“Nga Balibafumishe Lilya Line Fye”
GENEVIÈVE DE GAULLE umwipwa wa kwa Charles de Gaulle, uwali kateka wa calo ca France, aishibile Inte sha kwa Yehova mu nkambi ya kucushishamo abantu iya Nazi mu Ravensbrück ku kabanga ka Germany. Muli kalata alembele mu August 1945 e mwali amashiwi ayambwilwe pa muulu.
Inkambi ya kucushishamo abantu iya mu Auschwitz, mu Poland, balekele ukuibomfya pa January 27, 1945. Ukutendeka mu 1996, batendeke ukulaibukisha bonse abafwile mu buteko bwa kwa Hitler mu Germany pali ubu bushiku.
Pa January 27, 2003, umukalamba wa mu Ng’anda ya Mafunde iya mu Baden-Württemberg, Peter Straub, alandile ilyashi lya kwibukisha abafwile mu nkambi, atile: “Bonse abapakeswe pa mulandu wa kusumina mu fya mapepo nelyo ifya mapolitiki kabili abaipeeleshe ukufwila pali ifi ukucila ukupepa Hitler bakabilwa ukupeelwa umucinshi, te wa pa kanwa fye. Inte sha kwa Yehova eba mapepo beka fye abashasumine ukucita fintu ubuteko bwa kwa Hitler bwalefwaya. Tabaimishe nelyo fye ukuboko ku kupepa Hitler. Balikaaninine fye no kunakila ‘Führer no Buteko,’ nga fintu fye bakeene ukubomba umulimo wa bushilika ne ncito ya calo. Kabili abana babo balikeene ukwingila mu kabungwe ka Hitler Youth Movement.”
Yesu Kristu alandile ku bakonshi bakwe ukuti: “Tabali ba pano calo, ifyo na ine nshili wa pano calo.” (Yohane 17:16) E ico ukukananenuka kwa Nte sha kwa Yehova kwali pa mulandu wa mipepele yabo. Peter Straub alandile no ukuti: “Inte sha kwa Yehova, abalefwala ifya kufwala apali purple triangle e bafungwa beka fye mu nkambi ya kucushishamo abantu abo cayangukile ukufuma mu cifungo no kusengauka ukubepaya. Ico balekabila fye ukucita, kusaina icipepala ca kulekuluka mu fyo basuminemo.”
Inte sha kwa Yehova abengi tabalefwaya no kutontonkanya pa kulekuluka mu fyo basuminemo. E mulandu wine, bamo aba bene 1,200 babepaile mu buteko bwa ciNazi. Bambi nabo 270 babepaile pa mulandu wa kukaana ukucita ifyo kampingu wabo alebalesha ukucita. Tabalelanda fye amashiwi ya pa Imilimo 5:29 ayatila: “Tufwile ukunakila Lesa nga kateeka ukucila ukunakila abantu,” lelo bacitile ifyo fine.
Nge fyo baUlrich Schmidt, abakalamba ba mu Ng’anda ya Mafunde iya ku North Rhine-Westphalia batile, Inte sha kwa Yehova baali fye bantu yaweyawe. Ukulanda pa fintu balandile, broshuwa wa Landtag Intern atila, “Inte sha kwa Yehova baali bantu fye ngo uli onse umbi, pa mulandu wa kampingu wabo baiminine abakosa mu fyo basuminemo, balishipile, kabili balikeene imfundo ya ciNazi pa mulandu wa fyo basuminemo.” Tuli abashininkisha ukuti Yehova Lesa alatemwa ukumona abo bonse abatwalilila muli bucishinka kuli ena nangu ni lintu ifintu fyafishe. Pa Amapinda 27:11 tubelenga ukuti: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.”
[Abatusuminishe Ukubomfya Icikope pe bula 30]
Courtesy of United States Holocaust Memorial Museum