Ukufwayafwaya Umutende Wine Wine

BA ALBERT bali ne cupo ca nsansa kabili bali na bana babili abasuma nga nshi. Lelo baleyumfwa ukuti pali cimo ico balebulisha mu bumi bwabo. Ilyo bafililwe ukusanga incito, baipoosele mu fikansa fya calo kabili batemenwe imitekele ya sosholisimu (iyalefwaya ukuti abantu bonse bakasekelemo mu cuma ca calo). E fyo baishileba ba membala bakamamo na menshi aba kabungwe ka fikansa fya calo akaleitwa Communist party akabelele uko baleikala.

Tapakokwele, ba Albert balifuupwilwe ku mitekele ya Komyunisimu. Balilekele amapolitiki kabili batendeke ukupoosa sana amano ku lupwa lwabo. Ico balefwaisha ca kuti ulupwa lwabo luleba ne nsansa lyonse. Nangu cibe fyo, ba Albert batwalilile fye ukuyumfwa ukuti kwali ico babuliishe mu bumi bwabo; e kutila balifililwe ukusanga umutende wine wine.

Icacitike kuli ba Albert caliseeka sana. Abengi balyesha inshila shalekanalekana pamo nga ifya mapolitiki, amano ya buntunse, e lyo na mapepo pa kuti basange ubumi busuma nga nshi. Muli ba 1960 mu fyalo ifikankaala, mwali akabungwe ka bacaice akaleitwa ati aka ba hippie akashalefwaya ukukonka imibele isuma na mafunde ya mu bwikashi. Ilingi line, abacaice balemona kwati kuti baba ne nsansa no bumi busuma nga ca kuti balebomfya imiti ikola iya kufulunganya ubongo, na lintu balekonkelela mano ya ntungulushi shabo ishaleitwa ati ba guru nelyo bashimapepo bakalamba. Lelo, nangu fye ni ako kene kabungwe kalifililwe ukuleta insansa shine shine. Na kuba, aka kabungwe e kaletunka na bacaice ukulabomfya imiti ikola no kubakoselesha ukulacita ubulalelale na bantu balekanalekana, kabili ico calengele ukutila imibele mu bwikashi ibipileko.

Pa myaka iingi, abantu abengi balyesha ukusanga insansa ukupitila mu kukwata icuma, amaka nelyo amasomo. Ukukonkelela fyonse ifi mu kupelako takuleta umutende wine wine. Yesu atile: “Umuntu nangu fye akwate ifingi nga nshi, ubumi bwakwe tabwaba mu fintu ifyo akwata.” (Luka 12:15) E ico ukufwaisha ukukwata ifyuma, ilingi line kulaleta ubulanda. Baibolo itila: ‘Abafwaisha ukuba ne fyuma bawila mwi tunko kabili mu citeyo kabili mu lunkumbwa ulwingi ulwa kutumpa kabili ulwa kucena, ifyo fiibisha abantu mu bonaushi kabili mu kupomonwa. Pantu ukutemwe ndalama e shinte lya bubi bwa misango yonse, kabili pa kutinamina ukutemwa kwa musango yu bamo . . . bali-ilasaulamo abene amacushi ayengi.’—1 Timote 6:9, 10.

Nomba bushe umuntu kuti asanga shani umutende wine wine, kabili kuti aishiba shani ico ubumi bwabelako? Bushe afwile ukulaeshaesha fye inshila shalekanalekana pa kuti amone inshila ingabomba bwino? Iyo mukwai. Nge fyo twalamona mu cipande cikonkelepo, icikabilwa pa kuba no mutende wine wine caba kwikusha icacindamisha kabili icaibela ico abantunse bakabila.

[Icikope pe bula 3]

Bushe ukufwaisha ifyuma, amaka, nelyo amasomo kuti fyamwafwa ukusanga umutende wine wine?