Ilyashi Lya Bakabilisha Ba Bufumu
‘Abukileni Kuno no Kutwafwa’
MU JULY 2000, kwali ubwite bwa kuti baNte ba ku Austria, German, na Switzerland abalanda ululimi lwa ku German baye ku Bolivia. Cinshi calengele ukuti betwe? Ni co mu mishi ya mu Santa Cruz mu Bolivia, mwali baProtestanti balande ciGerman abalefwaya ukusambilila Baibolo. Iyi mishi yonse yaba mu ntamfu ya bakilomita 300 ukufuma mu musumba wa Santa Cruz.
BaNte nalimo 140 balitebe. Bamo bailebombako fye imilungu ya kupenda, bambi babombeleko umwaka no kucilapo. Ifi aba baNte bacitile fyapalana na filya bamishonari ba mu mwanda wa myaka uwa kubalilapo bacitile ilyo baitebe ubwite bwaleti: “Abukileni ku Makedonia no kutwafwa.”—Imilimo 16:9, 10.
Ciba shani pa kubombela muli ilya ncende? Eluda wa mu cilonganino caba kulya kwine atile: “Kwaba imishi 43 iya baProtestanti. Pa kuti fye mufike pa mushi umo, twenda amaawala 8 mu misebo ya lukungu ukubomfya bamotoka bakwatisha amaka. Pa kufika mu ncende sha kutali ilingi line tupoosa inshiku shine kabili inshiku shimo tulaala mu matenti. Lelo ukubombesha kwa musango uyu takuya fye mu menshi, pantu aba bantu tabatala abomfwapo imbila nsuma.”
Pa kubala, baProtestanti abengi balekana ukubatandalila. Lelo umupampamina wesu walengele bakutuluke ico baNte babilisha. Umulimi umo atile napapita umwaka umo ukutula apo atampile ukubelenga magazini wa Loleni! Kabili atile: “Nalishiba ukuti abengi kuno mwesu tabasumina ifyo musosa, nomba ine nalisumina ukuti ico mulanda cine.” Mu mushi umbi, umwaume umo atile: “Abena mupalamano bandi bamo bamwita ati bakasesema ba bufi, bambi batila mulanda icine. Ndefwaya ne mwine ng’umfwe.”
Mu Bolivia nomba muli icilonganino cilanda ululimi lwa ku German, umwaba bakasabankanya 35 na bapainiya wa nshita yonse 14. Pali nomba abantu 14 abali kale baProtestanti ni bakasabankanya wa Bufumu, kabili bambi na bo 9 balasangwa ku kulongana lyonse. Umwaume wa cikoloci umo uwabatishiwe nomba line atile: “Tulemona bwino sana ifyo Yehova aletutungulula. Alitutumina bamunyinefwe na bankashi abakokole abalanda ululimi lwa ku German ku kutwaafwa. Tuletasha sana.” Umwana wakwe umwanakashi uuli ne myaka 17, na o uwabatishiwa, atile: “Twalyambula ukupimpa kwa bamunyinefwe na bankashi abaice abesa kuno mwesu. Abengi ni bapainiya, ababomfya inshita yabo ne ndalama ku kwafwa bambi. Ici calenga na ine mfwaye ukubombako uyu mulimo.”
Ca cine, ababombeshe no ‘kwabukila kumbi’ ku kwafwa abantu balaipakisha insansa kabili balasekelela.