Cinshi Cilenga Ukupakasa aba mu Mipepele?

BUSHE mwasumina ukuti abantu bafwile ukupakaswa pa mulandu wa mipepele yabo? Napamo te fyo mwasumina—nga imicitile yabo tailepumfyanya insambu sha bambi. Lelo, ukupakasa aba mu mipepele kwatendeke kale sana kabili kucili kulacitika. Ku ca kumwenako, Inte sha kwa Yehova ishingi mu ncende shapusanapusana ku Bulaya na mu fyalo fimbi libili libili bapokelwe insambu shabo kabili batekelwe ku muunga we fwafwa pa myaka iingi muli ba1900.

Pali iyo nshita, Inte sha kwa Yehova balipakeswe ukupakaswa kwa buluku, ukwateyanishiwe, kabili ukwa nshita ntali ilyo baleteekwa na mabuteko yakalamba yabili aya lucu aya Sosholizimu, na Komyunisimu ku Bulaya. Bushe ifyo bapitilemo filetusambilisha nshi pa lwa kupakasa aba mu mipepele? Kabili cinshi twingasambilila mu kwishiba ifyo bayankwileko ku kucula?

“Tamuli ba Pano Calo”

Inte sha kwa Yehova balatukuta ukuumfwila amafunde, ukuba aba mutende, no kuba ne mibele isuma. Tabakaanya amabuteko nelyo ukufwaya ukupaashanya na yo, kabili tabaikolomwena ukupakaswa pa kuti fye betwe ukuti aba kufwila icisumino. Aba Bena Kristu tababa mu mapolitiki. Ici cumfwana na mashiwi ya kwa Yesu aya kuti: “[Abakonshi bandi] tabali ba pano calo, ifyo na ine nshili wa pano calo.” (Yohane 17:16) Amabuteko ayengi yaishiba ukuti baNte tabaipoosa mu fya calo. Lelo bakateeka ba lucu tabacindika ifyo Baibolo ifwaya ukuti Abena Kristu tabafwile ukuba ba pano calo.

Umulandu bacitile ci walondolwelwe mu kukumana kwali pe sukulu likalamba ilya University of Heidelberg, ku Germany, mu November 2000. Ukukumana kwali no mutwe waleti “Umutitikisha no Kuitutumuna: Inte sha kwa Yehova mu Mabuteko ya Lucu aya Sosholizimu ne ciKomyunisimu.” Dokota Clemens Vollnhals uwa ku Cipani Cibebeta Amabuteko ya Lucu ica Hannah-Arendt atile: “Amabuteko ya lucu tayapelela fye mu fya mapolitiki. Yafwaya umuntu ukuyanakila umupwilapo.”

Abena Kristu ba cine te kuti baituule ‘umupwilapo’ ku mabuteko ya bantunse, apo balilapa ukuba na bucishinka umupwilapo kuli Yehova Lesa epela. BaNte abateekwa no buteko bwa lucu balisanga ukuti ifyo Ubuteko bufwaya ne fyo icitetekelo cabo cifwaya inshita shimo tafyumfwana. Cinshi bacita nga kwaba ukukanaumfwana kwa musango yo? Ukutula fye na kale, Inte sha kwa Yehova balibomfya icishinte casosele abasambi ba kwa Yesu Kristu mu mikalile yabo ati: “Tufwile ukunakila Lesa nga kateeka ukucila ukunakila abantu.”—Imilimo 5:29.

BaNte abengi batwalilile ukukakatila ku fisumino fyabo kabili tabaipoosele mu mapolitiki, te mulandu no kupakaswa kwakaluka icibi. Bashipikishe shani? Bafumishe kwi ubukose pa kucite ci? Lekeni bayasukile. Kabili lekeni tumone ifyo ifwe bonse, baNte na bashili baNte, twingasambilila ku fyo bapakeswe.

[Amashiwi pe bula 4]

Inte sha kwa Yehova mu Germany balipakeswe buluku buluku kabili pa nshita ntali ilyo baleteekwa na mabuteko yabili aya lucu aya Sosholizimu na Komyunisimu muli ba1900

[Amashiwi pe bula 4]

Dokota Clemens Vollnhals atile: “Amabuteko ya lucu tayapelela fye mu fya mapolitiki. Yafwaya umuntu ukuyanakila umupwilapo.”

[Icikope pe bula 4]

Ulupwa lwa baKusserow lwalipokelwe ubuntungwa bwabo pa mulandu wa kuti tabanenwike ku cisumino cabo

[Icikope pe bula 4]

BaJohannes Harms balipaiwe mu cifungo ca ciNazi pa mulandu wa fisumino fyabo