Mulandu Nshi Tufwile Ukupepela mwi Shina lya kwa Yesu?

IMIKU iingi Yesu alisambilishe abantu ifya kupepa. Ilyo aali pano calo, bashimapepo abaYuda balepepela “pa fifutu fya misebo ikalamba.” Mulandu nshi? “Pa kuti bamonwe ku bantu.” Bafwile balefwaya abantu baletila e babika amano ku kupepa. Abengi balepepa amapepo ayatali kabili aya kubwekeshapo fye fimo fine, pantu balemona kwati nga “basosa ifyebo ifingi” e lyo Lesa engomfwa. (Mateo 6:5-8) Yesu atile ukupepa muli uyo musango takwafwa kantu, kabili ifyo alandile fyalyafwile aba mitima isuma ukwishiba ifyo bashifwile ukucita ilyo balepepa. Na lyo line, Yesu tapelele fye pa kufunda abantu ifyo bashifwile kucita pa kupepa.

Yesu asambilishe ukuti tufwile ukupepa ukutila ishina lya kwa Lesa licindikwe, Ubufumu bwakwe bwise, no kufwaya kwakwe kucitwe pano calo nga mu muulu. Yesu asambilishe no kuti cisuma ukulomba kuli Lesa ukuti aletwafwa mu bumi bwesu. (Mateo 6:9-13; Luka 11:2-4) Yesu alandile ifilangililo umo afundile abantu ukutila Yehova pa kuti omfwe amapepo yesu, tufwile ukupepa lyonse, ukumucetekela no kuiceefya. (Luka 11:5-13; 18:1-14) Yesu alyafwile abantu ukumfwikisha ifyo alesambilisha pantu na o alecita ifyo alebafunda.—Mateo 14:23; Marko 1:35.

Ifyo Yesu alefunda fyalyafwile abasambi bakwe ukwishiba sana ifya kupepa. Na lyo line, Yesu alipembelele mpaka inshita ya bushiku ninshi ati mailo bakamwipaya, e lyo afundile abasambi bakwe icintu cimo icacindama sana pa kupepa.

“Apayalukiile Inshila Abantu Balepepelamo”

Inshita ya bushiku ninshi ati mailo bakamwipaya, Yesu aikalile ukukoselesha abatumwa bakwe aba cishinka. E nshita yalingile ukuti Yesu asokolole icintu cimo icipya. Atile: “Nine nshila ne cine no bumi. Takuli uwisa kuli Tata kano aishila muli ine.” Na kabili, alibakoseleshe sana no kubalaya ukuti: “Conse ico mwalombela mwi shina lyandi, nkacicita, pa kuti Tata acindamikilwe mu Mwana. Nga mwalombela icintu conse mwi shina lyandi, nkacicita.” Ku kulekelesha, atile: “Ukufika na nomba, tamwalombela nangu cimo mwi shina lyandi. Lombeni kabili mukapokelela, ukuti ukusekelela kwenu kufishiwepo.”—Yohane 14:6, 13, 14; 16:24.

Aya mashiwi yalicindeme sana. Icitabo cimo icilondolola ifya mu Baibolo citila apa “e payalukiile inshila abantu balepepelamo.” Yesu tatile abantu bafwile ukuleka ukupepa kuli Lesa no kutampa ukupepa ena. Lelo alandile pa cintu icipya ico abantu bafwile ukucita pa kulanda na Yehova Lesa.

Ca cine ukutila ukufuma fye na ku kale, Lesa alomfwa amapepo ya babomfi bakwe. (1 Samwele 1:9-19; Amalembo 65:2) Lelo, ukutula apo Lesa apanganine icipangano ca Mafunde na bena Israele, abalefwaya Lesa ukumfwa amapepo yabo balingile ukusumina ukuti abena Israele e bo Lesa asalile. Kabili mu kuya kwa nshita lintu Solomone aleteka, abantu balingile ukwishiba ukuti itempele e cifulo Lesa asalile ica kutuulilapo amalambo. (Amalango 9:29; 2 Imilandu 6:32, 33) Na lyo line, iyi mipepele yonse yali no kwaluka. Nge fyo umutumwa Paulo alembele, Amafunde ayo Lesa apeele abena Israele na malambo ayo abantu baletuula pe tempele fyali nge “cinshingwa ca fintu fisuma ifikesa, lelo te cipasho cine ica fintu.” (AbaHebere 10:1, 2) Ifi fyali no kupwa pa kuti ifyo fyaleimininako fiise. (Abena Kolose 2:17) Ukufuma, mu mwaka wa 33 C.E., umuntu talingile ukukonka Amafunde ya kwa Mose pa kuti abe na bucibusa na Yehova. Alingile ukulaumfwila uo Amafunde yalelangilila ukuti akesa, no yo ni Kristu Yesu.—Yohane 15:14-16; Abena Galatia 3:24, 25.

Ishina Ilyacila Amashina Yonse

Yesu asambilishe abantu inshila ya kupepelamo kuli Yehova iyacindama sana ilyo abebele ukuti e cibusa wafikapo uwa kwa Lesa, uwalenga amapepo yesu yalefika kuli Lesa no kwasukwa. Cinshi calenga Yesu ukulatucitila ici cintu cacindama?

Apo bonse tufyalwa ababembu, fyonse ifyo twingabomba nangu amalambo twingatuula kuli Lesa, te kuti fifumyepo ulubembu lwesu kabili te kuti tube na bucibusa na Yehova Lesa wesu uwa mushilo. (Abena Roma 3:20, 24; AbaHebere 1:3, 4) Lelo Yesu atuulile umweo wakwe uwapwililika ku kulubula abantu. (Abena Roma 5:12, 18, 19) Nomba bonse abalefwaya imembu shabo ukulekelelwa no kuba abalungama kuli Yehova e lyo no kupalama kuli ena “ukwabula umwenso,” bafwile ukusumina icilubula no kulapepela mwi shina lya kwa Yesu —Abena Efese 3:11, 12, The Bible in Bemba.

Nga tulepepela mwi shina lya kwa Yesu, ninshi tulelanga ukuti twalisumina ifintu fitatu ifyo Yesu abomba pa kuti ifyo Lesa afwaya fikacitike: (1) E “Mwana wa mpaanga uwa kwa Lesa,” uwaishileba icilubula icalenga ukuti Lesa atulekelele imembu shesu. (2) Yehova alimubuushishe kabili nomba ni “shimapepo mukalamba” uwafwilisha abantu ukumwenamo mu cilubula. (3) Wena eka fye e “nshila” twingapepelamo kuli Yehova.—Yohane 1:29; 14:6; AbaHebere 4:14, 15.

Nga tulepepela mwi shina lya kwa Yesu, ninshi tulemucindika. Alilinga ukucindikwa pantu Yehova afwaya ukuti “mwi shina lya kwa Yesu ikufi lyonse lifukame . . . no lulimi lonse lusose apabuuta ukuti Yesu Kristu e Shikulu ku kuleka Lesa Shifwe acindikwe.” (Abena Filipi 2:10, 11) Ne cacindama sana ca kuti, nga tulepepela muli Yesu ninshi tulecindika Yehova uwatumine Umwana wakwe ku kutupususha.—Yohane 3:16.

Baibolo yalitweba amashina ayengi na malumbo aya kwa Yesu pa kutwafwa ukwishiba bwino ifyo Yesu acindama. Aya mashina yakwe na malumbo yalatwafwa ukwishiba bwino ifisuma ifingi ifyo tumwenamo pa mulandu wa fyo Yesu atucitila, ifyo alecita ino nshita, ne fyo akatucitila ku ntanshi. (Moneni umutwe uuli pe bula 14 uuleti “Umulimo Wacindama uwa kwa Yesu.”) Ca cine, Yesu balimupeela ‘ishina ilyacila amashina yonse.’a Lesa alimupeela amaka yonse mu muulu na pano calo.—Abena Filipi 2:9; Mateo 28:18.

Mwi Shina lya kwa Yesu

Nga tulefwaya Yehova ukumfwa amapepo yesu, tufwile ukupepela mwi shina lya kwa Yesu. (Yohane 14:13, 14) Lelo tatufwile ukulanda fye ukuti “mwi shina lya kwa Yesu” pa mulandu fye wa kuti e fyo tufwile ukulanda pa kupepa. Mulandu nshi twasosele fyo?

Natulangilile. Tutile mwapokelela kalata ilelanda pa fya makwebo ukufuma ku kampani kamo. Pa kulekelesha uulembele kalata kuti atila “napwa nine muntu wenu” kampanda. Bushe kuti mwatila ca cine umwine wa kampani alimutemwa sana amumona fye kwati ni lupwa lwenu? Kwena iyo, pantu ninshi akonkele fye ifyo abantu balemba pa mpela ya kalata. Kanshi pa kupepa tatufwile ukulumbula Yesu ukwabula no kutontonkanya pa co twamulumbwila. Twiba ngo wa makwebo uwingalemba fye ati “nine muntu wenu” pantu fye e fyo bonse balemba pa mpela ya kalata. Nangu ca kutila tufwile ukuba no ‘mukoosha wa kupepa,’ tufwile ukupepa no “mutima onse,” te kupepa fye ukwabula no kutontonkanya pa fyo tulelanda.—1 Abena Tesalonika 5:17; Amalumbo 119:145.

Kuti twacita shani pa kuti twilalanda fye ukuti “mwi shina lya kwa Yesu” ukwabula no kutontonkanyapo? Tufwile ukutontonkanya sana pa mibele isuma iya kwa Yesu. Tontonkanyeni pa fyo amucitila kale na pa fyo akamucitila. Ilyo mulepepa, tooteleni Yehova no kumutatakula pa fintu fishaiwamina ifyo atucitila ukupitila mu Mwana wakwe. Ilyo mulecite fyo, mukacetekela sana ubulayo bwa kwa Yesu ubwa kuti: “Nga mwalomba icintu conse kuli Tata, akamupeela mwi shina lyandi.”—Yohane 16:23.

[Futunoti]

[Amashiwi pe bula 13]

Tufwile ukupepa no “mutima onse,” te kupepela fye ico cine

[Akabokoshi ne Cikope pe bula 14]

UMULIMO WACINDAMA UWA KWA YESU

Pa kuti mwishibe bwino bwino ifyo icifulo ca kwa Yesu cacindama, moneni aya malumbo bamupeela ne fyo bamulondolola.

Adamu wa Kupelelekesha.—1 Abena Korinti 15:45.

Amene.—2 Abena Korinti 1:19, 20; Ukusokolola 3:14.

Cebo.—Yohane 1:1.

Cilolo wa Mutende.—Esaya 9:6.

Emanuele.—Mateo 1:23.

Imfumu.—Ukusokolola 11:15.

Inte ya Cishinka.—Ukusokolola 1:5.

Intungulushi.—Mateo 23:10.

Kabilo wa Cipesha Mano.—Esaya 9:6.

Kacema Musuma.—Yohane 10:11.

Kapingula.—Imilimo 10:42.

Kasambilisha.—Yohane 13:13.

Kawikishanya.—1 Timote 2:5.

Kristu nelyo Mesia.—Mateo 16:16; Yohane 1:41.

Mikaele Malaika Mukalamba.—1 Abena Tesalonika 4:16; Yuda 9.

Mulungu Impalume.—Esaya 9:6.

Shikulu.—Yohane 13:13.

Shimapepo Mukalamba.—AbaHebere 4:14, 15.

Umupusushi.—Luka 2:11.

Umutumwa.—AbaHebere 3:1.

Umutwe wa Cilonganino.—Abena Efese 5:23.

Umwana wa kwa Lesa.—Yohane 1:34.

Umwana wa Mpaanga uwa kwa Lesa.—Yohane 1:29.

Umwana wa Muntu.—Mateo 8:20.

Umwiminishi Mukalamba uwa Bumi.—Imilimo 3:15.

Wishi wa Nshita Pe.—Esaya 9:6.