Bushe Muleibukisha?
Bushe mwalyumfwikishe ifyo mwabelengele muli bamagazini ba nomba line aba Ulupungu lwa kwa Kalinda? Cisuma, moneni nga kuti mwayasuka ifi fipusho:
• Bushe icilye ca Federal Constitutional Court ica ku Germany cayafwile shani imipepele ukucimfya mu filye?
Cilya cilye casushishe ifyo icilye cimbi capingwile Inte sha kwa Yehova no kuti balishibikwa nga kabungwe ka mwi funde. Ici cilye cabasenamine catile umuntu nga alefwaya alikwata insambu sha ‘kumfwila ifyo asuminamo’ ukucila ifyo engomfwila Ubuteko.—8/15, ibula 8.
• Myaka inga Yobo aculile?
Ibuuku lya kwa Yobo talitila aculile myaka iingi. Ukucula kwa kwa Yobo ne nshita kwapwile napamo fyacitike fye mu myeshi iinono, nalimo no mwaka tawakumene.—8/15, ibula 31.
• Mulandu nshi twingashininkishisha ukuti Kaseebanya te wa kwelenganya fye?
Yesu Kristu alishibe ukuti Kaseebanya te wa kwelenganya fye. Yesu aeshiwe kuli Kaseebanya, te ku bubifi bwali mu kati kakwe iyo. (Mateo 4:1-11; Yohane 8:44; 14:30)—9/1, amabula 5-6.
• Amapinda 10:15 yatila: “Ifyuma fya mucindami e musumba wakwe uwakosa; itentula lya balanda bupina bwabo.” Aya mashiwi yaba shani aya cine?
Ifyuma kuti fyacingilila umuntu ku fintu fimo ificitika ifyo tushenekela, nga filya fine umusumba uwacingililwa bwino ulenga abekashi ukuba abacingililwa. Kumfwa, ubupiina kuti bwalundulwilako ububi ilyo kwacitika ifishileenekelwa.—9/15, ibula 24.
• Ni mu nshila nshi kwatendeke “ukulilila kwi shina lya kwa Yehova” mu nshiku sha kwa Enoshe? (Ukutendeka 4:26)
Ukutula fye pa kulengwa kwa bantunse, balilumbula ishina lya kwa Lesa; kanshi, icatendeke mu nshiku sha kwa Enoshe tacali kulilila kwi shina lya kwa Yehova mu citetekelo. Napamo abantu basaalwile ishina lya kwa Lesa pa kuinika nelyo ukwinika bambi abo balebepekesha ukuti ukupitila muli bene e mo balepepela Lesa.—9/15, ibula 29.
• Bushe ishiwi lyaba mu Baibolo ilya kuti “ukusalapula” lyalola mwi?
Ili ishiwi talilangilila umusango onse uwa kucusha nelyo ubunkalwe. (Amapinda 4:13; 22:15) Ishiwi lya ciGriki ilyapilibulwa “ukusalapula” lilosha maka maka ku kufunda, ukusambilisha, ukulungika kabili, limo limo, ku kulimuna kwalinga pa mulandu wa kutemwa umuntu. Inshila yacindama iyo abafyashi bengapashanishishamo Yehova, kwesha ukulenga abana babo ukukanatiina ukulanda kuli bene. (AbaHebere 12:7-10)—10/1, amabula 8, 10.
• Bushe Abena Kristu ba cine aba ndakai balanga shani ukuti batungilila ukuteka kwa kwa Lesa?
Ilyo baleyafwilisha Ubufumu bwa kwa Lesa, Inte sha kwa Yehova tabaitumpa mu fikansa fya calo nelyo ukulenga bambi ukwimina ubuteko, nangu fye ni mu fyalo umo baNte babindwa. (Tito 3:1) Balafwilishako abekashi mu nshila Yesu na basambi bakwe aba kubalilapo bacitile kabili balatukuta ukwafwa abantu ukuba ne mibele isuma iisangwa mu Baibolo, pamo nga ubufumacumi, umusangwela, no kuba na bucishinka pa ncito.—10/15, ibula 6.
• Bushe amenshi yapeela umweo mu Andes yalekonkoloka shani?
Inte sha kwa Yehova balebombesha sana uku kuntu ukupeela abantu icine ca mu Baibolo, ukulandila na mu ndimi shibili isha cikaya, iciQuechua ne ciAymara. BaNte balatandalila abantu abekala pa fishi fya Bemba wa Titicaca, na pa fishi bapangila amatete ne bumba.—10/15, amabula 8-10.
• Ca kututungulula nshi Lesa ateyanya ico twingapashanya kuli kompyuta iitungulula indeke shisenda abantu isha muno nshiku?
Lesa alipeela abantu amaka ya kusala imibele isuma, e kuti inkuntumutima. Iyi e kampingu tufyalwa fye na yo. (Abena Roma 2:14, 15)—11/1, amabula 3-4.
• Mulandu nshi imfwa ya kwa Yesu yacindamina nga nshi?
Ilyo umuntu wapwililika Adamu abembwike, apanishe umweo wakwe no wa bufyashi bwakwe. (Abena Roma 5:12) Apo ali muntu wapwililika, Yesu apeele ubumi bwakwe ubwa buntunse ilambo, kabili ici e cilubula apeele icalenga ukuti abantu ba cishinka benganonka umweo wa muyayaya.—11/15, amabula 5-6.
• Bushe abaSukuti balumbulwa pa Abena Kolose 3:11 bali ni bani?
AbaSukuti bali luko lwalelulumba mu mpanga yabatama kabili umushaba miti iya Eurasia, abatekele ukufuma nalimo mu 700 ukufika mu 300 B.C.E. Bali baume ba kutiinya kabili abashilika aba pali bakafwalo. Amashiwi yaba pa Abena Kolose 3:11 nalimo yalelosha ku bantu abambuulu nga nshi, te ku luko iyo.—11/15, amabula 24-5.
• Mulandu nshi twingasosela ukuti Ifunde lya Mulinganya cisambilisho ico tufwile ukwangwa lyonse?
Ili funde lyalilondololwa na baYuda, abaBuddha, na ba mano ya ciGriki na bena Confucius. Lelo, ico Yesu alandilepo mu Lyashi lya pa Lupili cikabila ukucitapo cimo icisuma, kabili cilakuma ubumi bwa bantu bonse aba mushinku onse. (Mateo 7:12)—12/1, ibula 3.