Ukundapa UKwabula Umulopa “E Myundapile Badokota Abengi Batemenwe”

PA MUTWE wa kuti “Ukundapa Ukwabula Umulopa,” magazini wa Maclean’s ashimike ilyashi lya kuti badokota ku Canada pa kati apa “bafwailisha imyundapile ipya, kabili mu myaka isano iyapita nabasangako imyundapile badokota abengi batemenwe.” Brian Muirhead, dokota wasoma ifya miti ya kulalikisha abalwele pa Winnipeg Health Sciences Centre na o aba pali badokota abafwailisha. Cinshi calengele ukuti atendeke ukufwailisha pa lwa myundapile yabula ukubikamo umulopa?

Mu 1986, Dokota Muirhead atile fye cibe cibe ilyo abombele umwaume wa myaka 70 uwakwete mumena pabi uwalesuuma umulopa, lelo pa mulandu wa co asuminamo ukulingana na Baibolo nge Nte ya kwa Yehova, alombele ukumundapa ukwabula ukumubikamo umulopa. (Imilimo 15:28, 29) Magazini wa Maclean’s ashimike ukuti, Dokota Muirhead “asukile abomfya umusango uo abengi bashibomfya sana, uwa kubika amenshi ayalimo umucele mu mulwele pa kuti umulopa wicepa. Ico cabombele fye bwino, kabili calengele Dokota Muirhead ukuitasha ukuti alilungike ilyo alandile ukuti fwe badokota ‘natucilamo ukubika umulopa mu balwele. Ndemona tufwile ukufwayako imyundapile imbi. ‘”

Icalenga batendeke sana ukufwailisha imyundapile yabula ukubikamo umulopa ni co “baletiina ukuti umulopa wa kubika mu balwele ukatendeka ukwafya sana ku ntanshi uku kabili abalwele abengi baletiina ukwambula amalwele mu mulopa.” Pa mulandu wa kuti badokota ba mano balifwailishako imyundapile ipya, Inte sha kwa Yehova na bantu fye bambi balimwenamo. Magazini wa Maclean’s alandile no kuti: “Iyi myundapile yalenga no kuti kwilaba sana ukubika umulopa mu balwele, kabili kulaba no kucefyanyako sana ubwafya bwa kwambula amalwele mu mulopa.” Lelo nangu fye mulopa uo abene batila uli fye bwino kuti walwalika umuntu pantu ulenga aba no bwafya bwa kwambula bwangu ubulwele.

Cinshi kanshi calenga Inte sha kwa Yehova ukukosapo fye ukukaana ukubabikamo umulopa? Nalimo kuti mwatemwa ukubelenga broshuwa wa Ni Shani Fintu Umulopa Wingapususha Ubumi Bobe? Inte sha kwa Yehova kuti bamupako uyu broshuwa.