Ukucimfya mu Cilye ca Federal Constitutional Court

INTE SHA KWA YEHOVA mu Germany balicimfishe icine cine mu cilye ca Federal Constitutional Court mu Karlsruhe. Pa kucite fyo bacitile icintu cacindama ukukuma ku kwishibikwa kwabo.

Inte sha kwa Yehova shalishimikila mu Germany ukucila pa myaka 100. Balipakeswe icabipisha kuli bakateka ba lucu aba mu mwanda wa myaka uwalenga 20—ku buteko bwa ba National Socialist no bwa baKomyunisti. Ukutula mu 1990, Inte shalyesha ukuti shishibikwe ngo kuteyanya kwa mwi funde. Ilyo icilye capingwile bwino imilandu ibili no kwalula umo, Inte shatwele umulandu ku cilye ca Federal Constitutional Court, icabilishe ifyo capingwile pa December 19, 2000.

Ukupingwilako Bwino Inte sha kwa Yehova

Abapingushi bonse 7 aba mu cilye bapingwile ifyawamine Inte. Abapingushi bakeene ifyo icilye ca Federal Administrative Court capingwile mu 1997 no kutila ici icilye cibebete na kabili ifyo Inte shalombele.

Pali ilya ine nshita, icilye ca Federal Constitutional Court calandile pa kwampana kwabako pa Buteko na mabumba ya mipepele. Ilingi kuti mwaishiba ifyo imipepele yaba “pa kumona imisango ya bantu babamo te kumona ifyo basumina iyo.”

Icilye na kabili catile nga Inte “tashiipoosele mu fikansa fya calo,” ninshi “tabalekanya ubuteko bwa maisosele” kabili “tabafwaya ukupyanikapo ubuteko bumbi pa buteko bwa maisosele.” E ico, abantu tabalingile ukumona baNte ukuti te kuteyanya kwa mwi funde pa mulandu wa kukanaipoosa mu kusala kwa mapolitiki.—Yohane 18:36; Abena Roma 13:1.

Icilye na kabili catile uwasumina—nampo nga ni Nte nelyo uwa mu mipepele imbi—kuti asanga ukuti ifyo Ubuteko bulefwaya fyapinkana ne fyo asumina. Nga ca kuti umuntu akonka kampingu wakwe pa kukonka “ifyo asuminamo ukucila ifunde,” Ubuteko kuti bwamona ici nge caba fye bwino kabili icaba mu nsambu sha maipepele.—Imilimo 5:29.

Ifyo icilye capingwile fyali lyashi ilikalamba. Mupepi na manyunshipepala yonse aya ku Germany yalilandile pali ci. Imilabasa ikalamba iya fikope ne ya pa filimba yalandile pali ici nelyo ukwipushako bamo ukulandako pali ici. Ishina Yehova talyabala alisabankanishiwapo muli uyu musango mu Germany.

[Abatusuminishe Ukubomfya Icikope pe bula 8]

AP Photo/Daniel Maurer