Bushe Muleibukisha?
Bushe mwalisangile ukuti muli bamagazini bafumine nomba line aba Ulupungu lwa kwa Kalinda mwali ifyebo ifyacindama kuli imwe? Aleni kanshi esheniko ukwasuka amepusho yali pano mumone nga muleibukishapo fimo:
◻ Fipusho nshi fibili ifyaafwa Abena Kristu abengi abakabila ukuipingwila abene pa lwa ncito balingile ukwingila?
Icipusho cacindama ica kubalilapo ca kuti: Bushe uyo wine mulimo ndefwaya ukubomba walisenukwa mu Baibolo? Icipusho ca bubili ca kuti: Bushe uulebomba aleafwilisha icibelesho casenukwa?—4/15, ibula 28.
◻ Ni mu nshila nshi ‘ifibumbwa fya buntunse fyalengelwe ukulamba ku kuicusha fye’? (Abena Roma 8:20)
‘Twalengelwe ukulamba’ pa mulandu wa ncitilo sha bafyashi besu aba kubalilapo, Adamu na Efa. ‘Tatwaitemenwe,’ e kuti te ifwe twasalilepo nga umuntu umo umo ukuti ico citucitikile. Twacipyene fye. Apo Yehova wa nkumbu, nangu line bali no kupisha ukukanapwililika, ulubembu, ne mfwa, alibasuminishe ukufyala abana. E fyo ne mfwa yayambukile ku bantu bonse. E mwalola amashiwi ya kuti Lesa alengele ‘ifibumbwa ukulamba ku kuicusha fye.’—5/1, ibula 5.
◻ Mulandu nshi cibelele ica mano ukulanda ukuti kukabako ‘ukwiminina umuntu mwashila’ ukwa “ca muselu” ku ntanshi? (Mateo 24:15)
Ku numa kulya, ‘ukwiminina kwa ca muselu umuntu mwashila’ kwalelosha ku kusansa kwa bena Roma abatungulwilwe na Mushika Gallus mu 66 C. E. Muno nshiku, ukusansa kwapala kulya, e kutila ukubalamuka kwa “bucushi bukalamba,” kucili ku ntanshi. (Mateo 24:21) Kanshi, “ica muselu icipomona,” cicili tacilaiminina umuntu mwashila.—5/1, amabula 16 na 17.
◻ Bushe bawishi nelyo banyina ababomba kuti basangako shani inshita ya kubako capamo na bana?
Banyina abanaka icibi pa kwinuka ku ncito kuti baita abana ku kwipikila na bo capamo. Bawishi ababa ne fya kucita ifishaifulila pa mpela ya mulungu kuti babombelako capamo na bana imilimo imo imo.—5/15, ibula 6.
◻ Cinshi ‘abenda mu nshila ya kwa Yehova’ bafwile ukucita? (Yeremia 7:23)
Ukwenda mu nshila ya kwa Yehova cifwaya bucishinka—ukupampamina pa kubombela wene eka. Cifwaya ukucetekela—icitetekelo cakumanina ica kuti ifyo Yehova alaya kuti fyacetekelwa kabili fikacitika. Ukwenda mu nshila ya kwa Yehova kufwaya icumfwila, e kutila ukukonka amafunde yakwe ukwabula ukupaasuka no kusungilila ifipimo fyakwe ifya pa muulu. (Amalumbo 11:7)—5/15, ibula 14.
◻ Milimo nshi iyacindama ine intu “ifya bupe ku bantu” fingabomba? (Abena Efese 4:8)
Kuti batulungika mu kunakilila, kuti batukuula mu kutemwa, kuti batwafwa ukwikatana bwino ne cilonganino, kabili kuti batucingilila mu kushipa. (Abena Efese 4:12-14)—6/1, ibula 14.
◻ Cinshi twingasambililako ku fyo Paulo abombeele capamo na bantu nalimo 100 abalumbulwa mu Imilimo na muli bakalata alembele?
Tufwile lyonse ukubombela capamo no kuteyanya kwa kwa Lesa, capamo ne cilonganino cesu, kabili capamo na ba bwananyina. Tulakabila baletwaafwa, baletukoselesha, kabili baletusansamusha mu nshita iiyene ne ishiyene.—6/1, ibula 31.
◻ Fishinka nshi fitatu ifya kushinina ifyabamo ukupelulula ifyo twingabomfya ku kwafwa bambi ukutontonkanya pa lwa kwa Kalenga?
Ukulinganya twamona mu bubumbo, intendekelo ya bumi bwaba pe sonde, no kuibela kwa bongobongo wa bantunse ukushingakaanwa ne mibombele ya uko iyapikaana.—6/15, ibula 18.
◻ Mulandu nshi ukumfwikisha ubupilibulo bwe shina lya kwa Kalenga ilya pa lwakwe kwacindamina?
Ishina lya kwa Lesa lilangilila ukuti “E Ulenga Ukubako” kabili lilangilila ukuti fyonse ifyo afwaya ukucita alacita. Ukupitila mu kwishiba no kubomfya ishina lyakwe, kuti twatesekesha bwino ukuti alafikilisha amalayo yakwe kabili alabombelapo ku kufikilisha imifwaile yakwe.—6/15, ibula 21.
◻ Bushe abana kuti basanshiwamo shani mwi sambililo lya Baibolo ilya lupwa?
Nga cingacitika, lekeni umwana umo umo akwate Baibolo wakwe no lupapulo mulesambililamo. Uwacaice kuti aipushiwa ukulondolola icikope cili mwi sambililo, umunono kuti aebelwa libela ukwisabelengako ilembo. Umukalambako kuti aebwa ukwisalanda pa nshila twingabomfeshamo ifyebo filesambililwa.—7/1, ibula 15.
◻ Buyo nshi bumo bumo ubo ulupwa nalimo lwingabombelapo pa kupekanya ukulongana kwa pa cilonganino?
(1) Umo umo mu lupwa ukuipekanya ukuyaasukapo mu kulongana; (2) umo umo ukubombela pa kwasuka mu mashiwi yakwe; (3) ukusanshamo amalembo mu fyasuko; na (4) ukutontonkanyapo pa fyebo ku kumona ifya kufibomfya mu bumi.—7/1, ibula 20.
◻ Cinshi icaba e makii ku cupo icisuma?
Pa kwisula no kuipakisha ubuseko bwaumo mutengo ubwa cupo cisuma, icintu cimo icikabilwa kulanshanya kusuma. Ukulanshanya kusanshamo ukulanda pa fyo muleyumfwa ne fyo muletontonkanya. Ukulanshanya kusuma kubimbamo ukulanda pa fintu ifya kukuulilila, ifya kupembesula, ifisuma, ifya kutasha, ne fya kusansamusha. (Abena Efese 4:29-32; Abena Filipi 4:8)—7/15, ibula 21.
◻ Cinshi caba ‘inshila ya kwa Yehova’? (Amalumbo 25:8, 9, 12)
Iyo nshila yaba kutemwa. Yashimpwa pa kucita icalungama ukulingana ne fipimo fya kwa Lesa. Baibolo ilanda ukuti ukutesekesha uko kutemwa kwa cishinte yaba e “nshila iyacilamo.” (1 Abena Korinti 12:31)—8/1, ibula 12.