Ilyashi lya Bakabilisha ba Bufumu

Ukutendekako Ukwishiba Lesa wa Kutemwa

UMWINA Brazil uwe shina lya Antônio, ilintu ali ne myaka 16 ali kale kale uwafiitwa no bumi. Ukumona ubumi ubwa bucafye kwamulengele ukubomfya imiti ikola no kukunkuma ku bwalwa. Pa miku iingi alepanga no kuipaya. Cali ni pali iyi nshita e lintu aibukishe ifyo banyina bamwebele ukuti: “Lesa kutemwa.” (1 Yohane 4:8) Lelo bushe uyu wine Lesa wa kutemwa ali kwi?

Pa kuti engaleka ukubomfya imiti ikola no kunwensha ubwalwa, Antônio aipwishe shimapepo wa pa minshoni uwabela lwa ku mwakwe ukumwafwa. Nangu ca kutila Antônio alepepa mu calici lya ciKatolika, nalyo line ali ne fipusho ifingi. Ku ca kumwenako, alipapile pa mashiwi ya kwa Yesu ayatila: “Mukeshibe cine, ne cine cikamulenga abantungwa.” (Yohane 8:32) Buntungwa nshi Yesu alaile? Icalici talyapeele Antônio ifyasuko fya kwikusha ku fipusho fintu akwete. Mu kupita kwa nshita, Antônio alekele ukuya ku calici kabili abwelele ku fibelesho fyakwe ifya kale. Na kuba, alicililenapo ukuba uwakunkuma.

Pali iyi ine nshita, bamuka Antônio, batampile ukusambilila Baibolo ne Nte sha kwa Yehova. Nangu ca kuti Antônio talekaanya umwina mwakwe ukusambilila Baibolo, lelo alisuulile Inte sha kwa Yehova ukuti “mipepele ya bena Amerika iyabelako ku kubombela imitekele ya maka iya bena Amerika.”

Ukwabula ukubwelele numa, umwina mwakwe alesha mu ng’anda bamagazini ba Ulupungu lwa kwa Kalinda na Loleni! abalebamo ifipande ifyo aletontonkanya ukuti Antônio kuti atemwa ukufibelenga. Apantu Antônio alitemenwe ukubelenga, inshita shimo aleceba muli bamagazini nga umwina mwakwe afuma pa ng’anda. Pa muku wa kubalilapo mu bumi bwakwe, Antônio asangile ifyasuko ku fipusho ifyo aleipusha pa lwa Baibolo. Antônio atile: “Kabili natampile ukulamona ukutemwa ne cikuuku cintu umwina mwandi ne Nte balenanga.”

Ukufika pa kati ka 1992, Antônio na o wine apingwilepo ukusambilila Baibolo ne Nte sha kwa Yehova. Nangu cibe fyo, atwalilile fye ukulabomfya imiti ikola no kunwensha ubwalwa. Bushiku bumo ninshi nabwila sana ilyo Antônio no munankwe balebweluluka ku ng’anda ukufuma kwi komboni limo ifi, balibeminike kuli bakapokola. Lintu bakapokola basangilishe Antônio na cocaine, batampile ukumuma. Kapokola umo apoosele Antônio mu matipa kabili atontele ne mfuti lwa mupepi na ku menso. Kapokola umbi apundile ukuti: “Mwipaye!”

Ilyo Antônio alambalele mu matipa, akutulwike ifyo bumi bwakwe bwali. Ifisuma fye kuli wene fintu aibukishe fyali lupwa lwakwe na Yehova. Alipepele mu kwipifya, ukulomba ukwafwa kwa kwa Yehova. Apabula no mulandu uuli onse, bakapokola balimulekeleko. Antônio aile ku ng’anda, uwashininwa ukuti Yehova e wamupokolwele.

Antônio atendeke ukusambilila Baibolo na kabili mu mukoosha. Panono panono, aishileyalula ubumi bwakwe pa kuti engasekesha Yehova. (Abena Efese 4:22-24) Ukupitila mu kukusha ukuteko mutima, atampile ukucimfya ubwafya buntu akwete ubwa miti ikola. Nalyo line, alekabila ukwafwa kwa cipatala. Ukusungila Antônio mu kiliniki iyafwa abakunkuma pa myeshi ibili kwamupeele ishuko lya kubelenga impapulo shimo shimo isha Baibolo, ukusanshako icitabo ca Ukwishiba Uko Kutungulula ku Mweo wa Muyayaya. Antônio alisambilisheko fye na balwele bambi ifintu asambilile muli ishi mpapulo.

Pa numa ilyo Antônio afumine mu kiliniki, atwalilile ukusambilila Baibolo ne Nte. Pali lelo, Antônio, abena mwakwe, pamo na bana babo babili abakashana, kabili na banyina babombela Yehova pamo ngo lupwa lwa nsansa kabili ulwaikatana. Antônio atila: “Nomba nalyumfwikisha ubupilibulo bwine bwine ubwa mashiwi ayatila ‘Lesa kutemwa.’”

[Icikope pe bula 8]

Ukushimikila mu Rio de Janeiro