mu Cuba.”

Mu myaka isano iyapitapo, Inte sha kwa Yehova mu Cuba balishipeelako ubuntungwa bwa kupepa, kabili imilandile ya buteko bwa Cuba ilenga umo ukusumina ukuti bulefwaya uku kwaluka kutwalilile.

Mu September 1994, umulimo wa kupulinta walitendeke pa Bethel ya mu Havana. Na kabili, Inte sha kwa Yehova shatendeke ukulongana no kushimikila ku ng’anda ne ng’anda ukwabula ukubelama. Mu kupwa kwa 1998, ubuteko bwasuminishe ibumba lya Nte sha kwa Yehova 18, ukusanshako batatu aba mwi Bumba Litungulula, ukutandalila icalo ca Cuba.

Ukusansamuka Pa Numa ya Kukumana Na Kabili

Lintu abeni bafikile pa cibansa ca ndeke ica José Martí Airport mu Havana, bapokelelwe ku balashi ba buteko na kwi bumba ilyafumine pa Bethel apali na munyina uwaibukishe lintu Milton Henschel uwa mwi Bumba Litungulula alekeleshe ukutandalila ku Cuba mu 1961. Uyu munyina pali iyo nshita ali ne myaka 12; nomba ni kangalila wenda.

Lintu abeni bafikile pa Bethel, balimwene amaluba ayalekanalekana ayabalabata, ayo munyina alimine aka kashita. Ifilamba fyaleiponena fye ilyo ulupwa lwa Bethel lwalesengela abeni. Pa numa, baishileliila pamo ica kulya ca cina Cuba ica munani wa nkumba iyaocewa, umupunga, na cilemba, umusalu uubishi, umusalu uwitwa yucca capamo na mojo (umuto wa garliki na mafuta ya miolife), ne fitwalo ifiteku. Ilyo bapwile ukulya, umo umo uwa mwi Bumba Litungulula alandile ilyashi lya kukuulilila pa lwa bucindami bwa mulimo wa pa Bethel. Amashiwi ya kwa Munyina Lösch maka maka yali aya kukoselesha, ilintu alandile kuli bamunyina mu cina Spain. Mu lupwa lwa Bethel ababomfi ba kuitemenwa aba nshita yonse baba 48 e lyo abakwaafwa baba 18.

Nangu cingati ifitabo na baBaibolo ifibomfiwa na bamunyina mu Cuba fipulintwa mu Italy, bamagazini ba Ulupungu lwa kwa Kalinda na Loleni! aba fikope fyafiita ne fyabuuta bapulintwa mu Cuba mwine, pali bamashini babili aba kukopolola. Pa kupulinta fye bamagazini bonse abakabilwa, ukubomba amaawala ayengi no kubomba umulimo wa kubwekeshabwekeshapo kulakabilwa. Aba babomfi ba kuitemenwa balikatamika sana ukubombela Yehova.—2 Abena Korinti 4:7.

Ifyapulilemo pa Mabungano

Abeni 18 balipaatukene mu mabumba yatatu pa kuyasangwa ku mabungano ya citungu yatatu ku Havana, Camagüey, na Holguín. Pali bumo bumo ubwa nshiku shitatu, ibumba likalamba ilya bamunyina na bankashi, ukusanshako baeluda abengi na bapainiya, balilaalikwe ukuyasangwa kwi bungano limo na limo. Nangu cingati Inte sha mu Cuba shalyebelwe ukuti uku kulongana kwali ukwaibela, tashaishibe ukuti aba mwi Bumba Litungulula bakasangwako. Elenganyeni fintu bapapile lintu pali Cisano ulucelo bamwene aba bamunyina na bakashi babo baleika mu mabasi ya kusonkela!

Amabungano yabelele mu fifulo fya kulonganinamo ifya pa lwalaala ifyakuulilwe na bamunyina ilyo basuminishiwe no buteko. Pa mabwe ya pa mwinshi wa ciyanda apabelele ibungano lya mu Havana, palembelwe ilembo lya “Amalumbo 133:1.” Ici cacinkwileko bamunyina pa lwa mashiwi yasangwa pali lilye lembo ayatila: “Moneni, ifyo kwawama kabili ifyo kwa nsansa ukwikalilila pamo kwa ba bwananyina!” Ukwabulo kutwishika, pali ili bungano, pali ukubishanya ukwawama kabili ukwa nsansa ukwa Bwina Kristu.

Abatandashi balitashishe pa fyo amalyashi no kwipusha fyalandilwe bwino, kabili balitemenwe icilangililo pa lwa Babele wa pa kale ica mu Baibolo ukufuma muli Daniele icipandwa 3. Nkashi umo alandile ukuti: “Bonse abaciba mu cilangililo bacibomba bwino, kabili amashiwi yaciba bwino ica kuti tatwacishiba ukuti yakopelwe fye pali tepu. . . . Umwina Babele umubifi acilamoneka umubi icine cine, kabili abaHebere batatu bacilamoneka abashangila kabili aba mupampamina.”

Aba mu cipani ca Office of Religious Affairs na balashi bambi aba buteko abaile ku kumona amabungano balitashishe bamunyina pa mateyanyo yasuma ne mibele yabo iisuma. Munyina Barry alitashishe nga nshi ubuteko bwa Cuba pa fyo bwatangete bwino abeni. Bamunyina balitootele pa nshita ntali pa kutasha amalyashi no buteko ubwabasuminishe ukukwata amabungano. Ulupwa lumo ulwa Bwina Kristu lwatile: “Te fyo twacilaenekela—ili lyaciba libungano linono ilya pa kati ka fyalo! Lyaciwama nga nshi, pantu lyatupeelo bushinino bwa kuti Yehova alikwata ubulamba bwa kufikilisha amalayo yakwe.”

Na kabili aya mabungano yalengele ukuti bambi beshibe bwino Inte sha kwa Yehova. Kensha umo uwa basi alisangilweko kwi bungano pa Cibelushi na pa Mulungu. Alandile ukuti alyumfwile ifingi pa lwa Nte sha kwa Yehova, lelo nomba alishibe ukuti bantu abasuma kabili aba mutende.

“Ifintu Tushakalabe”

Abeni balitemenwe icongwe na bucibusa bwa bena Cuba. Abena Cuba balicincila, balikwata imibele isuma, kabili ba cikuuku. Umweni umo atile: “Imiku fye iingi, abo tushaishibe baletwafwa.”

Abeni batemenweko sana icitetekelo, insansa, no kutemwa ifyalangilwe ne Nte shinabo mu Cuba. Te mulandu na mafya yakalamba, balitetekela Yehova nge cubo cabo. (Amalumbo 91:2) John Barr atile: “Ifintu ifingi fye fyalimpapwishe icine cine lintu natandele umuku wa kubalilapo ku Cuba, pamo nga ukuyemba kwa ici calo, imibele isuma iya bantu nakumenye, kabili maka maka insansa isho Inte sha kwa Yehova sha mu Cuba shakwata. Kwena nshatala umfwapo ukwimba kwa kufuma ku mutima ukwa musango yo ukwa nyimbo sha Bufumu no kutoota kwatantalila lintu ifya ku mupashi fyabafika pa mitima! Ifi e fintu tushakalabe. Tukalafiteesa pe.”

Amalumbo 97:1 yatila: “Ifishi ifingi fisamwe.” Cine cine, Inte sha kwa Yehova mu cishi ca Cuba shilasamwa pa kukwatilako ubuntungwa bwa kupepa Lesa, na pa kutandalilwa ne li bumba lya beni bafumine ku nse ya Cuba.

[Ifikope pe bula 8]

Indupwa ishingi shalisangilweko ku Mabungano ya Citungu ayaibela aya “Imikalile ya Bukapepa”

[Icikope pe bula 8]

Bethel ya mu Havana yaiswilwe cipya cipya mu 1994

[Icikope pe bula 8]

Aba mwi Bumba Litungulula basainina abalashi ba buteko baBaibolo ba bupe