Amepusho Ukufuma ku Babelenga

Mu Israele wa pa kale, cinshi caleimininwako no lubuuto lwa cipesha amano ulo inshita imo baleita ati Shechinah ulwalesanika Umwashilisha mwi hema na mwi tempele?

Yehova, Wishi wa kutemwa kabili Kacingilila wa bantu bakwe, alengele abena Israele ukulamona ukubapo kwakwe. Inshila imo alangishemo ici kupitila mu kubengeshima kwe kumbi lyabuutisha ilyayampene sana ne cifulo ca ku mupepelamo.

Lulya lubuuto lwalesanika sana lwa leimininako ukubapo kwa kwa Yehova. Lwalesangwa Umwashilisha mwi hema na mwi tempele ilyo Solomone akuulile. Lulya lubuuto lwa cipesha amano talwalepilibula ukuti Yehova aleba mulya mwine mu cikuulwa. Lesa te kuti e kale mu cikuulwa icapangwa na bantu. (2 Imilandu 6:18; Imilimo 17:24) Ulu lubuuto lwalesanika sana umwashila mwa kwa Lesa lwakoseshe icitetekelo ca kwa shimapepo mukalamba kabili nao alengele abena Israele ukutetekela ukuti Yehova alebacingilila no kusakamana ukukabila kwabo.

Pa numa ya kulembwa kwa Baibolo, ulubuuto lwaleitikwa mu ciAramaic ati Shechinah (shekhi·nahʹ), ishiwi ilipilibula “ubwikalo.” Ili shiwi talisangwa mu Baibolo lelo lisangwa mu mabupilibulo ya Malembo ya ciHebere aya ciAramaic, ayo beta ati Targum.

Lintu Yehova alepeela amafunde kuli Mose pa kukuule hema, alandile ukuti: “Ukabike inkupiko pa muulu wa Cipao, kabili mu Cipao ukabikemo icishimiko ico nkakupeela. Kabili palya e po nkamonekela kuli iwe no kulanda na iwe ukufuma pa muulu wa nkupiko, pa kati ka bakerubi babili abali pa cipao.” (Ukufuma 25:21, 22, NW) Icipao cilandilwepo cali ni mbokoshi iyamashililweko golde iyalesungilwa Umwashilisha. Pa nkupiko ya Cipao paali na bakerubi ba golde babili.

Bushe Yehova ali no kulanda ukufuma kwi? Yehova apeele icasuko lintu alandile kuli Mose ati: “Nakulamonekela mwi kumbi pa muulu wa nkupiko.” (Ubwina Lebi 16:2, NW) Ili kumbi lya leelela fye mu lwelele ukwabula ukusela pa muulu wa Cipao cashila kabili pa kati ka bakerubi babili aba golde. Baibolo tayalanda ifyo ikumbi lyasumbwike ukufuma pa Cipao nelyo ifyo lyalepele ukucila bakerubi.

Ili kumbi lyabuutisha e lyalesanika Umwashilisha. Na kuba, e lyalebuutisha fye muli ulya muputule. Ulubuuto lwaleafwa shimapepo mukalamba ukumona bwino lintu aingila mu muputule wa mu kati pa Bushiku bwa Kukonsolwela. Aleiminina pa ntanshi ya kwa Yehova.

Cinshi cintu ulu lubuuto lwa cipesha mano lupilibula ku Bena Kristu? Umutumwa Yohane amwene mu cimonwa umusumba umo “ubushiku tabwakabemo.” Uyu musumba ni Yerusalemu Mupya, uwapangwa na Bena Kristu basubwa ababuushiwa mu kuteka na Yesu. Ulubuuto muli uyu musumba wa mampalanya talufuma ku kasuba nelyo mweshi. Ubukata bwa kwa Yehova e busanika pali uku kuteyanya, nga fintu fye ulubuuto lwa Shechinah lwalesanika Umwashilisha. Na kabili, Umwana wa Mpaanga, Yesu Kristu, e “nyali” ya musumba. E lyo uyu “musumba” na o ulasanika ulubuuto lwa ku mupashi na mapaalo ifitungulula abantu bonse abalubulwa ukufuma mu nko shonse.—Ukusokolola 21:22-25.

Apantu bakapepa ba kwa Yehova balapokelela amapaalo ayengi ukufuma kuli wena, bafwile ukucetekela ukuti Yehova e Mucemi uubacingilila kabili e Wishi wa kutemwa.