Ilyashi lya Bakabilisha ba Bufumu

“Kuli Lesa Fyonse Fingacitwa”

Aya mashiwi ayaba pali Mateo 19:26, yalibombele ku mwanakashi wa ku Venezuela. Ilyo asambilile ukucetekela Yehova umupwilapo, alicimfishe ubwafya bwakakala. Umfweni ifyo ashimika:

“Bamama bali aba cikuuku kabili aba kutemwa. Ku ca bulanda, balifwile ilyo nali fye ne myaka 16. Imfwa yabo yanshile uwabombomana icine cine. Amano yalifulungene, naleikala fye mu ng’anda, nshalefwaya no kufuminako na pa nse. Kwempe fye nga nasangwike umutukami.

“Nshaleya ku sukulu, e lyo no kubomba nshalebomba. Naleikala fye mu ng’anda mu muputule wandi. Nalipopomenwe nga nshi pantu naleikala fye neka, no munandi nshakwete. Naleimona kwati ndi cipooswa fye, kabili nalefwaya ati mfwe fye cipwe. Lyonse naleiipusha ne mwine ati, ‘Cinshi nafyalilwe?’

“Bamayo baalepokako Ulupungu lwa kwa Kalinda na Loleni! ku mukashana Gisela, Inte ya kwa Yehova. Kasuba kamo bamayo bamwene Gisela alepita kabili balimwipwishe nga kuti anjafwilishako. Alisumine ukweshako, lelo nalikeene ukumonana nankwe. Gisela tafuupwilwe pali filya nakeene. Anembeele kalata wa kunjeba ukuti alefwaya ukuba cibusa wandi kabili kuli na umbi uwacindama nga nshi ukucila Gisela na o wine uwalefwaya ukuba cibusa wandi . Atile uyo muntu ni Yehova Lesa.

“Ici calimpitile ku mutima, kabili na ine nalimulembeele kalata. Twalelembeshanya bakalata pa myeshi itatu. Alitalile ancincisha no kunkoselesha imiku ne miku, e lyo nasukile nasumina ukumonana na Gisela. Ilyo twamonene umuku wa kubalilapo twasambilile Baibolo mu citabo ca Kuti Waikala Kuli Pe na pe muli Paradise Pe Sonde. Ilyo twapwile ukusambilila, andaalike ukusangwako ku kulongana ku Ng’anda ya Bufumu. Calimpeseshe na mano. Nshafuminepo pa ng’anda imyaka ine, kanshi naletiina nga nshi ukwenda mu musebo.

“Gisela alintekanishe nga nshi. Alinkoseleshe ukuti nshifwile ukutiina kabili atile tukendela pamo pa kuya ku kulongana. Nasukile nasumina. Ilyo twafikile ku Ng’anda ya Bufumu, natendeke ukututuma no kupiba. Nalifililwe ukuposha uuli onse. Nangu cibe fyo, nalitwalilile ukusangwa ku kulongana, kabili Gisela apampamine pa kuntandalila cila mulungu.

“Pa kuti enganjafwa ukucimfya umwenso, Gisela alebangilila sana ukunsenda no kuya ku Ng’anda ya Bufumu. Twaleiminina pa mwinshi tuleposha onse fye lintu afika. Ico calengele ukuti ndeposha umuntu umo nelyo babili pa kashita kamo, ukucila ukuposhanya ne bumba lyonse. Ilyo naletontonkanya ati nshakakumemo, Gisela anjebele amashiwi yaba pali Mateo 19:26, ayatila: ‘Ku bantu ici tacingacitwa, lelo kuli Lesa fyonse fingacitwa.’

“Nangu cingati calinkosele, nasukile nasangwako na ku kubungana kwa bantu abengi, ku kulongana kwa muputule. Mwandi uko kwali kwaluka kukalamba kuli ine! Mu September 1995, nalipamine no kweba baeluda ukuti ndefwaya ukubombako ubutumikishi bwa ku ng’anda ne ng’anda. Ilyo papitile imyeshi 6, e kutila mu April 1996, naliilangile ku cintubwingi ukuti naliipeela kuli Yehova ukupitila mu kubatishiwa.

“Nomba line ilyo umo anjipwishe icanengele ukushipa nge fyo ukufika ku kubatishiwa, natile: ‘Icalenga ukucimfya umwenso pantu ndafwaya ukuteemuna Yehova.’ Nangu cingati inshita shimo ndapopomenwako, ndatwalilila ukusekelela muli bupainiya bwa nshita yonse. Nga naibukisha ifyo nali kale, ndasumina ifyalandile Gisela. Nomba nalikwata Cibusa wandi, Yehova, uwantemwa kabili ‘uunkoselesha. ‘”—Abena Filipi 4:13.

[Ifikope pe bula 8]

“Icalenga ukucimfya umwenso pantu ndafwaya ukuteemuna Yehova”