“Mwe Yehova, Mwansanga!”

Nga Fintu Cashimikwa na ba Nelly Lenz

Naipwishe abaume babili abaishile pa mwesu ukuti: “Bushe muli Nte sha kwa Yehova?” Bayaswike abati: “Ee.” Kabili nabilikishe ati, “Na ine wine ndi Nte!” Nali fye ne myaka 13 kabili nshaleya na ku Ng’anda ya Bufumu. Abafyashi bandi tabali Inte sha kwa Yehova. Lelo bushe, cinshi nalandiile ukuti ndi Nte ya kwa Yehova?

AKUBULA Inte sha kwa Yehova, nga nshafyelwe. Bamayo baimite ifumo lyandi ilyo bali fye ne myaka 17 ilyo baleikala mwi tauni lya Montreal, mu musumba wa Quebec, mu Canada. Balupwa babo balibapatikishe ukuponya ifumo. Na bo balisumine.

Bamayo balombele ukuti bebombo bushiku bumo ku ncito pa kuti bayefumya lilye fumo. Lelo umukalamba wa ncito uwali Nte ya kwa Yehova alyumfwile umulandu bamayo balefwaila ukukanabombela incito pali ubo bushiku. Uyu mukalamba wa ncito alondolwelele bamayo mu kwipifya ukuti ubumi bwaba ca bupe ca mutengo nga nshi. (Amalumbo 139:13-16) Ilyo bamayo baleya ku cipatala, baletontonkanya amashiwi yalandile abakalamba ba ncito. Kabili bapingwilepo ukukanafumya ifumo. Ilyo nafyelwe mu 1964 bamayo bantwele ku ng’anda uko basungila abana ba nshiwa.

Umuku wa Kubalilapo Ukuumfwa Icine ca mu Baibolo

Ilyo nali napamo ne myaka ibili, bamayo pamo na batata ba cibili, balimfumishe ku ng’anda uko basungila abana ba nshiwa. Ilyo twaleikala mwi tauni lya Sainte-Marguerite-du-Lac-Masson, batendeke ukusambilila Baibolo ne Nte sha kwa Yehova, kabili balesangwa na ku kulongana kwa pa cilonganino. Lelo, ilyo twakuukiile kwi tauni lya Boisbriand, abafyashi bandi balilekele ukusambilila Baibolo.

Ilyo papitile imyaka iinono, balitendeke ukusambilila na kabili. Kabili nga njikele akatalamukila naleumfwa uko balesambilila pa fyo Baibolo yalaya ukuti isonde likaba paradaise. (Luka 23:43) Ico canengele ukutemwa Yehova nga nshi.

Bushiku bumo bamayo banjebele ukuti nabaleka ukusambilila ne Nte sha kwa Yehova kabili nabaleka no kuya ku Ng’anda ya Bufumu. Pa kubala, nalitemenwe sana. Apo nali umwaice ne myaka 8, nalemona kwati ukulongana kwalekokola sana. Nomba bulya bwine bushiku banjebele fyo, inshita ya bushiku nalefwaya ukulanda na Yehova mwi pepo, kabili nalisakamene ukuti napamo Yehova taumfwe ipepo lyandi.

Ubushiku bwakonkelepo ubwa pa Mulungu icungulo kasuba, namwene abena mupalamano abali Inte sha kwa Yehova bafuma baya ku kulongana ku Ng’anda ya Bufumu. Natendeke ukulila no kwipusha Lesa nati, “Nga cinshi ico abana babo bela ku kulongana e lyo ine nshiyako?” Nangu cibe fyo amashiwi yaba pa Amalumbo 33:18 ya cine ayatila: “Moneni, amenso ya kwa Yehova alosha pa bamutiina, abalolelo luse lwakwe.”

Ukubwelela ku Ng’anda ya Bufumu

Pa numa ya milungu itatu natandalile abena mupalamano kabili naebele abafyashi ba pali yo ng’anda baLilianne ukuti ndefwaya ukulasangwa ku kulongana. BaLilianne balondolwele ukuti te kuti cicitike pantu bamayo tabafwaya ukucita icintu nangu cimo icikumine Inte sha kwa Yehova. Awe ine nakoselepo fye. E pa kuntwala ku ng’anda kabili baipwishe bamayo nga kuti cawama ukuti na ine ndekonka ku kulongana. Nalipapile ukuumfwa bamayo basumina. Balandile ukuti ukulongana kukanenga ukuba ne mibele iisuma. Awe natendeke ukuya ku kulongana lyonse pa bushiku bwa pa Mulungu.

Nalesangwa ku kulongana kwa pa cilonganino mupepi ne myaka itatu. Lelo ilyo nali ne myaka 11, abafyashi bandi balilekene, kabili ine na bamayo twaile mu kwikala kumbi. Na kabili nalekele ukumonana ne Nte sha kwa Yehova.

Ukumonana na Bantu Nshaleenekela Ukumona

Bushiku bumo naikele pa matabo ya kwingilila mu ng’anda yesu, e lyo baNte babili, baEddie Besson na baDon Fisher—baishile pa mwesu. Baipwishe abafyashi bandi nga e po bali. Ilyo nayaswike ukuti tabalipo, aba baume balipilibwike no kuya. Lelo nalibakonkele ulubilo, kabili ni pali iyi nshita e lyo twalanshenye yalya mashiwi nandile pa kutendeka.

Kwena balya baume babili balipapile ukuumfwa nalanda ukuti ndi Nte ya kwa Yehova. Nalibalondolwelele ne fyo naleikala pa ng’anda kabili nabalombele no kuti babwele na kabili bulya bwine bushiku mu cungulo. Ilyo naebele bamayo ukuti baNte balaisa mu nshita ya cungulo, balikalipe nga nshi kabili balandile no kuti tababasuminishe ukwingila mu ng’anda. Na kuba balepanga no kufumapo ilyo tabalafika. Napaapeete bamayo ninshi ndelila no kulila ukutila befumapo. Ilyo baleipekanya ukutila baye, twaumfwile umuntu akonkonsha ku ciibi, ukwisulako twamwene baEddie Besson. Ala nalitemenwe ilyo bamayo basumine ukutendeka ukusambilila Baibolo na kabili!

Awe e fyo natendeke ukulongana na kabili! Lelo no mwaka tawakumene bamayo na kabili balilekele ukusambilila Icebo ca kwa Lesa. E ico pali yi nshita balinkeenye ukumfwana na baNte mu nshila yonse fye kabili bapoosele impapulo shonse isha Nte sha kwa Yehova isho twakwete. Nomba nafishilepo Baibolo, icitabo ca lwimbo, amabaundi volyumu ya Ulupungu lwa kwa Kalinda yabili, na ma Yearbook of Jehovah’s Witnesses yabili e lyo ne citabo citila Icine Icitungulula ku Bumi bwa Ciyayaya.a Ilyo nalesambilila umuku wa kulekelesha naipwishe baEddie Besson pa fyo ningacita, apo nalitemenwe Yehova nga nshi. Bankoseleshe ukusambilila pa lwandi no kulapepa lyonse. Banjebele ukuti nangu cibe shani, Yehova akansakamana. Iyo nshita nali fye mupepi ne myaka 14.

“Ukulongana” Neka mu Muputule wa Kulalaamo

Ukutula ilyo, lyonse fye pa bushiku bwa pa Mulungu naleya mu muputule wandi no kucita filya fine twalecita ilyo twalelongana. Naleimba ulwimbo lutila: “Tonta Amenso Yobe pa Cilambu!” lyonse pa kutendeka e lyo na pa kupwisha ukulongana kwandi pantu e lwimbo ulwa Bufumu fye ulo naleibukisha. Ukufika no bwa lelo, lyonse ilyo naimba ulu lwimbo ifilamba filapona. Na kabili nalesambilila icipande mu Ulupungu lwa kwa Kalinda mu mabaundi volyumu nakwete. Nalesondwelela “ukulongana” kwandi ne pepo. E ico nangu ca kuti nshalesangwa pamo ne Nte sha kwa Yehova, naleyumfwa ukuti Yehova ali mupepi na ine.

Ilyo nali ne myaka 17, ine na bamayo twakuukile ku Montreal. Ilya myaka yalyafishe pantu pa ng’anda tapali icitemwiko nangu panono.

Yehova Ansanga!

Bushiku bumo bamayo bapokele icitabo ca Kuti Waikala Kuli Pe na pe muli Paradise Pe Sonde ku Nte sha kwa Yehova. Ilyo nabwelele nasangile icitabo cili pe tebulo kabili natendeke ukucibelenga. Ilyo namwene ukuti nacikwata ishina lya kwa Lesa Yehova natendeke ukulila kabili mu mutalalila napepele ati, “Mwe Yehova mwansanga!”

Nalefwaya ukulondola bamunyinane na bankashi aba Bwina Kristu. Nomba nali no kubalondola shani? Bamayo banjebele ukuti umwina mupalamano amoneka kwati ni Nte ya kwa Yehova. Ilyo naleya ku ncito, naile pa ng’anda ya mwina mupalamano no kukonkonsha ku ciibi. Awe umwaume uwali no tulo pa menso alishile no kwisulako. Alipapile icine cine ukuumfwa ukuti ndi Nte ya kwa Yehova kabili nalefwaya ukubatishiwa! Apekenye nkashi wa Bwina Kristu ishina lyakwe ni Josée Miron ukuti ndesambilila nankwe Baibolo. Lelo na kabili bamayo batendeke ukunkaanya ukusambilila Baibolo. Banjebele ukuti mfwile ukuba ne myaka 18 e lyo ningabatishiwa ukuba Inte ya kwa Yehova.

Yehova Alicindama Ukucila Balupwa

Abakalamba ba ku ncito nalebomba balimwene ukuti ifintu pa ng’anda fyaile filebipilako fye. E ico ilingi line bena pamo na bena mwabo balensenda lyonse pa mpela ya mulungu ku kwikala na bo. Apo nalitemwa bakabalwe, ilingi line twalenina pali bakabalwe e lyo twalaya tulashinguluka. Naleumfwa kwati aba bene, e bafyashi bandi.

Bushiku bumo abakalamba ba ncito pamo na bakashi babo banjebele ukuti balintemwa sana kabili balefwaya ukuti nkuukile ku mwabo. Balandile pa cintu ico nalefulukisha ukukwata, e kuti ulupwa lwa citemwiko. Lelo ansumina ukwikala na bo nga nali no kuleka ukusangwa pamo ne Nte sha kwa Yehova. Banjebele ukutontonkanyapo umulungu onse, lelo nabaswike fye bulya bwine bushiku. Natile Yehova tatala ndekelesha, e ico na ine wine te kuti muleke.

Ifyo Nabombeele Lesa

Pa mulandu wa bwafya nalekwata pa ng’anda, nasalilepo ukukuukila kuli batata abaleshi. Bankoseleshe ukutwalilila ukusambilila, kabili pa December 17, mu 1983, ilyo nali ne myaka 19 nalibatishiwe. Nalitemenwe nga nshi ukumona baEddie Besson pa bushiku nalebatishiwa. Pali iyi nshita kwena bafwile tabaletwishika ukuti cine cine ndi Inte ya kwa Yehova!

Lelo ku ca mupamba ilyo fye nabatishiwe, batata abaleshi balyalwike. Baleti fye nga bamona natendeka ukupepa, ninshi na bo batendeka ukupanga icongo, ukubilikisha pa kulanda no kundasa ifintu! Kabili balempatikisha ukulundapo amasomo, lelo ayo masomo yali no kupumfyanya ubuyo bwandi ubwa kubomba bupainiya, e kutila kashimika wa mbila nsuma uwa nshita yonse. Pa kulekelesha basukile banjeba ukufuma mu ng’anda yabo. Bampele ceke ya K480,000 no kunjeba ukuti ilyo nkaya mu kupoka indalama ku banki, e lyo nkeshiba ati Yehova tansakamana.

Natendeke bupainiya pa September 1, mu 1986, kabili ukufika na lelo ncili nalikwata ilya ceke. Nshaibomfeshe ku kupoka shilya ndalama ku banki! Limo limo caleafya ukushimikila mu mpanga ukwabula motoka. Lelo aba mu cilonganino cesu balengafwa nga nshi no kuntungilila.

Mu kuya kwa nshita, namonene no mwaume Umwina Kristu uwa cikuuku, ishina lyakwe ni Ruben Lenz. Twalyupene mu 1989. BaRuben pali nomba ni baeluda mu cilonganino ca mwi tauni lya Milton, mu Ontario, mu Canada, umo twaikala ukutula mu mwaka wa 2002. Icupo cesu caba pa mapaalo yakalamba ayo Yehova ampeela. Natwalilile mu mulimo wa kushimikila inshita yonse mpaka nelyo twakwete umwana wesu uwa kubalilapo, Erika, mu 1993. Ilyo papitile imyaka itatu, twakwete umwana mwaume na umbi ishina lyakwe ni Mika. E ico pa numa ya kuba neka pa myaka iingi, Yehova Lesa alimpaalile apakalamba pa kumpeela ulupwa ulwa temwa Yehova filya fine na ine wine namutemwa.

Nangu ca kuti inshita ne nshita nshaleba na bantu ba kwa Yehova ilyo nalekula, nshatalile ndeka ukushintilila pali Lesa, lelo natwalilile ukucetekela no kusubila ukuba no mweo wa muyayaya muli Paradaise. (Yohane 3:36) Cine cine ndatasha ukuti Yehova ‘alinsangile’!

[Futunoti]

[Icikope pe bula 31]

Ninine pali kabalwe wa bakalamba ba ncito

[Icikope pe bula 31]

BaNelly Lenz na balume babo, BaRuben, e lyo na bana, Erika na Mika