‘Ashipikishe Ukufika ku Mpela’
MULI vidio wa mu 1993 uo batambisha abapya aba pa maofeshi yakalamba aya Nte sha kwa Yehova, ba Lyman Alexander Swingle balandile pa fyo bayumfwa ukubombela Yehova, batile: “Fweni namufwala na bamacense!”a
Munyinefwe Swingle uwali ne myaka 90 acitile ifyo alekoselesha bambi. ‘Ashipikishe ukufika ku mpela.’ (Mateo 24:13) Nangu ali nalwala, pali Citatu pa March 7 asangilwe ku kukumana kwe Bumba Litungulula ilya Nte sha kwa Yehova apo ali muli ili bumba. Umulungu wakonkelepo pali cibili, ubulwele bwalikoseleko, kabili pa nshita ya 4:26 hrs iya ku maca, pa March 14, dokota wakwe asosele ukuti Munyinefwe Swingle afwa.
Ba Lyman Swingle batendeke umulimo wabo pa maofeshi yakalamba aya Nte sha kwa Yehova mu Brooklyn, ku New York, pa April 5, 1930. Babombele palya imyaka mupepi na 71. Ba Lyman babalile ukubombela uko bapangila ifitabo, no kwa kupulintila, kabili baleafwako no kupanga inki wa kupulintila. Na kuba, Munyinefwe Swingle abombele imyaka 25 mu dipatimenti bapangila inki. Kabili abombele imyaka nalimo 20 muli dipatimenti wa kulemba uwa ku maofeshi yakalamba. Mu myaka 17 iya kulekelesha iya bumi bwakwe, abombele mwi Ofeshi lya Cipao.
Ba Lyman bali ni bakabila bashipa aba Bufumu bwa kwa Lesa. Ilyo batendeke ukubombela ku Brooklyn, baleya mu mato ya Nte pa mumana wa Hudson na ba Arthur Worsley, abo baleikala nabo. Ukubomfya bamashini bakusha iciunda, ilingi pa mpela ya milungu balebilisha ubukombe bwa Bufumu ku mishi yali ku mulundu.
Munyinefwe Swingle afyelwe pa November 6, 1910, mu Lincoln, ku Nebraska, lelo tapakokwele ulupwa lwakwe lwakuukile ku Salt Lake City, ku Utah. Kulya, mu 1913, abafyashi bakwe baishileba Abasambi ba Baibolo, nga fintu Inte sha kwa Yehova shaleitwa pali ilya nshita. Pa myaka iingi, ulupwa lwa ba Swingle lwalepokelela bakalanda abeni abengi abalefuma ku maofeshi yakalamba aya Nte , kabili aba baume bakoseleshe ba Lyman. Mu 1923, ilyo bali ne myaka 12, balibatishiwe mu kulanga ukuipeela kwabo kuli Lesa.
Pa numa ya kubomba imyaka ukucila pali 26 mu Brooklyn ukwabula ukuupa, ubumi bwa ba Lyman bwaliwamineko nga nshi ilyo baupile ba Crystal Zircher pa June 8, 1956. Bali abatemwana nga nshi, kabili lyonse baleba pamo, no kubomba bonse mu butumikishi ukufikila ilyo ba Crystal bafwile mu 1998. Imyaka nalimo itatu ilyo bashilafwa, ba Crystal balwele lupuma ubulwele bwabalemanike sana. Ba Lyman cila bushiku balebasakamana kabili ici cali ca kumwenako ca kuipeela icakoseleshe ababeshibe, maka maka abalemona ba Lyman baleensha ba Crystal pa ncinga yendelapo abalemana ilyo baletambika abena mupalamano bamagazini ba Ulupungu lwa kwa Kalinda na Loleni!
Munyinefwe Swingle ali muntu uushalepita mu mbali pa kulanda, umuntu wa mutima uusuma uwalebomba bwino na bambi. Nga fintu cali kuli bawishi na banyina, akwete isubilo lya mu Baibolo ilya kwikala pamo na Yesu Kristu mu Bufumu bwakwe ubwa mu muulu, isubilo ilyo tucetekele ukuti nalifishiwapo nomba.—1 Abena Tesalonika 4:15-18; Ukusokolola 14:13.
[Futunoti]
a Ici cipilibula ukufwila pa ncito.
[Icikope pe bula 31]
Munyinefwe Swingle abombele mu dipatimenti bapanga inki pa myaka nalimo 25
[Icikope pe bula 31]
Ba Lyman na ba Crystal bali abatemwana nga nshi kabili lyonse baleba pamo