Ifishakalabwe

CILA mwaka, Inte sha kwa Yehova mu fyalo baba balakumana pamo pa kulongana kukalamba na pa mabungano ya Bwina Kristu. Balongana pamo ku kuipakisha amalyashi ya kukoselesha aya ku mupashi no kubishanya pamo. Lelo no kulongana kwabo kumbi na ko kuti kwalenga abatandashi ukukanalaba.

Ku ca kumwenako, mu July 1999, amakana na makana aya Nte sha kwa Yehova ku Mozambique baipakishe ukulongana pa nshiku shitatu pa Mabungano ya Citungu aya “Icebo ca Kusesema ica kwa Lesa.” Abengi abasangilweko wali e muku wa kubalilapo ukusangwa kwi bungano. Ifyebo baumfwile ifyalelandwa pa cisebele ne fyo bamwene pali kulya kubungana fyabalengele ukutemwa icibi.

Pa kulongana kwali mu Ciyanda ca Kulonganinamo ica mu Maputo, umuntu umo atile: “Nshatala mona icifulo cawama nge ci ukutula apo nafyalilwa! Umwa kusambila mwali isopo ne filola, kabili mwalenunkila bwino. Konse konse kwali umutende ukwabula no kumfwapo nangu congo ca bana abalelwa. Kabili takwali ukusunkana! Namwene abacaice aba nsansa balelanshanya amalyashi ya kukoseIesha. Nalitemenwe ne fyo bonse bafwele pantu balifwele bwino. Ilyo kukaba ukulongana kwa musango yu, nkaleta abana bandi kuno kuntu kabili nkashininkisha ukuti abalume bandi basumina ukuti tukesesangwa kuli lino ibungano.”

Ca cine, ubufumacumi, bumpomfu, no busaka bwa Nte sha kwa Yehova filamonwa. Cinshi baNte bena babela abapusanako? Pantu balesha na maka ukubomfya ifyo basambilila mu Baibolo. Cinshi ico mushingalonganina pamo nabo uno mwaka pa mabungano yabo nelyo pa kulongana kwabo ukwa cila mulungu ukubela mu Ng’anda ya Bufumu iya uko kwine mwikala no kuimwena mwe bene?

[Icikope pe bula 32]

ZAMBIA

[Icikope pe bula 32]

KENYA

[Icikope pe bula 32]

MOZAMBIQUE