Icalo Cabulamo Abapuupu

CACITIKE mu kwangufyanya nga nshi. Umwaume uwafwele ubusaka asontele imfuti mu mutwe wa kwa Antônioa pa mwinshi wa ŋanda yakwe mu São Paulo, Brazil, ukupinda imfungulo ne fipepala fya kuli motoka wakwe, kabili mu kwangufyanya akunkulwike na motoka.

Mu Rio de Janeiro, pa menso ya mwana wakwe umwanakashi uwa myaka ikumi, abantu bane abakwete fyanso banashishe umwaume uwe shina lya Paulo. Lyene, pa numa ya kuya na motoka ku ŋanda ku mwakwe, ifipondo fyaingile no kwiba fintu fyalefwaya, ukwisusha bamotoka ba kwa Paulo babili. Ukutiinya umukashi wa kwa Paulo ne mfwa, balisendele wene pamo no mubomfi ukuya na bo pamo nge fikatilo ukuya kwi tuka lya kwa Paulo ilya fibekobeko ilya mu kati ke tauni, ilyo bailesamununa fyonse ifya mutengo. Mu kukanaenekela, nangu ni fyo, abapuupu pa numa batumine lamya, ukulumbula kuntu bashile bamotoka.

Fintu ciba ica kusakamika ukwibilwa indalama shanonkelwe mu bucushi ne fipe! Nangu cingatila atemwa Antônio nelyo Paulo tababombele muli yo nshila, bambi basende funde mu minwe yabo. Kuti pambi balenga umupuupu ukumfwo kutapata, atemwa kuti pambi balufya ubumi bwabo bwine. Ku ca kumwenako, lintu uwacaice asompwele inkoloko ya mwanakashi, umwanakashi umwina Brazil wakalifiwa afumishe imfuti mu cola cakwe no kulasa umupuupu, ukumwipaya. Cinshi cafuminemo? O Estado de S. Paulo yacita lipoti ukuti: “Abantu abacitile ubunte icacitike balumbilishe imibele ya kwa namayo wabulo kwishibikwa, kabili takwali uwafwaile ukwaafwa bakapokola ukumusokolola.” Nangu cingatila bafuluka icalo cabulamo abapuupu, Abena Kristu tabalandula nga fintu ulya mwanakashi acitile. Apantu icilandushi caba kuli Lesa, bomfwila amashiwi ya pa Amapinda 24:19, 20 aya kuti: “Wilalunguluka pa ncitatubi, wiikatilwa ababifi akalumwa; pantu takwakabe cilambu ku mubi.”

Lelo nga ca kuti wasanswa, cinshi wingacita? Ica kucitika mu Rio de Janeiro cilelanga ifyo cacindama ukutwalilila ukuba uwatekanya. Umwina Kristu, Heloísa, aali pa lwendo lwa muli basi ku kutungulula isambililo lya Baibolo. Abantu babili batendeke ukwibila abaninine muli basi. Ukufika pa citesheni apo aali no kwikilila, Heloísa abebele ukuti aali umo uwa Nte sha kwa Yehova no kuti aleya ku kutungulula isambililo lya Baibolo. Alangishe Baibolo wakwe ne citabo ca kwaafwa ukusambilila. Ukwabulo kumwibila, abapuupu bamupeele ulusa lwa kufuma. Uwanininemo na umbi, nangu ni fyo, tasuminishiwe ukuya. Namutekenya pa numa atile tatalile amonapo icapala cene.

Regina na o atwalilile ukuba uwatekanya ilyo akambishiwe ku baume babili abaipangeshe ne fyanso ukuti engile muli motoka wakwe. Ukulangisha kope wa pa lwakwe uwa magazini wa Loleni!, Regina acitile ubunte. Apo ifipondo fyaletutuma, abalombele ukwisula mu kakusungilamo umo abikile baswiti. Lelo lintu bamwene amatepu ya Kingdom Melodies, batampile ukukutika kuli isho inyimbo. Imibele pa kucililako kuba iya bucibusa, ifipondo fyapingwilepo ukusha Regina uwabulo kucenwa mu musebo, ukumwebekesha ukuti ali no kusanga umuntu uwali no kumwaafwa. Pa numa ya kwenda amaminiti ikumi, asangile iŋanda, lelo mwine ŋanda tali na maka ya kusumina ukushimika kwakwe, ukusoso kuti: “Taulemoneko kuti nausanswa; uli uwatekanya nga nshi.”

Nangu cingati icinakabupalu kuti pambi amoneka uwabulo kucenwa lwa ku mubili, ica kukumanya ca musango yo ica kuleto mwenso kuti calenga ifya kufumamo fya pa numa ifyakakala. ‘Icinakabupalu kuti pambi asanguka uwabulo kucingililwa, uwa lupato ukulola ku filundwa fya lupwa nelyo abo baleesha ukumwaafwa, ukukanacetekela bambi, uwafimbilikishiwa no kutolelesha utumilandu, ukuyumfwa ukuti icalo caliba no lufyengo,’ e fyacita lipoti O Estado de S. Paulo. Mu kupusanako, icinakabupalu uwacetekela muli Yehova Lesa ali uwapalishako kupula mu ca kukumanya uwabulo kucenwa lwa ku mubili na mu nkuntu. Nangu cibe fyo, bushe te kuti usumine ukuti kuti caba lipaalo nga takwali na kabili ulukaakala nelyo icili conse ica kulengo mwenso?

“Uwibile Eiba Kabili”

Nangu cingati abengi basalapo inshila yabo iya bumi ubwa bufunushi, Icebo ca kwa Lesa calyaafwa abapuupu ukwalula ukufwaisha kwabo no buntu. (Abena Efese 4:23) Pa kukwata imifwaile ya cine cine mu bumi, iyashimpwa pali Baibolo, balomfwila amashiwi ya kuti: “Kawama akanono aka mu bulungami, ukucile fya cibwesha ifingi ifili mu lufyengo.” (Amapinda 16:8) Cláudio ashimiko kuti: “Mupepi na bonse mu lupwa lwandi bali ni Nte, lelo ine nshatalile nkutika ku cintu balesosa pa lwa kwa Yehova ne mifwaile yakwe. Pa kubwela ukufuma pa lwendo lwa bakilomita mupepi na 2,000 muli motoka wa kwiba, nali no kupita pa fipindami fya bakapokola ifingi. Mu kucite fyo nailwike ukuti nalingile ukwalula ubumi bwandi. Nalyeseshe ukucite fyo akatanshi lelo ukwabulo kutunguluka. Pali iyi nshita natendeke ukutontonkanya pa lwa bantu bandi ababa ni Nte sha kwa Yehova na fintu baba abapusanako, abakwata ubuseko, insansa, no mutende.” Pamo nge ca kufumamo, Cláudio atendeke ukusambilila Icebo ca kwa Lesa, afumine ku miti ikola na ku fibusa fyakwe fya kale, kabili abele umutumikishi wa Bwina Kristu.

Bambi na bo nomba bomfwila amashiwi ya kuti: “Mwitetekela lumanimani, mwiba abatuuma mu kwiba.” (Ilumbo 62:10) Pa numa ya kukakwa pa kufwaya ukwipayo muntu lintu aleiba, José, uwakunkuma ku miti ikola kabili uwalefyusha imiti ikola, alinonkelemo mwi sambililo lya Baibolo na bukwe bwakwe. Alifumineko ku miti ikola kabili nomba ali ni Nte yapimpa.

Nangu cibe fyo, ubuntu bupya tabwisako fye mu kupumikisha nelyo mu cipesha mano. Oscar, uwali nabimbwamo mu kushika mu miti ikola na mu kwiba, ashimika ati: “Nalepepa mu kufumaluka nga nshi kuli Yehova ica kuti pa nshi ilingi line palemoneka nga bemba munono mu kuba ne filamba fyandi ifingi.” Ee, pa mbali ye sambililo lya mukoosha ilya Cebo ca kwa Lesa, ipepo lya mupampamina, ilya kufuma ku mutima lilafwaikwa. Moneni amano muli iyi mimwene yabamo ipepo: “Mwimpeela bupina nangu bucindami; mundiishe icilyo icinjene, epali naikuta, namukaana, no kutila, Ni ani Yehova? nalimo nabo mupina, no kwiba, kabili napelule shina lya kwa Lesa wandi.”—Amapinda 30:8, 9.

Bukaitemwe buli no kupyanikwapo no kutemwa kwa cine cine: “Uwibile eiba kabili; lelo ukucila acucutike, alebomba ku minwe yakwe icawama, ukuti akwate ica kupeelako uwakabila.” (Abena Efese 4:28) Pamo nga mu mulandu wa Bena Kristu bamo aba mu mwanda wa myaka uwa kubalilapo abo bali akale ‘abapuupu nelyo abafunushi,’ Yehova, ukupitila mu cilubula ca kwa Yesu Kristu, mu kubamo inkumbu aleleela abo abalapila. (1 Abena Korinti 6:9-11) Fintu caba ica kusansamusha ukuti te mulandu ne fyali inshita yesu iyapita, kuti twaalula umusango wesu uwa bumi no kupokelela ukusenamina kwa kwa Lesa!—Yohane 3:16.

Umutelelwe mu Calo Cipya ica kwa Lesa

Elenganya isonde lyabulamo abapuupu. Te kuti ukabile imibombele ikoshe funde iipinde fipooswe fingi iya bakapingula, baloya, bakapokola, ne fifungo! Kuti caba calo ca lubanda muntu umo na umo engacindika bambi ne fipe fyabo! Bushe ico caumfwika icishingasuminwa? Bushe Lesa mu cituntulu akanyantukilamo mu milandu ya buntunse no kupwisha bumpulamafunde? Twakulaalika ukubebeta ubushinino bwa kuti Baibolo yaba Cebo ca kwa Lesa no kuti amasesemo ya iko yalishintililwapo. Ukasanga icitendekelo cakosa ica kucetekela ukuti ukwaluka kuli pa ntanshi. Takuli nangu umo uwingacilikila Lesa ku kuletako ukwilulukwa ukwalaiwa kuli bonse abatemwa ubulungami ukwa kuti: “Wilalunguluka pa ncitatubi, wifinuka abacite fya bupondamishi; pantu bakabonsa bwangu ngo mulemfwe, kabili bakalokota nge cani citeku.” (Ilumbo 37:1, 2) Ayo mashiwi ayalembelwe kale sana mu kwangufyanya yali no kufikilishiwa mu kukumanina.

Ubufumu bwa kwa Lesa bukapwisha ukukungumana no bupulumushi, ifyo filenga ukupelelwa kwakule fi no kutwishika. Takwakabe nangu umo uukabulisha, ukuyumfwo kutitikishiwa ku kwiba. Twalyebekeshiwa mu busesemo kuti: “Mube ukupaka kwa ngano mu calo, na pa muulu wa mpili, fifukile nga Lebanone [wa pa kale] ifisabo fya ciko, kabili aba mu musumba babalule nge cani ca mu mpanga!” (Ilumbo 72:16) Mu cine cine, muli Paradise wabweshiwa, takwakabe icikapumfyanya umutende wa bantunse abaishiba no kupepa Lesa wa cine.—Esaya 32:18.

We cilambu fintu ico cikaba pa kucincintila inshila sha ici calo cafunuka! Amapinda 11:19 yatila: “Ubulungami bulola ku mweo; no bubi busupilo kulola ku mfwa.” Ee, pa numa ababifi bafitwa, takwakabe uukaba no mulandu wa kucelebensha ubumi nelyo ifipe fyakwe. Ilumbo 37:11 litupeela ubu bulayo: “Abalanda bakapyaninine calo, no kuilemeno bwingi bwa mutende.”

[Futunoti]

[Akabokoshi pe bula 5]

Ukubomba ne Fishinka fya pa Bupuupu

PA ŊANDA—Apantu abapuupu kuti basansa nampo nga e po muli nelyo iyo, sungeni ifiibi ifyaisalwa kabili ifyakomwa. Incenshi shalitasha ukukwata indibu nelyo imbwa. Ishibisheni umwina mupalamano wacetekelwa lintu mukafumapo pa kutuusha. Twalilileni ukuba abatekanya—ifipondo fibomba mu kwangufyanya, mu kubulo kwenekela, kabili kuti fyayalula amapange bwangu bwangu nga fyatendeka ukututuma. Nga ca kuti uli umo uwa Nte sha kwa Yehova, ishibishe we mwine kabili esho kucitilo bunte. Kuti pambi waba na maka ya kuletako bucibusa no kumfwilako uluse. Mwilacincintila kano nga mwasanswa lwa ku mubili.

MU CINTUBWINGI—Beni abaibukila ukumona nga ca kuti umo alemukonka. Endeleni pa kati na nkati ka kashila. Sengaukeni imisebo umwafita iyabulamo abantu. Sungeni icikwama cenu nelyo ifipe fya mutengo ifishasansalikwa. Endeni mu kupambana kwati muleyapo kumo. Sengaukeni ukufwala ifya kufwala fyaumo mutengo nelyo ifibekobeko fyabekesha. Akushiteni mu kuba no munenu nge mibele yacisuminisha. Sendeni fye indalama mulekabila, ukwakanishiwa mu matumba yalekanalekana nelyo ififulo.

MULI MOTOKA—Nga ca kuti “ukusompola bamotoka” kwaliba ukwaseeka mu ncende yenu, mwilaikala muli motoka wenu uwimikwe. Piteni inshila imbi pa kuya na pa kubwela ku ncito. Bomfyeni inshila iishasansalikwa sana ku busanso, nelyo ingaba iyashokoloka. Pa ntanshi tamulaimika motoka, cencenteni ukumona nga ca kuti icili conse cileimyo mutunganya. Sengaukeni ukwisula ica kubikamo ifipe ica kuli motoka mu ncende ukushipita bantu. Mwisha ifipe fya mutengo filemoneka muli motoka. Umunyololo wakomwa uulemoneka nelyo icibombelo cimbi ica kucingilila ubupuupu kuti cafupula abapuupu bashabelesha.

[Akabokoshi pe bula 6]

“Mwiilonganikila fyuma pano isonde, apo icipelebesha ca bushiku ne ndalawa filonaula, apo abapupu batulamo no kwiba: lelo ilonganikileni ifyuma mu muulu, umo icipelebesha nangu ni ndalawa tafyonaula, umo abapupu tabatulamo nangu kwiba.”—Mateo 6:19, 20