Ifyo Twingabomfya Inshiku Shesu Mano Mano

“EFYO tulengeni ukwishibo kupende nshiku shesu, no kuleka tumone umutima wa mano.” (Amalumbo 90:12) Ili e pepo Mose, kalemba wa Baibolo apepele mu kuicefya. Bushe Mose pano cinshi alefwaya ukwishiba? Bushe na ifwe kuti twalomba mu mucinshi nga fintu Mose acitile?

Mu cikomo 10, Mose ailishenye pa fyo ubumi bwa muntunse bwaipipa. Kabili inshita imo, alembele na mashiwi ya kwa Yobo, uwatile: “Umuntu uwafyalwa ku mwanakashi wa nshiku shinono, kabili uwaisulamo ukutenkana.” (Yobo 14:1) Kanshi twamona ukuti Mose alishibe bwino bwino ifyo ubumi bwa muntu uushapwililika bwaipipa kabili ico calimusakamike. E ico alemona ubushiku bumo na bumo kwati ca bupe icacindama nga nshi. Ilyo alepaapaata kuli Lesa, Mose alangilile ifyo alefwaisha ukubomfya mano mano inshiku shasheleko isha bumi bwakwe mu nshila iingasekesha Kabumba wakwe. Kanshi na ifwe bene tufwile ukubomfya inshiku shesu mano mano. Ico, e co tufwile fye ukupampaminapo ukucita nga tulefwaya Lesa ukutusenamina.

Kwali na cimbi icakoseshe Mose na Yobo, icingakosha na ifwe bene. Aba baume babili aba bukapepa balelolesha ku ntanshi ku cilambu bali no kupoka, e kutila ubumi bwa mikalile iisuma pano isonde. (Yobo 14:14, 15; AbaHebere 11:26) Iyo nshita, takwakabe nangu umo uo imilimo yakwe iisuma ikapelela pa kati ku mulandu wa mfwa. Kabumba wesu afwaya ukuti abantu ba cishinka bakekale muli paradaise pe sonde. (Esaya 65:21-24; Ukusokolola 21:3, 4) Na imwe bene kuti mwaikala mu calo ca musango yo nga ca kuti ‘mwapenda inshiku shenu, no kuleka mumone umutima wa mano.’