Batutasha pa Kubika Amano Kuli Baibolo

MARIANNA ni umo uwa Nte sha kwa Yehova, e kala ku kapinda ka kulyo aka calo ca Italy. Ali ne myaka 18, kabili ali mu mwaka wa kulekeleshako mwi sukulu lya ku sekondari. Asambilila pe sukulu limo line ne Nte shimbi ishacaice.

Marianna alemba ukuti: “Pa nshita ya kutusha, bamo aba ifwe tulabelenga ilembo lya bushiku ukufuma mu katabo ka Ukubebeta Amalembo Cila Bushiku. Icifulo fye ceka ico twamwene ukuti e ko twingalakwatila ilembo ni mu kashila kabela mupepi no mutupule wa bakafundisha. Takwali icongo sana. Bakafundisha abengi baletumona nga balepita, kabili bamo baleiminina ukufwaya ukumona ifyo twalecita. Ici ilingi line calitupeela ishuko lya kwasuka amepusho yabo. Cila bushiku kulaba kafundisha nangu umo uwiminina ukulanda na ifwe. Abengi balikala no kukutika ku fyo tulelanshanya ilembo kabili balatasha ifyo fwe Nte twapoosako sana amano ku fintu fya ku mupashi. Inshita imo kafundisha wa cibili kuli kafundisha mukalamba alitulaalike ukuti tulelanshanishisha mu muputule umo uwa bakafundisha.

“Ilyo kafundisha wandi amwene umo twalelanshanishisha ilembo ukuti namo mwali icongo, aipwishe kafundisha mukalamba nga kuti tulelanshanishisha mwi kalashi umushali sana icongo. Kafundisha mukalamba alisumine, kabili kafundisha wandi alitutashishe pa menso ya bonse mu kalasi, pa ca kumweneko cesu icisuma. Bonse tuli aba nsansa nga nshi pe shuko ilisuma sana ilyo Yehova atupeela.”