Cinshi Mwingatemwa Ukwipusha Lesa?

ABANTU icalo conse baba ne fipusho fyakatama pa bumi. Nga imwe? Abengi balipusha ifipusho bakwata kuli bashimapepo lelo taba-asukwa bwino bwino. Bambi baetetula pali ifi fipusho pa lwabo. Bamo balipepela na po. Bushe cine cine kuti mwasanga amasuko ukufuma kuli Lesa pa fintu ifimupelenganya? Pa mepusho yamo yamo ayo abengi batila kuti batemwa ukwipusha Lesa paba na yakonkapo.

Mwe Lesa, bushe ni mwe bani?

Icilenga abantunse ukwishiba Lesa mu nshila bamwishibilamo ni ntambi, imipepele ya bafyashi babo, nelyo no kusalapo kwabo abene. Abantu bamo Umulungu bapepa baliwinika ishina; bambi nabo batila fye ni Lesa. Bushe ci cifwile ukutusakamika? Bushe kwaba fye Lesa umo uwa cine uisokolola umwine ne shina lyakwe kuli ifwe?

Mulandu nshi ukucula kwafulile fi?

Nga mulekelesha wa muntu nelyo bucisenene bwakwe e fyaonaula ubumi bwakwe nelyo fyamulenga ukuba umupiina, pambi kuti ailishanya. Lelo pambi kuti naishiba no kwishiba mulandu aleculila.

Nangu cibe fyo, bambi abengi bacululukilamo fye. Bamo balwala amalwele ya ntandabwanga. Bambi nabo balelwishanya na mafya ya kubulwa amayanda ne fya kuliisha indupwa shabo. Imintapendwa balacula ku misoka, inkondo, ulukaakala, ubusanso ubulengwa ne fyabumbwa pe sonde , nelyo fye ku lufyengo lufuma ku balashi ba buteko.

E mulandu wine abengi bepushisha ati: ‘Mulandu nshi imibele yapale yi yananine fi? Mulandu nshi Lesa asuminishisha ukucula konse uku?’

Mulandu nshi nabela umumi? Cinshi caba ubufwayo bwa bumi?

Aya mepusho ilingi line yafuma ku bantu bafuupulwa abashikushiwa nangu panono ku mibombele yabo—kabili ifi e ficitikila bantu abengi. Imintapendwa ya bantu bambi basumina ukuti ifyo ubumi bwa muntu umo umo bukaba calilembelwa libela kuli Lesa. Bushe e fyo caba? Nga Lesa mu cishinka alimukwatila ubufwayo bwaibela, te ca kutwishika no kutwishika ukuti kuti mwafwaya ukwishiba ubo bufwayo.

Pa mabuuku yonse ayaba pa calo, paba limo ililandikisha fye ukuti lyalipuutwamo na Lesa. Nge fyo mwingenekela ubukombe bwafuma kuli Lesa ukuba, ili buuku lyaba mu ndimi ishingi ukucila ibuuku ilili lyonse ilyabala alilembwa. Ilyo ibuuku ni Baibolo wa Mushilo. Mu Baibolo, Kabumba wa muulu ne sonde, Lesa umwine, e mo asokolola imibele yakwe. Bushe mwalishiba ishina lyakwe? Bushe mwalishiba ifyo Baibolo isosa pa mibele yakwe? Bushe mwalishiba ico isosa pa fyo Lesa enekela kuli imwe?

[Abatusuminishe Ukubomfya Icikope pe bula 2]

PA NKUPO: Chad Ehlers/Index Stock Photography

[Abatusuminishe Ukubomfya Icikope pe bula 3]

Ulupili: Chad Ehlers/Index Stock Photography